કેન્દ્ર સરકારે ચીનની નેશનલ સ્ટેટેસ્ટીકસ બ્યૂરોની અંગ્રેજી વેબસાઇટને બ્લોક કરી દીધી છે. જો કે આ સિવાય ચીની સરકારી અખબાર ગ્લોબલ ટાઇમ્સ અને ચીનથી સંચાલિત સત્તાવાર ન્યૂઝ એજન્સી સિન્હુઆની વેબસાઇટને હજુ પણ જોઈ શકાય છે.
ચીન પર મોદી સરકારની વધુ એક ડિજિટલ સ્ટ્રાઈક
તત્કાળ ચીની વેબસાઈટને બ્લોક કરવાના આપ્યા આદેશ
અગાઉ પણ ઘણી ચીની એપ્સ પર મૂકાઈ ચૂક્યો છે પ્રતિબંધ
ટેલિકોમ અને દૂરસંચાર વિભાગે ભારતમાં ચીનના નેશનલ સ્ટેટિસ્ટિક્સ બ્યુરો ની અંગ્રેજી વેબસાઇટ પર પ્રતિબંધ મૂક્યો છે. પૂર્વ લદ્દાખમાં સરહદ પર ચાલી રહેલા તણાવ વચ્ચે કેન્દ્ર સરકાર દ્વારા આ નિર્ણય લેવામાં આવ્યો છે. જો કે, આ દરમિયાન ચીની અખબાર ગ્લોબલ ટાઈમ્સ અને ચીનની સમાચાર એજન્સી સિન્હુઆ પર હજુ કોઈ કાર્યવાહી કરાઇ નથી.
આ વેબસાઇટને એક્સેસ કરતાં જ એક મેસેજ દેખાઈ રહ્યો છે, ''તમે વિનંતી કરેલ URL ને ભારત સરકારના ટેલિકમ્યુનિકેશન વિભાગના નિર્દેશ મુજબ] બ્લોક કરવામાં આવ્યો છે. વધુ માહિતી માટે એડમિનિસ્ટ્રેટરનો સંપર્ક કરો"
ભારતમાં અગાઉ ઘણી ચીની એપ્સ પર મૂકાઈ ચૂક્યો છે પ્રતિબંધ
પૂર્વી લદ્દાખની ગલવાન ખીણમાં ભારત અને ચીની સૈન્ય વચ્ચે થયેલી હિંસક અથડામણમાં 20 ભારતીય સૈનિકો માર્યા ગયા હતા. આ પછી ભારતે મોટા પાયે ચીની મોબાઇલ એપ્લિકેશન પર પ્રતિબંધ મૂક્યો છે. તેમાં લોકપ્રિય મોબાઇલ એપ્લિકેશન tiktok અને PUBG સહિત લગભગ અઢીસો જેટલી એપ્લિકેશનો શામેલ છે.
ચીનને લઈને રાજ્યસભામાં સંરક્ષણ પ્રધાનનું નિવેદન
નોંધપાત્ર વાત એ છે કે સંરક્ષણ પ્રધાન રાજનાથસિંહે આજે રાજ્યસભામાં ચીન વિશે નિવેદન આપ્યું છે. રાજનાથસિંહે કહ્યું કે દેશના હિતમાં ભલે ગમે તેટલા મોટા કે કઠોર પગલાં લેવામાં આવે, ભારત પાછળ નહીં હઠે. તેમણે કહ્યું કે ભારત ન તો પોતાનું માથું ઝૂકાવવા માંગે છે અને ન કોઈનું માથું ઝુકાવવા માંગે છે.
તેમણે રાજ્યસભામાં એમ પણ કહ્યું કે LAC પર શાંતિની કોઈપણ ગંભીર પરિસ્થિતિનો દ્વિપક્ષીય સંબંધો પર ચોક્કસ અસર પડશે. બંને પક્ષોએ પણ આને ખૂબ સારી રીતે સમજવું જોઈએ.
સંરક્ષણ પ્રધાને કહ્યું, 'ભારત દરેક પગલા ભરવા માટે તૈયાર છે અને સૈન્ય સંપૂર્ણ રીતે તૈયાર છે. અમારા સૈનિકો ઉત્સાહિત છે. તે સાચું છે કે લદાખમાં આપણને એક પડકારનો સામનો કરવો પડી રહ્યો છે, પરંતુ આપણે પડકારનો સામનો કરીશું. અમે દેશનું માથું નમાવવા નહીં દઈએ. અમારા સૈનિકો ચીની આર્મીની નજર સામે ઉભા છે.