Coronavirus / કોરોના વાયરસ પર આવેલો આ રિપોર્ટ ભારત માટે સારા સમાચાર લાવ્યો, પરંતુ હળવાશથી ન લેતા

• અત્યાર સુધીના આંકડાઓ મુજબ ગરમ અને ભેજ વાળી આબોહવામાં કોરોનાના ફેલાવો પ્રમાણમાં ધીમો 
• જો કે હજુ માહિતી અધૂરી હોવાની વૈજ્ઞાનિકોની ચેતવણી

નોંધનીય છે કે આ સંશોધન માટે કોરોના વાયરસના વૈશ્વિક કેસની સંખ્યા અને ભૌગોલિક પ્રદેશોના તાપમાન અને ભેજને પેરામીટર તરીકે લેવામાં આવ્યા હતા. 

શું કહેવામાં આવ્યું છે રીસર્ચમાં?

આ સંશોધનમાં એવું પણ નોંધવામાં આવ્યું કે ૨૨મી માર્ચ સુધીના કોરોના વાયરસના ૯૦% કેસ એવા પ્રદેશોમાં થયા છે જ્યાં તાપમાન ૩ થી ૧૭ ડિગ્રી સેલ્સીયસ રહેતું હોય. નોંધનીય છે કે ભારતના મોટાભાગના વિસ્તારોમાં આ તાપમાન કરતા વધુ તાપમાન રહે છે. 

વળી આ એવા ક્ષેત્રો છે જ્યાં ભેજ પ્રતિ ઘન મીટર ૪ થી ૯ ગ્રામ રહે છે. જે ક્ષેત્રોમાં જાન્યુઆરી, ફેબ્રુઆરી અને માર્ચમાં ભેજ ૯ ગ્રામ પ્રતિ ઘન મીટર થી વધુ રહ્યો અને સરેરાશ તાપમાન ૧૮ ડિગ્રી સેલ્સીયસ થી વધુ રહ્યું છે ત્યાં કોરોના વાયરસના ૬% થી પણ ઓછા કેસ છે. 

આ ઉપરથી એમ પણ જાણવા મળ્યું કે જે એશિયન દેશોમાં હાલ ચોમાસું આવી રહ્યું છે તે દેશો પણ કોરોના વાયરસથી પ્રમાણમાં સુરક્ષિત રહેશે તેવી સંભાવના છે કારણ કે આ સમયે ભેજનું પ્રમાણ ૧૦ ગ્રામ પ્રતિ ઘન મીટર હવા જેટલું હોય છે. ઉલ્લેખનીય છે કે અમેરિકાના પણ દક્ષિણના પ્રમાણમાં ગરમ રાજ્યો જેવા કે ટેક્સાસ, ન્યુ મેક્સિકો, એરિઝોના વગેરેમાં કોરોના વાયરસ નિયંત્રણમાં છે જયારે ન્યુ યોર્ક જેવા ઠંડા પ્રદેશોમાં તે બેકાબૂ બન્યો છે. 

ભારત, પાકિસ્તાન, ઇન્ડોનેશિયા, આફ્રિકાના દેશો જેવા દેશોમાં ઓછા કેસ નોંધાયા છે જેની એક દલીલ એવી કરવામાં આવે છે કે આ દેશોમાં ટેસ્ટની સુવિધા યુરોપ જેટલી સારી ન હોવાથી કેસ બહાર નથી આવ્યા. આ દલીલ સામે રીસર્ચ કરનારાઓ એ એવો તર્ક આપ્યો છે કે સિંગાપોર, UAE અને સાઉદી અરેબિયામાં US, ઇટાલી અને બીજા યુરોપિયન દેશો જેટલા જ પ્રમાણમાં ટેસ્ટ થયા છે પણ ત્યાં પણ કોરોના વાયરસ કાબૂમાં છે જે આ સંશોધનને વધુ મજબૂત પુરાવો આપે છે. આ પૈકી ઘણા દેશોમાં તો મજબૂત લોક ડાઉન પણ નથી કરવામાં આવ્યા અને ઘણા દેશો ટ્રાવેલ હબ છે જ્યાં છેલ્લા ૨ મહિનામાં લાખો લોકો આવી જઈ ચુક્યા છે ત્યાર પછી પણ ત્યાં સ્થિતિ સારી લાગી રહી છે. 

હજુ ડેટા અધુરો છે વૈજ્ઞાનિકોની ચેતવણી

આ ડેટા અત્યારે ઉપલબ્ધ માહિતી મુજબનો છે જ્યારે સૌ જાણે છે કે ઘણા બધા કેસ નોંધવામાં આવ્યા વિના જ મટી ગયા છે અથવા અવસાન પામ્યા છે. આ ઉપરાંત આ પરિક્ષણમાં વાયરસ કેવી રીતે મ્યુટેટ થાય છે, કેવી રીતે તેમાં ફેરફાર થાય છે, ચેપ એકબીજાના સંપર્કમાં આવીને કેવી રીતે ફેલાય છે તેનો ઉલ્લેખ કરવામાં આવ્યો નથી. 

વૈજ્ઞાનિકોએ સ્પષ્ટ શબ્દોમાં જણાવ્યું છે કે આ પરિક્ષણનો અર્થ એવો બિલકુલ નથી કે કોરોના વાયરસ ગરમ પ્રદેશોમાં નહિ ફેલાય એવી માની લેવામાં આવે. સરકાર અને WHO દ્વારા આપવામાં આવેલ ગાઈડલાઈન્સ સૌ કોઈએ ફરજિયાત પાળવાની તો રહેશે જ.