ફરી એક વખત ફેસબુકના કરોડો લોકોનો ડેટા લીક થઇ જતા હાહાકાર મચી જવા પામ્યો છે. જો કે આ વખતે ડાયરેક્ટ ફેસબુક સર્વર નહિ પણ ફેસબુક પરથી ડેટા કલેક્ટ કરતી વખતે 26.7 કરોડ યુઝર્સનો ડેટા અસુરક્ષિત ડેટાબેઝમાં રાખતા લીક થઇ જવા પામ્યા હતા.
કરોડો યુઝર્સનો ડેટા થયો લીક
રિસર્ચરનો દાવો : ડેટાબેઝ સિક્યોર નહોતો
ફરી એક વખત ફેસબુકના કરોડો લોકોનો ડેટા લીક થઇ ગયો છે. સુરક્ષા સંશોધનકાર બોબ ડાયાચેન્કોએ એક ડેટાબેસ શોધી કાઢ્યો છે જેમાં 267 મિલિયન ફેસબુક વપરાશકર્તાઓનો ડેટા રાખવામાં આવ્યો છે. ગંભીર વાત એ છે કે જે સર્વરમાં ડેટા રાખવામાં આવ્યો છે તે સુરક્ષિત નથી અને તે પાસવર્ડ વડે સુરક્ષિત કરવામાં પણ આવ્યું નથી.
રિપોર્ટ અનુસાર 267 મિલિયન યુઝર્સના નામ, આઈડી અને ફોન નંબર ઓનલાઇન જાહેર થઈ ગયા છે. આ ડેટાબેઝ એટલો નબળો છે કે તે પાસવર્ડ અને ઓથેન્ટિકેશન વિના એક્સેસ કરી શકાય છે.
ફેસબુકનો બચાવ
ફેસબુકએ USAની ટેક્નોલોજી વેબસાઇટ Engadgetને કહ્યું છે કે, 'અમે આ બાબતે તપાસ કરી રહ્યા છીએ, પરંતુ અમારું માનવું છે કે આ ડેટા છેલ્લા કેટલાક વર્ષો જુનો છે, કારણ કે યુઝર્સની માહિતીને સુરક્ષિત રાખવા માટે આપણે તાજેતરમાં ફેરફાર કર્યા છે. '
જો ફેસબુકની આ દલીલ સાચી હોય તો પણ આ ડેટા લીક થવાથી સામાન્ય વપરાશકર્તાની ગુપ્તતા અંગે મોટો ખતરો ઉભો થઈ શકે છે.
હેકર્સ કેવી રીતે આ ડેટાનો દુરુપયોગ કરે છે?
સંશોધનકાર બોબ ડાયાચેન્કો કહે છે કે ફેસબુકનો યુઝર ડેટા એક ડાઉનલોડ લિંક સાથે હેકર ફોરમમાં એક જગ્યાએ અપલોડ કરવામાં આવ્યો છે. આ ફેસબુક ડેટાનો દુરૂપયોગ કરવામાં આવ્યો છે કે નહીં તે હાલમાં સ્પષ્ટ નથી. સામાન્ય રીતે આવા ડેટા લીક થયા પછી, હેકર્સ ડાર્ક વેબથી આ ડેટા એકત્રિત કરે છે. ત્યાર બાદ આ ડેટા વડે યુઝર્સના એકાઉન્ટનો એક્સેસ મેળવીને તેમને નુકશાન પહોંચાડી શકે છે.