ક્રાકચના બૃહદગીર વિસ્તારમાં ધારાસભ્યએ સિંહ સાથે લીધી સેલ્ફી, આ મામલે અગાઉ અનેક સેલિબ્રિટીને થયો છે દંડ
ગીરમાં વનવિભાગના નિયમોનું MLAએ કર્યું ઉલ્લંઘન
ધારાસભ્ય પ્રતાપ દૂધાતની સિંહો સાથેની સેલ્ફી વાયરલ
વન વિભાગના નિયમ પ્રમાણે સિંહ સાથે સેલ્ફી લેવા પર છે પ્રતિબંધ
અમરેલીના સાવરકુંડલાના ધારાસભ્ય પ્રતાપ દૂધાતની સિંહો સાથેની સેલ્ફી વાયરલ થતાં વિવાદમાં આવ્યા છે.બૃહદ ગીરમાં 4 સિંહો સામે ઉભા રહીને સેલ્ફી ખેંચતા વનવિભાગના નિયમોનું સરેઆમ ઉલ્લંઘન કર્યું છે. આપને જણાવી દઈએ કે વન વિભાગના નિયમ પ્રમાણે સિંહ સાથે સેલ્ફી લેવા પર પ્રતિબંધ છે.સિંહ સાથેની સેલ્ફી મામલે અગાઉ અનેક સેલિબ્રિટીને દંડ થયો છે.
ક્રાકચના બૃહદગીર વિસ્તારમાં ધારાસભ્યએ આ સેલ્ફી ફોટો લીધો હોવાની પ્રાથમિક માહિતી મળી છે.
આ મામલે અગાઉ અનેક સેલિબ્રિટીને થયો છે દંડ
વન વિભાગ દ્વારા ધારાસભ્ય પ્રતાપ દૂધાત સામે હજુ સુધી કોઈ એક્શન એટલે કે કોઈ દંડાત્મક કાર્યવાહી થઈ નથી. રાજ્યના વન વિભાગે ગીરના જંગલમાં સિંહ સાથે સેલ્ફી લેવા પર પ્રતિબંધ મુક્યો છે. ગીરને નો સેલ્ફી ઝોન જાહેર કરાતા જો કોઈ સેલ્ફી લેતા પકડાશે તો તેને દંડ થઈ શકે છે. હાલમાં ગીરના જંગલમાં સિંહોનું વેકેશન શરુ થાય તે પહેલા સિંહના દર્શન કરવા માટે મુલાકાતીઓનો ઘસારો વધ્યો છે.ધારાસભ્ય પ્રતાપ દૂધાત પણ પરિવાર સાથે ગીરની મુલાકાતે છે જે વખતે સિંહ જોતાં તેઓએ નિયમ વિરુદ્ધ જઈ ફોટો પાડતા વિવાદમાં સપડાયા છે.આ પહેલા રવિન્દ્ર જાડેજા અને તેની પત્ની રિવાબા ગીર અભયારણ્યમાં લીધેલા ફોટા અને સિંહ સાથેની સેલ્ફી મામલે વિવાદમાં આવી ચૂક્યા હતા
શા કારણે નો સિંહને લઈ નો સેલ્ફી ઝોન જાહેર કરાયો છે?
સામાન્ય રીતે ગીરમાં આવતા મુસાફરો સિંહને જોઈને તેની સાથે સેલ્ફી લેવાની લાલચ કરે છે અને સેલ્ફી વખતે જ સિંહ હુમલો કરે ત્યારે બેધ્યાન પ્રવાસીઓને ઈજા પહોંચે છે અથવા તો તેઓ જીવ ગુમાવી બેસે છે. આ કારણોને ધ્યાનમાં રાખીને ગીર-સોમનાથમાં સિંહોના માનવી પર વધતા હુમલા ઘટનાને લઈને ગીરને નો સેલ્ફી ઝોન જાહેર કરાયું છે. હવે આ વિસ્તારમાં કોઈ સેલ્ફી લેતા પકડાશે તો તેને દંડાત્મક કાર્યવાહી થઈ શકે છે.