હાલ દેશમાં લાખો લોકોએ પોતાનું સરનામું લખવા કવાયત કરવી પડે છે. ડિલિવરી એપ્સ અને ઈ-કોમર્સ પ્લેટફોર્મ પર તો પિનકોડ લખવો જ પડે છે. આમ છતાં પણ ડિલિવરી બોય ભૂલો પડે છે.
ડિજિટલ એડ્રેસ કોડઃ દેશની વર્તમાન જરૂરિયાત
સરકાર દેશમાં ડિજિટલ એડ્રેસ કોડ લાવશે
દરેક મકાનનો પોતાનો એક અલગ કોડ હશે
આધાર કાર્ડના નંબર જેવો જ યુનિક કોડ હશે
દેશમાં ડિજિટલ ક્રાંતિને ગતિ આપતાં સરકાર ખૂબ જ જલ્દી દેશમાં ડિજિટલ એડ્રેસ કોડ લાવી રહી છે. તે તમારા એડ્રેસનો આધાર સાથે જોડાયેલો ખાસ કોડ હશે. ભારત સરકારના પોસ્ટ વિભાગ દ્વારા આ કોડનું નિર્માણ કરાઇ રહ્યું છે. આ વ્યવસ્થા અંતર્ગત દરેક મકાનનો પોતાનો એક અલગ કોડ હશે. તે આધાર કાર્ડના નંબર જેવો જ યુનિક કોડ હશે જે ભારતના દરેક નાગરિકને તેમના એડ્રેસ પ્રમાણે આપવામાં આવશે.
દરેક ફ્લેટ અને ઘરનો અલગ અલગ કોડ હશે
સરળ શબ્દોમાં સમજીએ તો જો કોઇ બિલ્ડિંગમાં આઠ ફ્લેટ હોય તો દરેક ફ્લેટનો પોતાનો અલગ કોડ હશે. જો કોઇ બે માળનું ઘર હોય અને તેમાં બે પરિવાર રહેતા હોય તો બંને પરિવારનો અલગ અલગ કોડ હશે. ડિજિટલ એડ્રેસ કોડથી આવનારા સમયમાં તમને ઓનલાઇન ડિલિવરી સહિત ઘણા પ્રકારની સુવિધાઓમાં સહાયતા મળશે.
પોસ્ટ વિભાગ નવું લાવવાની કરી રહ્યું છે તૈયારી
હાલ દેશમાં લાખો લોકોએ શહેર કે ગામમાં પોતાનું સરનામું લખવા આવી કવાયત કરવી પડે છે. ડિલિવરી એપ્સ અને ઈ-કોમર્સ પ્લેટફોર્મ પર તો સરનામું લખવું હોય, તો પિનકોડ પણ લખવો પડે છે. આમ છતાં, ડિલિવરી બોય ભૂલો પડે છે. જોકે, દૂરસંચાર મંત્રાલય હેઠળ કાર્યરત પોસ્ટ વિભાગ હવે આ બધું બદલવાની તૈયારીમાં છે.
ડિજિટલ એડ્રેસ કોડને બનાવવા માટે દેશના પ્રત્યેક એડ્રેસને આઇડેન્ટિફાઇ કરાશે. હવે દરેક રાજ્ય, શહેર-ગામ, મહોલ્લો, ગલી અને ઘરને ધ્યાનમાં રાખીને એક યુનિક કોડ તૈયાર કરાઈ રહ્યા છે, તે પણ ડિજિટલ. પિન કોડનું સ્થાન લેનારો ૧૨ ડિજિટનો આ ડિજિટલ એડ્રેસ કોડ (ડીએસી) દરેક ઘર માટે ડિજિટલ કો-ઓર્ડિનેટરનું કામ કરશે. હવે સેટેલાઈટ ફક્ત ડીએસી થકી દરેક ઘરનું સ્પષ્ટ લોકેશન જણાવશે. આ સેવાથી કોઈ પણ સર્વિસ ખૂબ સરળતાથી તમારા ઘર સુધી પહોંચશે. આ માટે તમારે ફક્ત તમારો ડિજિટલ કોડ જ લખવાનો રહેશે.
