આશા / કોરોના વાયરસના નવા સ્ટ્રેન પર અસરકારક રહેશે આ કંપનીની વેક્સીન, જલ્દી શરૂ કરાશે ટેસ્ટિંગ

• કોરોના વાયરસના નવા સ્ટ્રેનને લઈને જાગી આશા
• મોર્ડના કંપનીની વેક્સીન પણ રહેશે અસરકારક
• આ વેક્સીન કોરોના વાયરસમાં પણ રહી છે 94 ટકા સફળ
   

બ્રિટનમાં કોરોના વાયરસના ઝડપથી ફેલાઈ રહેલા સ્ટ્રેનના મળ્યા બાદ વધુ એક નવો સ્ટ્રેન વાયરસ મળી આવ્યો છે. નવો સ્ટ્રેન પણ વધારે સંક્રામક હોવાનું જાણવા મળ્યું છે. જેનાથી દુનિયાભરમાં હાહાકાર મચ્યો છે. આ સમયે અમેરીકી બાયોટેક કંપની મોર્ડનાએ દાવો કર્યો છે કે તેને આશા છે કે તેમની વેક્સીન કોરોનાના નવા સ્ટ્રેન પર પણ કામ કરશે.
 

નવા સ્ટ્રેનમાં પણ વેક્સીનનું કરાશે ટેસ્ટિંગ

કંપનીએ કહ્યું કે તે કોઈ પણ સ્ટ્રેનની વિરુદ્ધમાં પણ વેક્સીનની અસરની તપાસ કરવા માટે ટેસ્ટિંગની યોજના બનાવી રહી છે. મોર્ડનાનું આ નિવેદન એવા સમયે આવ્યું છે જ્યારે બ્રિટિશ સરકાર કોરોના વાયરસના નવા સ્ટ્રેનના કારણે અનેક કડક પ્રતિબંધો લગાવવાની યોજનામાં છે. 
 
આવનારા સમયમાં થશે એડિશનલ ટેસ્ટિંગ

કંપનીએ કહ્યું કે તેને આશા છે કે તેમની વેક્સીન જેને અમેરિકામાં ઈમરજન્સીમાં વાપરવાની મંજૂરી મળી છે તે બ્રિટનના નવા વાયરસ સ્ટ્રેનની વિરોધમાં પણ કામ કરશે. અમેરિકા બેસ્ડ આ કંપનીએ કહ્યું કે તેઓની આશા પર સ્પષ્ટ થવા માટે તેઓ આવનારા સમયમાં વેક્સીનનું એડિશનલ ટેસ્ટિંગ કરશે. 

94 ટકા અસરકારક રહી છે મોર્ડનાની કોરોના વેક્સીન

ફાઈઝરની જેમ મોર્ડનાની વેક્સીનને પણ ઓછા તાપમાને સ્ટોર કરવાની જરૂર રહે છે. આ વેક્સીન 94 ટકા અસરકારક સાબિત થઈ છે. મોર્ડનાએ વેક્સીનની કિંમત 32-37 ડોલર પ્રતિ ડોઝ રાખવાનું વિચાર્યું છે. મોટા ઓર્ડર પર કિંમતમાં ફેરફાર થઈ શકે છે.