બમ બમ ભોલે / જૂનાગઢમાં આજથી મિનિકુંભનો પ્રારંભ , સંતો-મહંતો દ્વારા ભવનાથ મહાદેવના મંદિરના શિખર ઉપર ધ્વજારોહણ કરાશે

• જૂનાગઢમાં આજથી પાંચ દિવસીય મહાશિવરાત્રીના મેળાનો પ્રારંભ
• આજે ભવનાથ મહાદેવના મંદિરના શિખર ઉપર થશે ધ્વજારોહણ
• જૂનાગઢમાં સંત-શ્રદ્ધાળુઓનું ઉમટશે મહેરામણ
• કોરોનાને કારણે 2 વર્ષથી નહતું થતું મેળાનું આયોજન

જૂનાગઢમાં આજથી મહાશિવરાત્રીના મેળાનો પ્રારંભ

બમ બમ‌ ભોલે... હર હર મહાદેવ હરના ગગનભેદી નાદ સાથે શુક્રવારથી મહા શિવરાત્રીના 5 દિવસીય મેળાનો પ્રારંભ થશે.મહાશિવરાત્રીની ઉજવણી 25 ફેબ્રુઆરીથી લઇને 1લી માર્ચ સુધી યોજાશે. જેમાં લાખ્ખોની સંખ્યામાં મહાદેવ ભક્તો જોડાશે. તેમજ  ભવનાથ મહાદેવના મંદિરના શિખર ઉપર વિવિધ અખાડા, આશ્રમોના સંતો- મહંતો, અધિકારી, પદાધિકારીઓની ઉપસ્થિતીમાં ભવનાથ મહાદેવને ધ્વજારોહણ કરાશે. બાદમાં તમામ અખાડા,આશ્રમોમાં પણ ધ્વજારોહણ સાથે મહા શિવરાત્રી મેળાની શરૂઆત થશે. 

કોરોનાને કારણે 2 વર્ષથી નહતું થતું મેળાનું આયોજન

તેમજ આજથી તળેટી વિસ્તારમાં 100થી વધુ અન્નક્ષેત્ર ધમધમતા થશે.આ સાથે જ અન્નક્ષેત્રો, ઉતારા મંડળો ધમધમતા થશે. ચારો તરફ શિવના નારા પણ ગુંજવા લાગશે. સાથે રાત્રિના ભજન, ભક્તિની પણ સરવાણી વહેશે. દરમિયાન કોરોનાના કારણે છેલ્લા 2 વર્ષથી લોકો-ભાવિકો માટે મેળો યોજાયો ન હતો. હાલ કોરોનાનો કહેર નબળો પડતાં  સરકારે કોરોનાની ગાઇડ લાઇન સાથે મેળાની છૂટ આપી છે. ત્યારે આ વર્ષે અગાઉના વર્ષો કરતા વધુ ભાવિકો ઉમટી પડશે તેવી સંભાવના વ્યકત થઇ રહી છે. ત્યારે આવનાર ભાવિકોની સુરક્ષા માટે જૂનાગઢ પોલીસ તંત્ર દ્વારા જડબેસલાક વ્યવસ્થા ગોઠવાઇ છે.