મિતાલી રાજ – ઓળખ આપવાની હવે ઓલમોસ્ટ જરૂર નથી રહી. નામ પડે એટલે લોકોને ખ્યાલ આવી જ જાય કે હા, મહિલા ક્રિકેટર છે. ઇનફેક્ટ એવું કહી શકાય કે મિતાલીએ ક્રિકેટ જગતમાં જ નહીં પણ સામાન્ય લોકોમાં પોતાની ઓળખ બનાવવામાં તો સફળતા મેળવી જ છે પણ સાથે જ ભારતીય મહિલા ક્રિકેટ ટીમને ઓળખ અપાવવામાં કે લોકોને મહિલા ક્રિકેટ મેચ જાેતાં કરવામાં પણ મહત્ત્વની ભૂમિકા ભજવી છે.
જાે તમે આજની તારીખે લોકોને એમ પૂછો કે ભારતીય મહિલા ક્રિકેટરોનાં નામ આપો તો બીજાં બધાં નામ યાદ આવે કે ના આવે પણ મિતાલી રાજનું નામ તો મહદંશે લોકોના મોઢે સાંભળવા મળશે જ અને હવે આ જ નામ વધારે જાણીતું બનશે ફિલ્મ થકી. વધ્યા-ઘટ્યા લોકો, જેઓ મિતાલી રાજના નામથી અપરિચિત છે તેઓ ફિલ્મ થકી મિતાલી રાજને ઓળખતા થઇ જશે.
મિતાલી રાજના જીવન પર ફિલ્મ બનવા જઇ રહી છે. ફિલ્મનું નામ છે - ‘શાબાશ મિથુ’. તાપસી પન્નુ આ ફિલ્મમાં મિતાલી રાજનું પાત્ર ભજવવાની છે, જાેકે આપણે ફિલ્મની વાત નથી કરવાની પણ મિતાલી રાજની વાત કરવાની છે. જ્યારે ખેલજગતમાંથી કોઇ વ્યિક્ત વિશેષ પર ફિલ્મ બને છે ત્યારે તે સાવ અમસ્તા જ નથી બની જતી. એ વ્યક્તિએ સ્વાભાવિક રીતે એવું કોઇ કામ કર્યું હોય છે, જે લોકોનું ધ્યાન ખેંચે છે. ચાહે એ મિલ્ખા સિંઘ હોય, મેરી કોમ હોય કે પછી પાનસિંહ તોમર હોય.
મિતાલી રાજના કેસમાં એવું છે કે તેણે ભારતીય ક્રિકેટ ટીમને એક અલગ જ ઊંચાઇ પર પહોંચાડી છે. પહેલાં પણ ભારતીય મહિલા ક્રિકેટ ટીમ કાર્યરત હતી જ. ડાયના એડુલજી, શાંતા રંગાસ્વામી, અંજુમ ચોપડા વગેરે વગેરે મહિલા ક્રિકેટરો છે. તેમણે પણ ભારતની મહિલા ક્રિકેટ ટીમને ક્રિકેટ જગતમાં જાણીતી કરવામાં મહત્ત્વનું યોગદાન આપ્યું છે પણ મિતાલી આ બધી મહિલા ક્રિકેટરોમાં અલગ પડે છે, કારણ કે તેણે મહિલા ક્રિકેટ ટીમને માત્ર ક્રિકેટ જગત જ નહીં પણ દેશમાં સામાન્ય લોકોમાં પણ મહિલા ક્રિકેટને લોકપ્રિય બનાવવામાં અગત્યની ભૂમિકા ભજવી છે. લોકોને મહિલા ક્રિકેટ તરફ આકર્ષ્યા છે. આંતરરાષ્ટ્રીય મહિલા ક્રિકેટ જગતમાં ભારતીય મહિલા ક્રિકેટ ટીમને ઓળખ અને સ્થાન અપાવવામાં સફળતા મેળવી છે. તે પહેલી ભારતીય મહિલા ક્રિકેટર છે, જેણે આંતરરાષ્ટ્રીય મહિલા ક્રિકેટ જગતમાં વીસ વર્ષ પૂરાં કર્યાં છે. ટૂંકમાં તે છેલ્લાં વીસ વર્ષથી ક્રિકેટ ટીમ સાથે સંકળાયેલી છે.
મિતાલીએ વર્ષ ૧૯૯૯માં ભારતીય ટીમમાં સ્થાન મેળવ્યું હતું. મિતાલી એકમાત્ર એવી મહિલા ક્રિકેટર છે, જે એક દિવસ આંતરરાષ્ટ્રીય ક્રિકેટ મેચમાં વીસ વર્ષથી સક્રિય છે. ૨૦૫ કરતાં પણ વધુ એક દિવસીય આંતરરાષ્ટ્રીય મેચ રમી છે. ક્રિકેટના ટી-૨૦ ફોર્મેટમાંથી નિવૃત્તિ જાહેર કરનારી મિતાલીએ વર્ષોથી ભારતીય મહિલા ક્રિકેટ ટીમની બાગડોર સંભાળી અને તેની કેપ્ટનશિપ હેઠળ ભારતીય મહિલા ક્રિકેટ ટીમ એક નવી ઊંચાઇ પર પહોંચી.
મિતાલીનો જન્મ વર્ષ ૧૯૮૨માં રાજસ્થાનના જાેધપુરમાં થયો છે. તામિલ પરિવારમાંથી આવતી મિતાલીએ દસ વર્ષની ઉંમરે ક્રિકેટ રમવાનું શરૂ કર્યું હતું સત્તર વર્ષની ઉંમરે ભારતીય ક્રિકેટ ટીમમાં સ્થાન મેળવ્યું હતું. મિતાલીની કેપ્ટનશિપ હેઠળ જ ભારતીય મહિલા ક્રિકેટ ટીમ વર્ષ ૨૦૦૫માં વિમેન્સ વર્લ્ડ કપની ફાઇનલ સુધી પહોંચી હતી, જાેકે વર્લ્ડ કપ જીતવામાં નિષ્ફળ રહી હતી. એ જ રીતે વર્ષ ૨૦૧૭માં પણ ભારતીય મહિલા ક્રિકેટ ટીમ વર્લ્ડ કપની ફાઇનલમાં પહોંચી હતી
વર્ષ ૨૦૦૩માં અર્જુન એવોર્ડ જીતનારી મિતાલી રાજ વર્ષ ૨૦૧૩માં એક દિવસીય આંતરરાષ્ટ્રીય મહિલા ક્રિકેટ જગતમાં પ્રથમ ક્રમાંક મેળવી ટોચની મહિલા ક્રિકેટર બની. ટી-૨૦ ફોર્મેટમાંથી નિવૃત્તિ જાહેર કરનારી મિતાલી હાલમાં વર્ષ ૨૦૨૧માં આયોજિત થનારા મહિલા વર્લ્ડ કપ પર ધ્યાન કેન્દ્રિત કરી રહી છે અને તૈયારી પણ આરંભી દીધી છે.•