મધ્ય પ્રદેશની ભોપાલની મહિલા ક્રાઈમ શાખાએ રેપના આરોપી મિર્ચી બાબાની ધરપકડ કરી લીધી છે. કોંગ્રેસના શાસન દરમિયાન મિર્ચી બાબાને મંત્રી પદનો દરજ્જો પણ મળી ચુક્યો છે. આપને જણાવી દઈએ કે, ભોપાલના રહેવાસી મહિલાએ બાબા પર રેપનો આરોપ લગાવ્યો હતો. પ્રાપ્ત જાણકારી અનુસાર જોઈએ તો, મહિલા જાન્યુઆરી મહિનામાં બાળક થવાની ફરિયાદ લઈને વૈરાગ્યાનંદ ગિરીને મળી હતી. ત્યાર બાદ ફરી વૈરાગ્યાનંદ ઉર્ફ મિર્ચી બાબાએ તેને પોતાની પાસે બોલાવી હતી અને પ્રસાદમાં ભભૂતિ ભેળવી ખવડાવી દીધો હતો. મહિલાએ આરોપ લગાવ્યો હતો કે, ભભૂતિ ખાઈને તે બેભાન થઈ ગઈ હતી અને ત્યાર બાદ તેની સાથે રેપ કરવામાં આવ્યો. મિર્ચી બાબા પર કલમ 376, 506 અને 342 અંતર્ગત ફરિયાદ કરવામાં આવી છે.
મહિલા ક્રાઈમ બ્રાન્ચે નોંધેલી ફરિયાદ મુજબ મહિલાને જ્યારે પોતાની સાથે ઘટનાની જાણકારી મળી તો તેણે વિરોધ કર્યો. ત્યારે વૈરાગ્યાનંદ ગિરી ઉર્ફ મિર્ચી બાબાએ મહિલાને જાનથી મારી નાખવાની ધમકી આપી હતી.
ગ્વાલિયરમાંથી કરી ધરપકડ
મહિલાએ આરોપ લગાવતા કહ્યું કે, વૈરાગ્યાનંદ ઉર્ફ મિર્ચી બાબાના ડર અને લોકલાજની બીકે મહિલાએ તાત્કાલિક ફરિયાદ નોંધાવી નહીં. તે સોમવારે પીડિત મહિલાએ ક્રાઈમ બ્રાન્ચમાં જઈને પોતાની આપવિતી જણાવી હતી. ત્યાર બાદ પોલીસે રાતના 9.00 કલાકે ફરિયાદ લીધી અને તાત્કાલિક ટીમ ગ્વાલિયર રવાના થઈ ગઈ.
કોર્ટમાં રજૂ કરશે પોલીસ
જો કે, આ અગાઉ ગ્વાલિયર પોલીસને સૂચના આપી દેવામાં આવી હતી. જેના પર મોડી રાતે મિર્ચી બાબાની ધરપકડ થઈ હતી. ત્યાર બાદ મહિલા ક્રાઈમ શાખા અને ક્રાઈમ બ્રાન્ચની સંયુક્ત ટીમ ગ્વાલિયર પહોંચી, જ્યાંથી મિર્ચી બાબાને લઈને હવે કોર્ટમાં રજૂ કરવામાં આવશે.