અમદાવાદ: ભારત બંધની અસર અમદાવાદમાં ખાસ જોવા મળી હતી. સવારથી જ અમદાવાદ શહેરમાં કોંગ્રેસી નેતાઓ અને કાર્યકર્તાઓ બંધ કરાવવા માટે માર્ગો પર ઉતરી પડ્યા હતા અને દુકાનો અને બજારો બંધ કરાવવા માટે નીકળ્યા હતા.
તો કેટલાક સ્થળોએ બળજબળી પણ કરી. ક્યાંક ઘર્ષણ થયું. તો ક્યાંક કાર્યકર્તાઓની અટકાયત થઈ. રોડ પર ચક્કાજામ કરવા કાર્યકર્તાઓએ ટાયર સળગાવ્યા. તો શાળા અને કોલેજો પણ બંધ કરાવી. એટલું જ નહીં એસ.ટી. અને એએમટીએસની બસો પણ અટકાવી હતી.
આ સાથે કેટલાક સ્થળો પર એસ.ટી. બસના ટાયરની હવા કાઢી નાખીને વિરોધ નોંધાવ્યો હતો. તો રિલીફ રોડ પાસે કોંગ્રેસ પ્રદેશ પ્રમુક અમિત ચાવડા બંધ કરાવવા માટે નીકળ્યા હતા. તે દરમિયાન અમિત ચાવડાની પોલીસે અટકાયત કરવામાં આવી હતી. અમદાવાદના કાલુપુર વિસ્તારમાં પણ બંધની અસર જોવા મળી હતી. ભારત બંધના એલાનને પગલે કાલુપુરના વેપારીઓએ સ્વયંભુ દુકાનો બંધ રાખી હતી.
કાલુપુરથી ગીતા મંદિર રોડ પર સજ્જડ બંધ જોવા મળ્યો. તો ઘંટાકર્ણ માર્કેટ અને ક્લોથમાર્કેટમાં પણ વેપારીઓએ પોતાની દુકાનો બંધ રાખી હતી. કાલુપુરથી આસ્ટોડિયા દરવાજા સુધીના રસ્તા પણ મોટાભાગની દુકાનો બંધ જોવા મળી. કાલુપુરમાં માર્કેટ બંધ હોવાથી રસ્તા પર લોકોની ઓછી અવર જવર જોવા મળી હતી. બંધના એલાનને ધ્યાનમાં રાખીને કોઈ અનિચ્છનીય બનાવ ન બને તે માટે કાલુપુર વિસ્તારમાં પણ પોલીસનો ચુસ્ત બંદોબસ્ત જોવા મળ્યો.
આપને જણાવી દઇએ કે અમિત ચાવડાની સાથે સાથે લાલદરવાજા વિસ્તારમાંથી કોંગ્રેસના કાર્યકરોની પણ અટકાયત કરવામાં આવી. આ દરમિયાન કોંગી કાર્યકર્તાઓ અને પોલીસ વચ્ચે ઘર્ષણ થયું. એટલું જ નહીં મહિલા કાર્યકર્તાઓ પણ બંધ કરાવવા માટે માર્ગો પર ઉતરી હતી અને મહિલા કાર્યકર્તાઓ અને પોલીસ વચ્ચે ઘર્ષણ થયા બાદ મહિલા કાર્યકર્તાઓની અટકાયત કરી લેવામાં આવી હતી.
ઉલ્લેખનીય છે કે છેલ્લા 16 દિવસમાં સતત પેટ્રોલ અને ડીઝલના ભાવમાં વધારો થઈ રહ્યો છે. છેલ્લા 16 દિવસમાં પેટ્રોલના ભાવમાં 2 રૂપિયા 85 પૈસાનો વધારો થયો છે.
જ્યારે છેલ્લા 15 દિવસમાં ડીઝલના ભાવમાં 3 રૂપિયા 60 પૈસાનો વધારો થયો છે. ત્યારે ભાવનગર જિલ્લામાં ભાવ 80 પહોંચ્યો હતો. સતત 16 દિવસથી સતત વધી રહેલા પેટ્રોલ-ડીઝલના ભાવ મામલે વિપક્ષો હરકતમાં આવી ગયા છે.
પેટ્રોલ અને ડીઝલના ભાવમાં થઈ રહેલા ભાવ વધારાના વિરોધમાં આજે કોંગ્રેસે ભારત બંધનું એલાન આપ્યું છે. કોંગ્રેસનો દાવો છે કે તેની સાથે અન્ય 21 વિપક્ષી પાર્ટીઓએ ટેકો આપ્યો છે. છેલ્લા 6 મહિનામાં આ ત્રીજી વખત ભારત બંધનું એલાન આવ્યું છે.