ધોરાજીના MLA લલિત વસોયા ભાજપમાં જોડાઇ રહ્યા છે. તેવી તેજ ચર્ચાઑ વચ્ચે લલિત વસોયાના જન્માષ્ટમીની શુભેચ્છા આપતા પોસ્ટરમાં ક્યાંય કોંગ્રેસનો ઉલ્લેખ ન કરાતા અટકળો તેજ બની છે.
ધોરાજીના MLA લલિત વસોયા ફરી એકવાર ચર્ચામાં
લલિત વસોયાના પોસ્ટરમાં કોંગ્રેસનો ખેસ ગાયબ
વસોયાના પોસ્ટરમાંથી 'પંજો' ગાયબ!
ગુજરાત વિધાનસભાની ચૂંટણીના આગમનને લઇને રાજકીય ઉથલપાથલ સર્જાઇ રહી છે. તેવામાં વિધાનસભા ચૂંટણી પુર્વે ધોરાજીના કોંગ્રેસના ધારાસભ્ય લલિત વસોયા સહિતના અનેક ધારાસભ્યો કોંગ્રેસ છોડીને કેસરિયા કરે તેવી અટકળો કેટલાય સમયથી ચાલી રહી છે. આ અંગે જિલ્લા કોંગ્રેસ દ્વારા પ્રદેશ કોંગ્રેસ સુધી રિપોર્ટ પણ કરી દેવામાં આવ્યો છે તેવામાં ધોરાજીના MLA લલિત વસોયા ફરી એકવાર ચર્ચાના ચકડોળે ચડયા છે. લલીત વસોયાના પોસ્ટરમાંથી 'પંજો' ગાયબ થતાં ફરી અટકળોનો દૌર જામ્યો છે.
જન્માષ્ટમીની શુભેચ્છા આપતા પોસ્ટરમાં કોંગ્રેસનો ઉલ્લેખ નહીં
તાજેતરમાં જ કોંગી ધારાસભ્ય લલિત વસોયા દ્વારા સર્વ રોગ નિદાન કેમ્પ યોજાયો હતો. જેમાં ભાજપના સાંસદ રમેશ ધડુક અને પૂર્વ રાજ્યપ્રધાન જયેશ રાદડિયાએ હાજરી આપી હતી. આ ઉપરાંત ભાજપ તરફના ઝુકાવને લઇને ધોરાજીના કોંગ્રેસના MLA લલિત વસોયા અનેક વખત ચર્ચામાં આવ્યા છે. તેવામાં લલિત વસોયાએ અટકળોને વધુ મજબૂત બનાવી છે જેમાં કેમ્પમાં માત્ર ભાજપના જ સાંસદ-ધારાસભ્યને તેડાવનારા લલિત વસોયાએ જન્માષ્ટમીની શુભેચ્છા પાઠવતા પોસ્ટરોમાંથી પણ કોંગ્રેસના નિશાનનો છેદ ઉડાવી દીધો છે. નિશાન ઉપરાંત કોંગ્રેસના ખેસનું પણ અસ્તિત્વ પોસ્ટરમાં ન જોવા મળતા ચર્ચાએ જોર પકડયું છે.
પોસ્ટરમાંથી પંજો ગાયબ થતા અનેક તર્ક-વિતર્ક
ધારાસભ્ય લલિત વસોયાએ લોકોને જન્માષ્ટમીના તહેવારોની શુભેચ્છા આપતા પોસ્ટરો ઠેકઠેકાણે લગાવ્યા છે. આ પોસ્ટરોમાં તેમણે કયાંય પણ ન તો કોંગ્રેસના ધારાસભ્ય તરીકેનો ઉલ્લેખ કરાયો જે ન તો પક્ષના નિશાન પંજો પણ ઉલ્લેખ કરાયો નથી.આ પોસ્ટરોને પગલે કોંગી ધારાસભ્ય પક્ષપલ્ટો કરશે તેવી અટકળો ફરી જોર પકડવા લાગી છે.