વાયરલ મેસેજ / FACT CHECK : શું મોદી સરકાર તમારા ખાતામાં 1 લાખ ટ્રાન્સફર કરશે, હકીકત આવી સામે

• સરકાર ઘણી યોજનાઓ અંતર્ગત પૈસા ટ્રાન્સફર કરે છે
• સબકા સાથ સબકા વિકાસ યોજનામાં 1 લાખ ટ્રાન્સફર કર્યાનો મેસેજ વાયરલ
• પીઆઈબી ફેક્ટચેકે કર્યો ખુલાસો

વોટ્સએપમાં મેસેજ થયો વાયરલ
કેન્દ્ર સરકાર દ્વારા દેશનાં ગરીબો, ખેડૂતો અને જરુરિયાતમંદ લોકો માટે ઘણાં પ્રકારની યોજનાઓ અમલમાં મુકવામાં આવી છે. જેમાંથી ઘણી યોજનાઓ અંતર્ગત સરકાર લોકોનાં ખાતામાં પૈસા પણ ટ્રાન્સફર કરે છે. હાલમાંજ એક એવો મેસેજ વોટ્સએપ પર વાયરલ થઈ રહ્યો છે. જેમાં કહેવામાં આવી રહ્યુ છે કે મોદી સરકાર સબકા સાથ સબકા વિકાસ યોજના અંતર્ગત લોકોનાં ખાતામાં સીધા 1 લાખ રુપિયા ટ્રાન્સફર કરી રહી છે. તો જાણીએ કે સાચ્ચે સરકારની એવી કોઈ જાહેરાત છે કે નહીં.

સરકારનો ભવિષ્યમાં આવો કોઈ પ્લાન નથી
ભારત સરકારની સંસ્થા પીઆઈબીએ આ વાયરલ મેસેજની ખરાઈ કરીને તેની તપાસ કરીને તે અંગે જણાવ્યું છે. પીઆઈબી ફેક્ટ ચેકે ટ્વીટ કરીને જાણકારી આપી છે કે. આ ફેક મેસેજ છે અને સરકારે હાલ પર્યત એવી કોઈ જાહેરાત નથી કરી અને ભવિષ્યમાં પણ તેમનો એવો કોઈ પ્લાન નથી.

સૌના ખાતામાં 1 લાખ રુપિયા જમા થઈ રહ્યા છે
એક વોટ્સએપ મેસેજમાં દાવો કરવામાં આવ્યો છે કે કેન્દ્ર સરકાર પ્રધાનમંત્રી સબકા સાથ સબકા વિકાસ યોજના અંતર્ગત સૌના ખાતામાં 1 લાખ રુપિયાની ધનરાશી જમા કરાવી રહી છે. આ વાયરલ મેસેજની નીચે આપવામાં આવેલ મોબાઈલ નંબરની તપાસ કરતા જાણવા મળ્યું છે કે તે કોઈ નરસિંગ રંધારીનાં નામે રજિસ્ટર છે અને તે મોબાઈલ નંબર ઓડિશાનો જણાઈ રહ્યો છે.

ફેક મેસેજ ઝડપથી થઈ રહ્યા છે વાયરલ
કોરોના કાળમાં દેશભરમાં જે પ્રકારની પરિસ્થિતિ છે તેવામાં ઘણાં ફેક મેસેજો ઝડપથી વાયરલ થઈ રહ્યા છે. ભારત સરકારની પ્રેસ ઇન્ફોર્મેશન બ્યૂરોએ આ વાયરલ મેસેજનું ખંડન કરીને કહ્યું છે કે સરકારે આવી કોઈ જાહેરાત નથી કરી. સરકારે પણ કોરોના કાળમાં આ પ્રકારનાં ફેક સમાચારને રોકવા માટે ઘણાં પ્રયાસો કર્યાં છે.