ઍલર્ટ / ગુજરાતભરની હોસ્પિટલોમાં આજે યોજાઇ મોકડ્રીલ, કોરોનાની સંભવિત સ્થિતિને પહોંચી વળવા જુઓ ક્યાં કેવી તૈયારીઓ?

• ગુજરાતભરની હોસ્પિટલોમાં આજે યોજાઇ મોકડ્રીલ
• અમદાવાદ સિવિલ હોસ્પિટલમાં કોરોના મોકડ્રીલ યોજાઈ
• જામનગરમાં સાંસદ પૂનમ માડમની હાજરીમાં મોકડ્રીલ યોજાઈ

કોરોનાએ ફરી એક વાર સમગ્ર વિશ્વમાં માથું ઉચક્યું છે ત્યારે આપણા દેશ અને રાજ્યએ પૂર્વ સાવચેતીના ભાગરૂપે તૈયારીઓ શરૂ કરી દીધી છે. આજે ગુજરાતભરની હોસ્પિટલોમાં મોકડ્રીલ યોજાઇ છે. કોરોનાની સંભવિત સ્થિતિને પહોંચી વળવા માટેની તૈયારીઓને લઈ મોકડ્રીલ યોજાઈ છે. 

અમદાવાદ સિવિલ હોસ્પિટલમાં કોરોના મોકડ્રીલ 
ગુજરાતભરની હોસ્પિટલોમાં મોકડ્રીલ યોજાઇ છે ત્યારે કોરોના વાયરસને લઈ અમદાવાદના સિવિલ હોસ્પિટલમાંમાં મોકડ્રીલનું આયોજન કરવામાં આવ્યું હતું, જેમાં ઓક્સિજન પ્લાન્ટ, વેન્ટિલેટર અને દવાના સ્ટોકનું નિરીક્ષણ સિવિલ હોસ્પિટલના સુપ્રિટેન્ડેન્ટ અને અધિકારીઓએ નિરીક્ષણ કર્યું હતું. અસારવાના ધારાસભ્ય દર્શના વાઘેલા પણ મોકડ્રીલ સમય હાજર રહ્યાં હતાં. કોરોના વાયરસની સામે સિવિલ હોસ્પિટવની તૈયારીઓનો તંત્રએ નિરીક્ષણ કર્યું હતું.

પૂનમ માડમની હાજરીમાં મોકડ્રીલનું આયોજન
કોરોના વાયરસની તૈયારીઓને લઈ જામનગરના જી જી હોસ્પિટલમાં પણ મોકડ્રિલ યોજાઈ છે. આ મોકડ્રિલમાં હોસ્પિટલની વિવિધ સુવિધાનું નિરીક્ષણ કરવામાં આવ્યું છે. સાંસદ પૂનમ માડમ પણ મોકડ્રીલના સમય હાજર રહ્યાં હતાં. જે નિરીક્ષણમાં કોરોનાને પહોચી વળવા જી. જી હોસ્પિટલ સંપૂર્ણ તૈયારી છે તેવું જાણવા મળ્યું છે. જે સમય સાંસદ પૂનમ માડમે જણાવ્યું કે, આપણી વેક્સિન કોરોના સામે લડવામાં માટે સક્ષમ છે, તેમણે કહ્યું કે, ઓક્સિજન પ્લાન્ટ પણ કાર્યરત છે.

આણંદમાં 4 આરોગ્ય કેન્દ્રો પર મોકડ્રિલ યોજાઈ
આણંદ જિલ્લામાં 4 આરોગ્ય કેન્દ્રો પર કોવિડ મોકડ્રિલ યોજવામાં આવી છે. આણંદ જનરલ હોસ્પીટલ ખાતે 85 જેટલા બેડ તૈયાર કરવામાં આવ્યાં છે. તમામ બેડ પર ઑક્સિજન સપ્લાયની ચકાસણી કરવામાં આવી છે. હોસ્પિટલ ખાતે 500 લીટર પ્રતી મિનીટની ક્ષમતાનો ઓક્સિજન પ્લાન્ટ પણ કાર્યરત છે. પ્લાંટ સિવાય લિકવિડ ઑક્સિજનના સિલિન્ડર પણ તૈયાર છે તેમજ નર્સિંગ સ્ટાફ અને ડોક્ટરને વિશેષ તાલીમ આપવામાં આવી છે. આણંદ શહેરમાં જનરલ હોસ્પિટલ ખાતે કોવિડ ટેસ્ટિંગ સેન્ટર પણ કાર્યરત કરાયું છે. જિલ્લામાં હાલ એકપણ કોરોના કેસ નોંધાયો નથી. કોરોનાને લઈ સ્થિતિ બગડે તો તંત્ર સજ્જ હોવાનો દાવો કર્યો છે

ગોધરામાં સિવિલમાં પણ મોકડ્રીલ યોજાઈ
સમગ્ર રાજ્યમાં હોસ્પિટલોની સુવિધાઓની ચકાસણી માટે મોકડ્રીલ આયોજન કરવામાં આવ્યું છે ત્યારે ગોધરાની સિવિલ હોસ્પિટલની ધારાસભ્ય સી કે રાઉલજીએ મુલાકાત લીધી છે. ઓક્સિજન પ્લાન્ટ અને અન્ય સુવિધાનું નિરીક્ષણ કર્યુ છે. હોસ્પિટલનું નિરીક્ષણ કર્યા બાદ સી કે રાઉલજીએ જણાવ્યું કે, સંભવિત કોવિડની સ્થિતિને પહોંચી વળવા સરકાર તૈયાર છે અને હોસ્પિટલમાં ખૂટતી જરૂરિયાત પૂર્ણ કરવા સરકાર કટીબદ્ધ છે.