રાજનીતિ / ધારાસભ્ય પદ બચાવવા આ હથિયારનો ઉપયોગ કરશે અલ્પેશ ઠાકોર!

OBCના હક્કો માટે લડવાની વાતો અલ્પેશ ઠાકોરે તો ખુબ કરી હતી. પરંતુ હવે જ્યારે કોંગ્રેસ તેમના પર કાર્યવાહી કરવા જઈ રહી છે ત્યારે આ OBC સમાજને અલ્પેશ ઠાકોર ઢાલ બનાવી રહ્યાં છે.

અલ્પેશ ઠાકોરે બનાસકાંઠામાં પોતાના ઉમેદવારને લોકસભા ચૂંટણીમાં ઉભો રાખ્યો અને તેમના માટે પ્રચાર પણ કર્યો હતો. કોંગ્રેસ સામે ખુલ્લેઆમ બંડ પોકાર્યા પછી હવે આ નેતા રોજ નવા નિવેદનો કરી રહ્યાં છે. હવે અલ્પેશ કહી રહ્યાં છે કે મારી સામે તેમને જે પગલા લેવા હોય તે લે. હું મારું ધારાસભ્ય પદ બચાવવા માટે સંપૂર્ણ પ્રયત્ન કરીશ.

કોંગ્રેસ ગુજરાતમાં વેરવિખેર છે અને શિસ્ત પાલન માટે પ્રયત્ન કરી રહી છે. તેવા સમયે અલ્પેશ ઠાકોરના ખુલ્લા બળવા પછી તેની સામે પગલા લેવા માટે મન બનાવી રહી છે. તો, કોંગ્રેસ પક્ષ તરીકે એ પણ જોઈ રહી છે કે કોઈ સમાજનું અહિત ન થાય અને અલ્પેશ ઠાકોર કોંગ્રેસના નિર્ણયનો કોઈ દુરઉપયોગ ન કરે.

અલ્પેશ ઠાકોરે ગરીબોની વાત તો ખૂબ કરી, તેમનું કેટલું ભલુ થયું તે બિચારા ગરીબોને ખબર પરંતુ જ્યારે હવે કોંગ્રેસ પગલા લેવા જઈ રહી છે ત્યારે એ જ ગરીબો અલ્પેશ માટે ઢાલ બની જાય તો નવાઈ નહી.