સામાન્ય જનતા નિયમોનું ઉલ્લઘંન કરે તો સજા પણ નેતાઓ પોતે જો ગાઈડલાઇનનું ઉલ્લંઘન કરે ત્યારે કંઇ નહીં? MLA LALIT VASOYA એ સમર્થકોની હાજરીમાં ઉજવ્યો બર્થડે!
ઉપલેટામાં કોરોના ગાઇડલાઇનના ધજાગરા
ધારાસભ્ય લલિત વસોયાએ નિયમોના ઉડાવ્યા ધજાગરા
સર્કિટ હાઉસમાં સમર્થકો સાથે જન્મદિવસની કરી ઉજવણી
ધારાસભ્ય લલીત વસોયા વિવાદોમાં સપડાયા છે. એક તરફ રાજ્યમાં રોજના 10 હજાર કોરોના કેસ નોંધાઈ રહ્યા છે તો બીજી તરફ નેતાઓ હજુ બર્થ ડે સેલિબ્રેશનમાં વ્યસ્ત છે. ધારાસભ્ય લલીત વસોયાએ ઉપલેટામાં સમર્થકોની ભીડ વચ્ચે કેક કાપીને જન્મદિવસની ઉજવણી કરી હતી.
બર્થ ડે સેલિબ્રેશન
ધારાસભ્ય લલીત વસોયાણો બર્થ ડે હતો અને સમર્થકો તથા ચાહકો મોટી સંખ્યામાં સર્કિટ હાઉસ આવી પહોંચ્યા હતા. આ સમર્થકોની ભીડમાં માસ્ક અને સામાજિક અંતરના ધજાગરા ઊડ્યાં હતા અને બર્થ ડે સેલિબ્રેશન કરવામાં આવ્યું હતું.
ઉપલેટા-ધોરાજીમાં સતત વધી રહ્યાં છે કોરોનાના કેસ
ઉપલેટા-ધોરાજીમાં કોરોનાના કેસ સતત વધી રહ્યાં છે અને બીજી બાજુ રાજકીય મેળાવડા કે બર્થ ડે સેલિબ્રેશન જેવી બાબતો માટે લોકોને ભેગાં કરવા કેટલા અંશે યોગ્ય કહેવાય તે મોટો સવાલ છે.
પોતે જ ન પાળી સલાહ
થોડા દિવસ પહેલા જ ધારાસભ્ય લલીત વસોયાએ લોકોને નિયમો પાળવા લોકોને સલાહ આપી હતી. અને હવે પોતે જ તમામ નિયમોના છડેચોક ઉલ્લંઘન કરતાં નજરે પડ્યા હતા. આ ઘટનાથી લોકોમાં રોષ છે તો સામે સમર્થકો તેને યોગ્ય ગણાવી રહ્યા છે.
લલીત વસોયાનો જવાબ
MLA LALIT VASOYA એ સમર્થકોની હાજરીમાં બર્થડે ઉજવ્યો આ ઘટનાના કારણે લોકોએ સવાલ કર્યા હતા કે સામાન્ય જનતા નિયમોનું ઉલ્લઘંન કરે તો સજા પણ નેતાઓ પોતે જો ગાઈડલાઇનનું ઉલ્લંઘન કરે ત્યારે કંઇ નહીં?
આ ઘટના બાબતે VTV એ જ્યારે સવાલ પૂછ્યો તો તેમણે કહ્યું હતું કે ગાઈડલાઈનના નિયમોનો ભંગ નથી થયો માત્ર 45 સમર્થકો હાજર રહ્યા હતા. તેઓએ મારા બર્થડેની કેક કાપી હતી અને મારા રૂટિન કાર્યક્રમ વચ્ચે જ યુવા કાર્યકર્તાઓ કેક લઈ આવ્યા હતા તો અમે માત્ર કેક કાપી હતી.