વૉર ઇફેક્ટ / જો તમે પણ LICના IPOની રાહ જોઈ રહ્યાં છો તો પહેલાં આ જાણી લો, સરકાર લઇ શકે છે મોટો નિર્ણય

• બજારમાં ચાલી રહેલી અસ્થિરતાથી સરકારમાં ડરનો માહોલ!
• આ અઠવાડિયે નક્કી કરાશે કે, LICનું લિસ્ટિંગ માર્ચમાં થશે કે નહીં?
• વૈશ્વિક સ્થિતિને જોતા IPO નાં સમયમાં ફેરફાર કરવામાં આવી શકે

આ મામલા સાથે સંકળાયેલા સૂત્રોએ જણાવ્યું કે, હજુ પણ માર્ચના અંત સુધીમાં IPO ઉતારવાની તૈયારીઓ પૂર્ણ કરી રહેલી સરકાર આગામી નાણાંકીય વર્ષમાં તેને બહાર પાડવા માગે છે. IPO પર અંતિમ નિર્ણય લેવા માટે સરકાર આ અઠવાડિયે એક બેઠક પણ કરશે. જેમાં એવું નક્કી કરવામાં આવશે કે, LICનું લિસ્ટિંગ આ વર્ષે માર્ચમાં થશે કે નહીં. આ મામલા સાથે જોડાયેલા એક અધિકારીએ જણાવ્યું કે, વૈશ્વિક સ્થિતિને જોતા IPO નાં સમયમાં ફેરફાર કરવામાં આવી શકે છે.

નિર્મલા સીતારમણે પણ આપ્યાં છે સંકેત

નાણાંમંત્રી નિર્મલા સીતારમણે પણ અગાઉ કહ્યું હતું કે, આમ તો પહેલાની યોજના અનુસાર જ હું જવા ઇચ્છીશ. કારણ કે, તે ભારતીય બજાર પર નિર્ભર કરે છે. પરંતુ ગ્લોબલ માહોલ બગડે છે તો IPO ના ટાઇમિંગ પર ફરી વાર વિચાર કરી શકાય એમ છે. કંપનીએ IPO માટે 13 ફેબ્રુઆરીના રોજ બજાર નિયામક સેબી પાસે DRHP જમા કરાવી દીધા છે.

મોટા રોકાણકારો સરકાર પર બનાવી રહ્યાં છે દબાવ

LIC ના IPOમાં પૈસા લગાવનાર ઇન્વેસ્ટમેન્ટ બેંક સરકાર પર લિસ્ટિંગ મુલતવી રાખવા દબાણ કરી રહી છે. તેમનું કહેવું છે કે, રશિયા-યુક્રેન યુદ્ધના કારણે બજારમાં હજુ પણ અસ્થિરતા છે, જેની અસર IPO નાં પ્રદર્શન પર પણ પડશે. જો તેને મોકૂફ રાખવામાં આવે તો સ્થિરતા આવ્યા બાદ રોકાણકારોનો વિશ્વાસ પણ વધારે વધશે કે જેનો ફાયદો થશે.

વિદેશી રોકાણકારો પણ બનાવી શકે છે અંતર

LIC ના IPO પર કામ કરતા એક બેન્કરે જણાવ્યું કે, બજારની અસ્થિરતા વચ્ચે વિદેશી રોકાણકારો હાલમાં તેમના પોર્ટફોલિયોની સમીક્ષા કરી રહ્યાં છે. આવાં સમયે તેઓ આ IPOથી પોતાને દૂર કરી શકે છે કે જે શેરના પ્રદર્શનને પણ અસર કરશે.