કમ્પ્યુટર ઓપરેટિંગ સિસ્ટમમાં મોનોપોલી ધરાવતી માઇક્રોસોફટ કંપનીએ એક સ્પેશિયલ થ્રીડી હોલોગ્રામ લોન્ચ કરીને બધાને ચોંકાવી દીધા છે. આ હોલોગ્રામ યુઝરનો હુબહુ કલોન તૈયાર કરીને દુનિયાની લગભગ દરેક ભાષામાં બોલી શકે છે. માઇક્રોસોફટે આસીસ્ટન્ટ ઇન્ટેલિજન્સ સંચાલિત હોલોગ્રામ તૈયાર કર્યો છે.
એક રીતે જોઇએ તો આ યુઝરનો ડિજિટલ અવતાર છે. લાસવેગાસમાં માઇક્રોસોફટની જુલિયા વ્હાઇટે આ ડેમો રજુ કર્યો હતો. જુલિયાએ ઇંગ્લીશમાં આપેલી સ્પીચને તેમના જ હોલોગ્રામે જાપાનીઝ ભાષામાં બોલીને બતાવી હતી. જુલિયાએ કહ્યું કે ઇંગ્લીશનું ચલણ ન હોય તેવા દેશોમાં તેમના માટે સ્પીચ આપવાનું મુશ્કેલ હતું. પરંતુ આ હોલોગ્રામથી સમસ્યા હલ થઇ ગઇ છે.
જુલિયાએ પ્રેઝન્ટેશનમાં બતાવ્યું કે તેમનો હોલોગ્રામ તેમના જ અવાજમાં જાપાની ભાષા બોલે છે. જયારે તેમને જાપાની ભાષા બોલતા આવડતું નથી. હોલોગ્રામે પહેલા તો જુલિયાની ઇંગ્લીશ સ્પીચને જાપાનીમાં ટ્રાન્સલેટ કરી અને ન્યુરેલ ટેકસ્ટ ટુ સ્પીચ ટેકનિકથી બોલી બતાવી. હોલોગ્રામમાં ન્યુરેલ ટેકસ્ટ ટુ સ્પીચ ઉપરાંત મિક્સ રિયાલિટી કેપ્ચર સ્ટુડિયો ટેકનોલોજીનો ઉપયોગ કરાયો છે.
મિક્સ રિયાલિટી કેપ્ચર સ્ટુડિયો ટેકનોલોજી સ્પીચને રેકોર્ડ કરે છે. તે પછી ન્યુરેલ ટેકસ્ટ ભાષાને અનુરુપ યુઝરની સ્પીચ અન્ય ભાષામાં બોલે છે. માઇક્રોસોફટની આ ટેકનોલોજીએ ટેકવર્લ્ડના નિષ્ણાતોને પણ ચોંકાવી દીધા છે. સામાન્ય લોકો માટે તો આ એક જાદુ સમાન છે. હોલીવુડની સાયન્સ ફિકશન ફિલ્મમાં કોઇપણ વ્યકિતના ડિજિટલ અવતારની કલ્પના કોઇ નવી વાત નથી.
જોકે તેને આ રીતે વાસ્તવિકતાનું સ્વરુપ પહેલી વાર મળ્યું છે. માઇક્રોસોફટની આ શોધ દુનિયાભરના લોકો માટે હવે ભાષાની સમસ્યા હલ કરશે. હોલોગ્રામની ટેકનોલોજી વધુ સંશોધનો બાદ સામાન્ય લોકો માટે પણ ઉપલબ્ધ બનશે તેવી શકયતા છે.