મલ્ટિલેવલ પાર્કિંગમાં વાહન પાર્ક કરનારને કાંકરિયા લઈ જવા મિની બસ કે ઈ-ઓટો?

મ્યુનિસિપલ કોર્પોરેશનના સત્તાવાળાઓ દ્વારા કાંકરિયા ખાતેના મલ્ટિલેવલ પાર્કિંગમાં વધુને વધુ વાહનચાલકો પોતાના વાહન પાર્ક કરે તે માટે છેક ઓગસ્ટ ર૦૧૮માં મલ્ટિલેવલ પાર્કિંગથી કાંકરિયા લેકફ્રન્ટના ગેટ સુધી ફ્રી બસ સર્વિસની યોજનાને વિચારણા હેઠળ લેવાઇ હતી.

આ યોજનામાં તંત્રે ચક્રો તો ગતિમાન કર્યાં છે પરંતુ પાર્કિંગ ધારકોને ફ્રી બસની સેવા પૂરી પાડવી કે પછી ઇ-ઓટોની વ્યવસ્થા આપવી તે બાબતે હજુ કોઇ નિર્ણય લેવાયો નથી.

શહેરમાં પાર્કિંગનો પ્રશ્ન હળવો કરવા સત્તાવાળાઓ દ્વારા પ્રારંભમાં રપ પે એન્ડ પાર્ક અને પછીના તબક્કામાં ૪૮ પે એન્ડ પાર્ક મળીને કુલ ૭૩ પે એન્ડ પાર્કમાં ર૦ ૯૮૪ ટુ વ્હીલર અને ૩ર૭૧ ફોર વ્હીલર મળીને કુલ ર૪ રપપ વાહન પાર્ક કરવાની વ્યવસ્થા ઊભી કરાઇ હતી પરંતુ પે એન્ડ પાર્કમાં તંત્રને સદંતર નિષ્ફળતા મળી છે કેમ કે આનો કોન્ટ્રાક્ટ લેવા કોઇ આગળ આવતું નથી.

બીજી તરફ ધૂળ ખાતા પડ્યા રહેલા કાંકરિયા મલ્ટિલેવલ પાર્કિંગમાં વધુને વધુ વાહનચાલકો વાહન પાર્ક કરે તે માટે પણ સત્તાધીશોએ ગત તા.૧૩ ઓગસ્ટ ર૦૧૮થી એક મહિના માટે ફ્રી પાર્કિંગ જેવા ગતકડા કર્યા હતા.

તે વખતે કાંકરિયા લેકફ્રન્ટની સામે આવેલા આ મલ્ટિલેવલ પાર્કિંગમાં લેકફ્રન્ટની ટિકિટ મેળવીને ત્યારપછી વાહનચાલકો મિની બસમાં બેસીને કાંકરિયા જઇ શકે તેવું આયોજન પણ વિચારણા હેઠળ લેવાયું હતું.

કાંકરિયા લેકફ્રન્ટ ખાતે દૈનિક દશથી બાર હજાર અને વીક એન્ડમાં વીસથી પચ્ચીસ હજાર સહેલાણીઓ ઊમટતા હોઇ મ્યુનિસિપલ તિજોરીને દર મહિને રૂ.ચાર લાખથી વધુની આવક થતી હોઇ કમિશનર વિજય નહેરા દ્વારા મલ્ટિલેવલ પાર્કિંગથી લેકફ્રન્ટ ગેટ સુધી ફ્રી બસ સર્વિસની બાબતને ગંભીરતાથી વિચારણા હેઠળ લેવાઇ હતી જેના કારણે બે બેટરી ઓપરેટેડ મિની બસ માટેના ટેન્ડર બહાર પડાયા હતા.

તંત્ર દ્વારા પ્રતિ નંગ રૂ.ર૯.૯૩ લાખની કિંમતની એક બસ મુજબ બે બસ માટે રૂ.૪૩.૮૬ લાખના ટેન્ડરને મંજૂરી પણ અપાઇ હતી. પરંતુ સ્ટેન્ડિગ કમિટીમાં કમિશનર નહેરાની ગેરહાજરીમાં બસ ખરીદીની દરખાસ્ત આવતા શાસકોએ નિર્ણય બાકી રાખ્યો છે.

પાર્કિંગ ટુ ગેટ માટે વીસ ઉતારુની ક્ષમતા ધરાવતી બે મિની બસને બદલે ચાર ઇ-ઓટો દોડાવવાનો વિકલ્પ પણ હાલના તબક્કે વિચારણા હેઠળ છે.