આ મકાનોના ડિજિટલ એડ્રેસ કોડ નહીં અપાય
હાલ ભારતમાં ૩૫ કરોડ મકાન છે, જ્યારે વેપારી અને અન્ય મકાનો મળીને કુલ ૭૫ કરોડ મકાન છે. ભવિષ્યમાં દેશમાં મકાનોની સંખ્યા ૧૦૦ કરોડ થશે, તો પણ તમામને ૧૨ ડિજિટના કોડ ફાળવી શકાશે. દેશમાં અનેક સંવેદનશીલ મકાન છે, જેમાં પરમાણુ સંસ્થાઓ કે ગુપ્તચર સંસ્થાઓની ઓફિસો છે. આ તમામ સુરક્ષાની દૃષ્ટિએ સંવેદનશીલ હોવાથી તેમને ડિજિટલ એડ્રેસ કોડ નહીં અપાય. તેમને નેબરહૂડ કોડ કે સિટી કોડ સાથે કનેક્ટ કરાશે.
આ કોડ ઈ-કેવાયસી તરીકે કામ કરશે
પોસ્ટ વિભાગની આ યોજનાનો હેતુ ચોક્કસ મકાનમાં જ ડિલિવરી કરવાનો છે. જે પ્લેટફોર્મ્સ ડિજિટલ મેપ થકી ડિલિવરી સરનામું શોધે છે, તેમને ડીએસી થકી સટિક લોકેશન મળશે. દરેક ઘરનું ઓનલાઈન એડ્રેસ વેરિફિકેશન કરાશે. બેન્કિંગ, વીમા-ટેલિકોમ માટે સરનામાનું પ્રમાણ નહીં આપવું પડે, જે એક રીતે ઈ-કેવાયસી તરીકે કામ કરશે. મિલકતો, કરવેરા, ઈમર્જન્સી મેનેજમેન્ટ, ચૂંટણી, વસતી ગણતરી બધામાં તેનાથી લાભ મળશે.
સ્કેન કરીને સ્પષ્ટ લોકેશન પણ મેળવી શકશો
તાજેતરમાં પોસ્ટ વિભાગે પોતાની ઓફિશિયલ વેબસાઇટ પર ડિજિટલ એડ્રેસ કોડના માળખાને રિલીઝ કર્યું છે, જેથી લોકો તેની પર પોતાનો પ્રતિભાવ આપી શકે. જો ડિજિટલ એડ્રેસ કોડને સહમતિ મળી જશે તો તે દેશવાસીઓ માટે ખૂબ જ ફાયદાકારક હશે. તમે આ ડિજિટલ કોડને ટાઇપ કરીને ઉપયોગમાં લઇ શકશો અથવા ક્યુઆર કોડની જેમ તેને સ્કેન કરીને સ્પષ્ટ લોકેશન મેળવી શકશો. ડિજિટલ કોડ આવ્યા બાદ કોઇ પણ કામ માટે ચમને એડ્રેસ ફીડ કરવાના કંટાળાજનક કામમાંથી છુટકારો મળી શકશે.
સરકારી યોજનાઓને જારી કરવામાં પણ તે મદદરૂપ બનશે
ઇ કોમર્સ કંપનીઓ અને એનબીએફસી કંપનીઓની સેવાઓ માટે પણ ડિજિટલ એડ્રેસ કોડ ખૂબ જ મદદરૂપ સાબિત થશે. સરકારી યોજનાઓને જારી કરવામાં પણ તે મદદરૂપ બનશે. આ ઉપરાંત વર્તમાનમાં થઇ રહેલા ફ્રોડની ઘટનાઓ પણ રોકી શકાશે. તેનાથી સંપતિ, ટેક્સેશન, ઇમર્જન્સી મેનેજમેન્ટ અને જનગણના કે જનસંખ્યા રજિસ્ટર બનાવવામાં પણ મદદ મળશે.
તમારે એડ્રેસ સેવ કરવાની પણ જરૂર નહીં રહે
તે વન નેશન વન એડ્રેસનાં સપનાંને સાકાર કરવામાં મદદરૂપ થશે. તે એક પર્મેનેન્ટ કોડની જેમ કામ કરશે. તેના આવ્યા બાદ ઇ કોમર્સ જેવી સર્વિસ સરળ બની જશે. સાથે સાથે ટેક્સ ફાઇલ કરવા જેવા અનેક કામ એડ્રેસ ફીલ કર્યા વગર થઇ શકશે. તમારે એડ્રેસ સેવ કરવાની પણ જરૂર નહીં રહે. આ પગલું દેશમાં એક ક્રિએટિવ અને સામાન્ય વ્યક્તિ માટે સુવિધાઓ વધારવાની દિશામાં લેવાયેલું એક પગલું છે.