16 સપ્ટેમ્બરથી રાજ્યમાં નવા ટ્રાફિક નિયમો લાગૂ કરવામાં આવ્યા હતા. જેને લઈને રાજ્યમાં દરેક જગ્યાએ ટ્રાફિક પોલીસોએ લોકોને અટકાવીને દંડ વસૂલવાનું શરૂ કર્યું હતું. ટ્રાફિકના નિયમોનો ભંગ કરતા અનેક વાહનચાલકો પ્રથમ દિવસે જ ભોગ બન્યા હતા. જેના પગલે પ્રથમ દિવસે જ લાખો રૂપિયાનો દંડ રાજ્યમાં વસૂલવામાં આવ્યો.
રાજ્યમાં નવા ટ્રાફિક નિયમનો અમલ શરૂ
પ્રથમ દિવસે તંત્ર દ્વારા વસૂલાયો લાખોનો દંડ
નિયમોનો ભંગ કરતા વાહન ચાલકો દંડાયા
ટ્રાફિક પોલીસ કરી કાર્યવાહી શરૂ
રાજ્યના અલગ અલગ શહેરોમાં ટ્રાફિક પોલીસો નવા ટ્રાફિક નિયમોને લઈને સવારથી જ કામે લાગી ચૂક્યા હતા. જેના પગલે રાજ્યમાં અનેક અવનવા કિસ્સાઓ પણ બન્યા હતા. કેટલાક લોકોએ નવા નિયમોથી બચવા માટે અવનવા કિમિયા અપનાવ્યા, કેટલાકે હેલમેટની ચોરી કરી તો કોઈએ પકડાઈ જતાં આપઘાતની ધમકી આપી.
રાજ્યમાં વસૂલાયો લાખો રૂપિયાનો દંડ
રાજકોટમાં પ્રથમ દિવસે જ રૂ. 1 લાખ 20 હજારની વસૂલાત કરવામાં આવી હતી. તો અન્ય તરફ સુરતમાં રૂ. 2 લાખ 11 હજારના દંડ ફટકારાયા. તાપીમાં પ્રથમ દિવસે કુલ 19 હજાર રૂપિયાનો દંડ નાગરિકો પાસેથી નિયમ તોડવા માટે વસૂલવામાં આવ્યો. મોરબીમાં રૂ.63 હજારના દંડની વસૂલાત થઈ હતી. જૂનાગઢમાં 83 હજાર રૂપિયાના દંડ ફટકારાયા તો જામનગરમાં 62 હજાર રૂપિયાની પ્રથમ દિવસે વસૂલાત કરાઈ. બોટાદમાં 15 હજાર રૂપિયાનો દંડ વસૂલાયો હતો. ભાવનગરમાં 75 હજાર રૂપિયાનો દંડ ફટકારાયો. કચ્છમાં 46 હજારના દંડથી વસૂલાત થઈ. જ્યારે સુરેન્દ્રનગરમાં 16 હજારના દંડ ફટકારાયા. ભરૂચમાં 44 હજારના મેમા વાહનચાલકોને અપાયા હતા. કહી શકાય કે કુલ મળીને રાજ્ય સરકારને ટ્રાફિક નિયમોને લઈને જે પગલાં લેવામાં આવ્યા છે તેનાથી આવક થઈ રહી છે.