અજીબો ગરીબ કિસ્સો / દિમાગનું દહીં કરતી ઘટના, પાલતૂ શ્વાને ગોળી મારીને યુવકને મારી નાખ્યો, કેમ આમ બન્યું?

• તુર્કીના સૈમસન પ્રાંતની આશ્ચર્યજનક ઘટના
• કૂતરાનો પગ ટ્રીગર પર પડ્યો અને યુવકનું મોત નિપજ્યું
• યુવક 10 દિવસ પહેલા જ પિતા બન્યો 

તુર્કીનાં સૈમસન પ્રાંતમાં એક અજીબો ગરીબ ઘટના બનવા પામી છે. જેમાં એક શખ્સની તેના પાલતુ કૂતરા દ્વારા ગોળી મારી હત્યા કરી દીધી હતી. ત્યારે જાણવા મળી રહ્યું છે તે મુજબ પાલતૂ જાનવરના પગ ભૂલથી બંદૂકનાં ટ્રિગર પર પડી ગયો હતો. જે બાદ બંદૂકથી ગોળી નીકળી હતી જે સીધી શખ્સને વાગી હતી અને તેણે ઘટના સ્થળે જ મોત નિપજ્યું હતું. આ વિચિત્ર ઘટના ત્યારે બની જ્યારે મૃતક કિજલાન પ્લોટો પર તેના મિત્રો સાથે શિકાર કરવા ગયો હતો. ત્યારે આ મામલે પોલીસે ગુનો નોંધી તપાસ હાથ ધરી છે.

કૂતરાનો પગ ટ્રિગર પર પડ્યો અને ગોળી છુટી
ત્યારે મળતી માહિતી મુજબ મૃતકની ઓળખ 32 વર્ષીય ઓઝગુર ગાવરેકોગ્લુ તરીકે થઈ છે. મૃતક તેની બંદૂકને કવરમાં પરત મૂકી રહ્યો હતો તે દરમ્યાન કૂતરાનો પગ બંદૂકનાં ટ્રિગર પર પડી ગયો હતો. જે બાદ ગોળી છુટી અને ગેવરેકોગ્લૂનું ત્યાં જ મોત નિપજ્યું હતું.

મૃતક 10 દિવસ પહેલા જ પિતા બન્યો
મૃતક 10 દિવસ પહેલા જ પિતા બન્યો હતો. તેની ઘણી તસવીરો સામે આવી ચુકી છે. જેમાંથી એકમાં મૃતક શિકાર કરાયેલા પક્ષીઓના મૃતદેહને પકડેલો છે અને તેના પાલતુ કૂતરાનાં ગળા પર હાથ ફેરવી રહ્યો છે. અન્ય તસવીરોમાં તે ચાર ગલુડિયાઓ અને અલગ-અલગ કૂતરા સાથે જોવા મળે છે. જો કે હજુ સુધી એ સ્પષ્ટ થયું નથી કે આ વિચિત્ર ઘટનામાં મૃતકનો કયો કૂતરો સામેલ હતો.

સૂત્રો દ્વારા મળતી માહિતી મુજબ કેટલાક તુર્કી મીડિયા દાવો કરે છે કે ગેવરેકોગ્લુની હત્યા કરવામાં આવી છે. પોલીસને ગેરમાર્ગે દોરવા માટે પાળેલા કૂતરાનો બહાના તરીકે ઉપયોગ કરવામાં આવ્યો છે. જો કે, તપાસમાં હજુ સુધી કોઈ નક્કર પુરાવા મળ્યા નથી.