એ હાલો... / VIDEO: ગુજરાતમાં ગરબે ઘૂમ્યા મીરાબાઈ ચાનુ, દેશની ગૌરવ વધારનાર દીકરીઓને જોવા ઉમટી ભીડ

મીરાબાઈ ચાનુ અને ભવાની દેવીને લાગ્યો ગરબાનો રંગ
ગાંધીનગરમાં મન મૂકીને ગરબે ઘુમ્યા
નેશનલ ગેમ્સમાં ભાગ લેવા આવ્યા છે ગુજરાત 

ગરબા ગુજરાતીઓની ઓળખ છે પરંતુ હવે ગરબાની આ ઓળખ બીજા દેશોમાં પણ ગુજરાતીઓને પ્રખ્યાત કરી રહી છે. કોરોના કાળ બાદ રાજ્યભરમાં યોજાઈ રહેલા મોટા ગરબાઓમાં ગરબારસિકો મન મૂકીને ગરબે ઘૂમી રહ્યા છે. નવલી નવરાત્રીને લોકો ઉમંગ-ઉત્સાહ સાથે ઉજવી રહ્યા છે. ત્યારે ગઈકાલે એટલે કે પાંચમા નોરતે દેશનું ગૌરવ એવા મીરાબાઈ ચાનુ અને ભવાની દેવી ગરબાના રંગમાં રંગાયા હતા. બંનેએ ગાંધીનગર કલ્ચર ફોરમ ખાતે ગરબાની રમઝટ બોલાવી હતી. મીરાબાઈ ચાનુ અને ભવાની દેવીએ ગુજરાતનું ગૌરવ એવા ગરબાનો આનંદ માણ્યો હતો. 

ગાંધીનગરમાં બોલાવી ગરબાની રમઝટ
વાસ્તવમાં મીરાબાઈ ચાનુ અને ભવાની દેવી 36માં નેશનલ ગેમ્સમાં ભાગ લેવા ગુજરાત પહોંચ્યા હતા. પોત-પોતાની ઈવેન્ટ પૂર્ણ થયા બાદ બંને ગરબા રમવા પહોંચ્યા હતા અને ગાંધીનગરમાં મન મૂકીને ગરબા રમ્યા હતા. તેમને ગરબા રમતા જોવા માટે ફેન્સ ઉમટી પડ્યા હતા. 

જુઓ વીડિયો

પીએમ મોદીએ કરાવ્યો હતો પ્રારંભ
આપને જણાવી દઈએ કે, વડાપ્રધાન નરેન્દ્ર મોદીએ પોતાના 2 દિવસના ગુજરાતના પ્રવાસ દરમિયાન અમદાવાદના નરેન્દ્ર મોદી સ્ટેડિયમમાં 36માં નેશનલ ગેમ્સનો આરંભ કરાવ્યો હતો. જેમાં વેઈટલિફ્ટર મીરાબાઈ ચાનુએ ગાંધીનગરમાં નેશનલ ગેમ્સ અંતર્ગત યોજાયેલી વેઈટલિફ્ટિંગની ઈવેન્ટમાં ગોલ્ડ મેડલ જીતીને શાનદાર શરૂઆત કરી હતી. 

મીરાબાઈ ચાનુ અને ભવાની દેવીએ જીત્યો ગોલ્ડ
મીરાબાઈ ચાનુએ મહિલાઓની 49 કિગ્રા વર્ગમાં કુલ 191 કિગ્રા વજન ઉઠાવીને ગોલ્ડ મેડલ જીત્યો હતો,  જ્યારે ભારતની એકમાત્ર ઓલિમ્પિયન તલવાર બાજ ભવાની દેવીએ સેબર ઈવેન્ટમાં ગોલ્ડ મેડલ જીત્યો હતો. તેમણે ફાઈનલમાં જગમીત કૌરને 15-3થી હરાવ્યા હતા.