મેક્સિકોનાં નાઈટ ક્લબમાં અંધાધૂધ ફાયરિંગ, 15નાં મોત અને 4 ઈજાગ્રસ્ત

મેક્સિકોમાં એક નાઈટ ક્લબમાં અંધાધૂધ ફાયરિંગ થતાં 15 લોકોનાં મોત નીપજ્યાં છે. ગુઆનાજુઆટોમાં આવેલાં એક નાઈટ ક્લબમાં અંધાધૂધ ફાયરિંગની આ ઘટના સામે આવી છે. તો આ ગોળીબારમાં ચાર લોકો ઈજાગ્રસ્ત થતાં તેઓને સારવાર માટે ખસેડવામાં આવ્યાં છે. અધિકારીઓનું એવું માનવું છે કે, ઈંધણ ચોરી કરતી ગેંગ દ્વારા આ ફાયરિંગ કરવામાં આવ્યું છે. તો પોલીસે પણ હવે ઈંધણ ચોરી કરતી ગેંગ સામે ઓપરેશન હાથ ધર્યુ છે.

પ્રાપ્ત વિગતો મુજબ, ભારે હથિયારો સાથે આવેલાં કેટલાંક શખ્સો નાઈટ ક્લબમાં ઘૂસી આવ્યાં અને બાદમાં અંધાધૂધ ફાયરિંગ કર્યું. ઉલ્લેખનીય છે કે, સલામાંકા રાજ્યની તેલ કંપની પેટ્રોલે મૌક્સોસોસની મુખ્ય પાઈપ લાઈનની આ સાઈટ છે.

જ્યાં પાછલાં કેટલાંક વર્ષોમાં ઈંધણ ચોરીને લીધે લગભગ 3 બિલિયન અમેરિકી ડોલરનું નુકસાન સામે આવ્યું છે. ઉલ્લેખનીય છે કે, ગત જાન્યુઆરી મહિનામાં જ રીફાઈનરી પાસે ઊભેલી એક કારમાં નકલી બોમ્બ મળી આવ્યો હતો. પબ્લિક પ્રોસિક્યૂટર્સ કાર્યાલયનાં પ્રવક્તા જુઆન જોસ માર્ટિનેજે જણાવ્યું કે આ ઘટના ગુઆનાજુઆટો સ્ટેટમાં સ્થિત નાઇટ ક્લબમાં થઇ છે. આ જ વિસ્તારમાં ઓથોરિટીઝે ઇંધણની ચોરીનાં મામલામાં ઓપરેશન શરૂ કરી દીધેલ છે.