ભારતમાં ઈંધણના વધતાં ભાવ વચ્ચે કાચા તેલના આયાતને લઈને સરકાર નવા વિકલ્પ શોધવામાં લાગી હોવાના અહેવાલો સામે આવી રહ્યા છે.
ભારતમાં પેટ્રોલ ડીઝલના ભાવ આસમાને
ઓપેક દેશોએ ફગાવી હતી ભારતની અપીલ
સરકારે કંપનીઓને નવા વિકલ્પ શોધવા અપીલ કરી
શું છે સમગ્ર મામલો?
ભારતમાં પેટ્રોલ ડીઝલના વધતાં ભાવના કારણે સામાન્ય પ્રજાએ મોંઘવારીનો સામનો કરવો પડી રહ્યો છે ત્યારે મોદી સરકાર પાસે ઈંધણની કિંમતોમાં રાહત આપવા માટે માંગ કરવામાં આવી રહી છે. સરકાર પર સતત દબાણ વધી રહ્યું છે ત્યારે કાચા તેલના ઉત્પાદક દેશોથી પણ પાછલા દિવસોમાં નિરાશા હાથ લાગી છે ત્યારે ધ હિન્દુ અખબારના દાવા અનુસાર હવે સરકારે આ માટે નવો રસ્તો કાઢવા કવાયત હાથ ધરી છે.
દુનિયા માટે ભારતનું શું છે મહત્વ?
નોંધનીય છે કે કાચા તેલનું ઉત્પાદન કરતાં દેશોના સમૂહ ઓપેકમાં એવું એલાન કરવામાં આવ્યું છે કે કાચા તેલનું ઉત્પાદન ઘટાડવામાં આવશે. આ નિર્ણયના કારણે ભારતને વધુ માર પડવા જઈ રહી છે. ભારત પોતાની જરૂરિયાતનું 84% તેલ બહારથી આયાત કરે છે અને વિશ્વમાં આપણો દેશ ત્રીજો સૌથી મોટો ઉપભોક્તા દેશ છે.
ભારતની અપીલ ફગાવી દેવામાં આવી
ભારતે તેલ ઉત્પાદક દેશોના સમૂહમાં એવી અપીલ કરી હતી કે કિંમતોમાં ઘટાડો કરવામાં આવે જેથી વૈશ્વિક અર્થવ્યવસ્થા પાટા પર આવી શકે. ભારતની આ અપીલને ફગાવી દેવામાં આવી છે. આટલું જ નહીં સાઉદી અરબના ઉર્જા મંત્રીએ તો એવી શિખામણ આપી દીધી કે ગયા વર્ષે ઓછી કિંમતો પર જે તેલ ખરીદ્યું હતું તે વાપરો.
હવે બીજા દેશોની શક્યતાની થશે તપાસ
હવે રીપોર્ટ અનુસાર સરકારના સૂત્રોનું કહેવું છે કે સરકારે કહી દીધું છે કે તે બીજી જગ્યાએથી તેલ ખરીદવાની પ્રક્રિયા તેજ કરી દે. મધ્ય-પૂર્વના તેલ ઉત્પાદક દેશોની મનમાની સામે આપણે બંધાઈ ન શકીએ. સૂત્રોએ કહ્યું કે ભારતે કોરોના વાયરસ મહામારી સમય દરમિયાન પશ્ચિમ એશિયાના દેશોનો કોઈ પણ ઓર્ડર રદ કર્યો નથી જોકે એ સમયે તો મહામારીના કારણે દુનિયાભરમાં તેલની માંગ સાવ ઓછી હતી.
શું કરશે સરકાર
સૂત્રોનું માનવું છે કે સરકારની આ રણનીતિ શરૂઆતમાં ભલે મોંઘી લાગે પરંતુ તેના દૂરગામી પરિણામ ખૂબ સારા આવશે. સૂત્રો અનુસાર ઇંડિયન ઓઇલે રશિયા સાથે તેલ આયાતનો પોતાનો કોન્ટ્રાક્ટ રિન્યૂ કરાવી લીધો છે. જોકે ભારતના પેટ્રોલિયમ મંત્રાલયને આ મુદ્દે મીડિયા દ્વારા કરવામાં આવેલા સવાલો પર કોઈ જવાબ આપવામાં આવ્યો નથી. હાલમાં સાઉદી અરબ અને ઈરાનમાંથી ભારત મોટા ભાગનું કાચું તેલ મંગાવે છે.