નિવેદન / કોંગ્રેસે કહ્યું, મોદીજી તો PUBG બૅન કરવાના જ હતા પણ પછી વિચાર્યું આ લોકો નોકરી માંગશે તો ?

• સોમવારે વધુ 47 એપ્સ પર લાગ્યો પ્રતિબંધ 
• હજુ પણ કેટલીક એપ સરકારના રડારમાં 
• કોંગ્રેસે PUBG મુદ્દે PM મોદી પર તાક્યું નિશાન 

ભારત અને ચીન વચ્ચે વર્તમાન વિવાદ બાદ મોદી સરકાર દ્વારા વધુ 47 એપ પર પ્રતિબંધ મૂકવામાં આવ્યો છે ત્યારે કોંગ્રેસ પ્રવક્તાએ PUBG મુદ્દે મોદી સરકાર પર નિશાન સાધ્યું છે. અભિષેક મનુ સિંઘવીએ ટ્વિટ કરીને કહ્યું કે જો મોદી સરકાર PUBG બંધ કરી દે તો યુવાવર્ગ રોજગારની વાત કરવા લાગશે. નોંધનીય છે કે 29 જૂનથી અત્યાર સુધી સરકાર 106 એપ્સ બેન કરી ચુકી છે અને પબ્જી સહીતની અન્ય એપ્સ પર નજર રાખવામાં આવી રહી છે. 

સરકાર આ મુદ્દે કોઈ નિર્ણય લે તો પહેલા કોંગ્રેસ પ્રવક્તાએ કહ્યું કે મોદીજી ખરેખર PUBG પર પ્રતિબંધ લગાવવાની તૈયારીમાં હતા પણ પછી લાગ્યું કે યુવાનો પાસે ફેન્ટેસીની દુનિયા નહીં રહે તો વાસ્તવિક દુનિયાનાં સવાલો કરશે, જેમાં રોજગાર એક મુદ્દો હશે. 

નોંધનીય છે કે સરકારે 250 ચાઇનીઝ એપની લિસ્ટ તૈયાર કરી હોવાના અહેવાલ છે અને આ યાદીમાં પબ્જીનું પણ નામ સામેલ છે. આ બધી એપ પર પ્રતિબંધનો વિચાર કરવામાં આવી રહ્યો છે જેના પર ટૂંક સમયમાં નિર્ણય આવી શકે છે. PUBG એક સાઉથ કોરિયન વીડિયો ગેમ છે અને બેટલગ્રાઉન્ડ તેની સહાયક છે. જોકે ચીનની ટેન્સેન્ટ કંપની આ ગેમમાં ખૂબ મોટી ભાગેદારી રાખે છે. એક અહેવાલ અનુસાર 17.5 કરોડ લોકોએ આ ગેમ ઈન્સ્ટોલ કરી લીધી છે.