રાજસ્થાનના અલવરમાં 16 વર્ષીય સગીરા પર ભયાનક ગેંગરેપનો એક બનાવ બન્યો છે. અલવર જિલ્લાના કિશનગઢ બાસ ગામમાં આઠ છોકરાઓએ 16 વર્ષની સગીરા પર સામૂહિક દુષ્કર્મ આચર્યું હતું. એટલું જ નહીં પરંતુ આરોપીઓએ દુષ્કર્મનો વીડિયો બનાવીને પણ સોશિયલ મીડિયા પર વાયરલ કરી નાખ્યો હતો.
વીડિયો પોસ્ટ કરતા પહેલા પીડિતા પાસે પચાસ હજાર રુપિયા કઢાવ્યાં
આરોપીઓએ થોડા સમય પહેલા પીડિતા સાથે દુષ્કર્મ આચર્યું હતું અને તેને દુષ્કર્મનો વીડિયો વારંવાર દેખાડીને પૈસા કઢાવવામાં આવતા હતા. બદનામ થવાની બીકે પીડિતા અત્યાર સુધીમાં આરોપીઓને 50,000 રુપિયા આપી ચૂકી હતી પરંતુ આરોપીઓની માગ ચાલુ રહેતા તેણે હવે વધારે પૈસા આપવાની ના પાડી દીધી હતી આથી આરોપીઓએ તેનો વીડિયો સોશિયલ મીડિયા પર પોસ્ટ કરી દીધો હતો જે વાયરલ થયો હતો.
પીડિતાને એકાંત સ્થળે મળવા બોલાવીને 8 છોકરાઓએ કર્યો રેપ
પોલીસને આપેલી ફરિયાદમાં પીડિતાના ભાઈએ જણાવ્યું છે કે 31 ડિસેમ્બર 2021ના રોજ સાહિલ નામના મુખ્ય આરોપીએ તેની બહેનને ફોન કર્યો હતો. સાહિલે તેને ગોથરા વિસ્તારમાં મળવા બોલાવી હતી. સાહિલે કહ્યું કે તેની પાસે પીડિતાના કેટલાક અંગત ફોટોગ્રાફ્સ છે. જો તે મળવા નહીં આવે તો આ તસવીરો સોશિયલ મીડિયા પર વાયરલ કરી દેશે. ધમકી બાદ પીડિતા જ્યારે આરોપીએ જણાવેલી જગ્યા પર પહોંચી ત્યારે સાહિલ સહિત 8 યુવકો ત્યાં હાજર હતા. આરોપીઓએ વારાફરતી પીડિતા પર દુષ્કર્મ આચર્યું હતું અને વીડિયો બનાવી લીધો હતો. પીડિતાએ જણાવ્યું કે રેપ બાદ તે લગભગ એક કલાક સુધી ઘટના સ્થળે બેભાન અવસ્થામાં પડી રહી હતી.
પીડિતા પાસેથી પડાવી લીધા 50,000, વધારે ન આપ્યાં એટલે વીડિયો વાયરલ કર્યો
આ ઘટનાના થોડા દિવસ બાદ આરોપી સાહિલે પીડિતાને બ્લેકમેઇલ કરવાનું શરૂ કરી દીધું હતું. તે દરરોજ વીડિયો વાયરલ કરવાની ધમકી આપતો હતો અને તેની પાસે પૈસા માંગતો હતો. ધીરે ધીરે તેણે તેની પાસેથી 50,000 રૂપિયા લીધા હતા અને બાદમાં વધુ 2.5 લાખ રૂપિયા માંગ્યા હતા. જ્યારે પીડિતા 2.5 લાખ રૂપિયા ન આપી શકી તો આરોપીએ તેનો વીડિયો સોશિયલ મીડિયા પર શેર કર્યો હતો. પોલીસ હાલમાં આરોપીઓની શોધખોળ ચલાવી રહી છે.