મિનિસ્ટર્સ કાઉન્સિલની બેઠકો બાદ સરકારના કામને ઝડપી બનાવવા માટે કેટલાક નવા આઇડીયા સાથે મહત્વના નિર્ણયો લેવામાં આવ્યા હતા
મોદી સરકારની મિનિસ્ટર્સ કાઉન્સિલની બેઠકો
મંત્રીઓને આઠ જૂથોમાં વહેંચવામાં આવ્યા
સરકારના કામને ઝડપી બનાવવા માટે મહત્વના નિર્ણયો લેવાયા
આ વર્ષે જુલાઈમાં મોદી મંત્રી પરિષદનું વિસ્તરણ થયું ત્યારથી મંત્રી પરિષદની સતત બેઠકો થઈ રહી છે. મિનિસ્ટર્સ કાઉન્સિલની બેઠકો બાદ સરકારના કામને ઝડપી બનાવવા માટે મહત્વના નિર્ણયો લેવામાં આવ્યા હતા.
તમામ 77 મંત્રીઓને આઠ જૂથમાં વહેંચવામાં આવ્યા છે. સરકારના કામકાજમાં વધુ પારદર્શિતા લાવવા અને મોદી સરકારની કાર્યક્ષમતામાં વધુ વધારો કરવા માટે આ પગલું લેવામાં આવ્યું છે.
મંત્રીઓને આઠ જૂથોમાં વહેંચવામાં આવ્યા
સરકારી સૂત્રોના જણાવ્યા અનુસાર, મંત્રીઓને આઠ જૂથોમાં વિભાજીત કરવાનો નિર્ણય મંત્રી પરિષદની પાંચ બેઠકો પછી લેવામાં આવ્યો હતો, જેને 'ચિંતિન શિબીર' નામ આપવામાં આવ્યું હતું. દરેક બેઠકની અધ્યક્ષતા વડાપ્રધાન નરેન્દ્ર મોદીએ કરી હતી.
અલગ અલગ વિષય પર બેઠકો
પ્રાપ્ત માહિતી અનુસાર, દરેક બેઠકનું આયોજન અનૌપચારિક રીતે કરવામાં આવ્યું હતું અને લગભગ પાંચ કલાક સુધી ચાલિ હતી
આ બેઠકોમાં ઘણા વિચારોની આપ-લે કરવામાં આવી હતી. કુલ પાંચ અલગ અલગ સત્રો યોજાયા હતા. તેમની થીમ વ્યક્તિગત કાર્યક્ષમતા, અમલીકરણ, મંત્રાલયની કામગીરી અને સહયોગ બાબતે ચર્ચાઓ થઈ હતી. એક બેઠકનો વિષય પક્ષ સાથે સંકલન અને અસરકારક કમ્યુનિકેશન હતો જેથી સરકાર અને પક્ષ કેન્દ્ર સરકારની મુખ્ય યોજનાઓના અમલીકરણમાં સાથે મળીને આગળ વધી શકે.
દરેક જૂથમાં 9 થી 10 મંત્રીઓ
પાંચમા અને અંતિમ સત્રની થીમ સંસદીય કાર્ય હતી, જેમાં લોકસભાના અધ્યક્ષ ઓમ બિરલા અને રાજ્યસભાના અધ્યક્ષ એમ વેંકૈયા નાયડુએ હાજરી આપી હતી. આ તમામ બેઠકોનો હેતુ મોદી સરકારની કાર્યક્ષમતા વધારવાનો અને ડિલિવરી સિસ્ટમને મજબૂત કરવાનો હતો. મંત્રીઓના આઠ અલગ-અલગ જૂથ બનાવવા એ આ દિશામાં એક મોટું પગલું છે. સૂત્રોના જણાવ્યા અનુસાર આનાથી ગવર્નન્સના વધુ સુધારો આવશે અને મંત્રીઓ માટે કામ કરવામાં સરળતા રહેશે. દરેક જૂથમાં 9 થી 10 મંત્રીઓ હશે. એક કેન્દ્રીય મંત્રીને ગ્રુપ કોઓર્ડિનેટર બનાવવામાં આવ્યા છે.
દરેક જૂથના સભ્યો એકબીજા સાથે ચર્ચા કરશે અને કાર્યને સરળ બનાવવાની જવાબદારી સંયોજકની રહેશે. આ પ્રક્રિયાથી તે નવા મંત્રીઓને પણ ફાયદો થશે, જેમને પહેલીવાર સરકારમાં કામ કરવાની તક મળી છે.
ટિફિન બેઠકોનો પણ ઉલ્લેખ કર્યો
વડાપ્રધાન મોદીએ આ બેઠકોમાં કહ્યું છે કે મંત્રીઓએ વધુ ઇનવોલ્વ થવું પડશે. આ માટે તેમણે ગુજરાતના મુખ્યમંત્રી હતા ત્યારે યોજાયેલી ટિફિન બેઠકોનો પણ ઉલ્લેખ કર્યો હતો. જેમાં મંત્રીઓ અને નેતાઓ પોતપોતાના ઘરેથી ટિફિન લાવતા હતા અને સાથે બેસીને ભોજન લેતા હતા અને સરકાર અને પક્ષના કામની ચર્ચા કરતા હતા.
2024ની ચૂંટણીને ધ્યાનમાં રાખીને એક્ટિવિટી
મંત્રી પરિષદની બેઠકમાં પીએમ મોદીએ મંત્રીઓને કાર પૂલ કરવા કહ્યું હતું અને દરેક કારમાં ત્રણથી ચાર મંત્રીઓ એકસાથે બેઠકમાં આવ્યા હતા. 2024ની ચૂંટણીને ધ્યાનમાં રાખીને આ બેઠકોને મહત્વપૂર્ણ માનવામાં આવે છે. તેમનો ઉદ્દેશ્ય સરકારને સુવ્યવસ્થિત કરવાનો અને કામમાં ઝડપ અને તીક્ષ્ણતા લાવવાનો છે જેથી લોકોને ફરિયાદ કરવાની તક ન મળે. આ વર્ષે જુલાઈમાં મોદી મંત્રી પરિષદનું વિસ્તરણ થયું ત્યારથી મંત્રી પરિષદની સતત બેઠકો થઈ રહી છે.