હવામાન / ગુજરાતમાં આ તારીખે પડશે ફરી માવઠું, અંબાલાલ પટેલે કરી કમોસમી વરસાદની આગાહી, ખેડૂતો ચિંતાતુર

• હવામાન નિષ્ણાંત અંબાલાલ પટેલની આગાહી
• ધીમે ધીમે ગરમીનું પ્રમાણ વધશેઃ અંબાલાલ
• સવારે ઠંડી બપોરે ગરમી રહેશેઃ અંબાલાલ

રાજ્યના હવામાનને લઈને હવામાનના નિષ્ણાત અંબાલાલ પટેલની વધુ એક આગાહી સામે આવી છે તેમણે આગાહી કરતા કહ્યું છે કે, ધીમે ધીમે ગરમીનું પ્રમાણ વધશે  અને સવારે ઠંડી તેમજ બપોરે ગરમી રહેશે. રાજ્યના કેટલાક ભાગોમાં વાદળછાયું વાતવરણ પણ રહેશે.

22 અને 23 ફેબ્રુઆરીએ કેટલાક ભાગમાં કમોસમી વરસાદ થશે: અંબાલાલ પટેલ
રાજ્યમાં હવામાનને લઈ હવામાન નિષ્ણાત અંબાલાલ પટેલે જણાવ્યું કે, આગામી 12 અને 13 ફેબ્રુઆરીએ વાદળછાયું વાતવરણ રહેશે. 19 અને 20 તારીખે વાતાવારણમાં પલટો સર્જાશે. અંબાલાલ પટેલે રાજ્યના કેટલાક વિસ્તારમાં ફરી કમોસમી વરસાદની આગાહી કરી છે. 22 અને 23 ફેબ્રુઆરીએ કેટલાક ભાગમાં કમોસમી વરસાદ થશે અને ફેબ્રુઆરીના અંત સુધીમાં મહત્તમ તાપમાન 37 થી 38 સુધી પહોંચશે. આ વર્ષે ઉનાળામાં ગરમી વધુ રહેશે તેમ અંબાલાલ પટેલે જણાવ્યું છે.

હવામાન વિભાગની આગાહી કરી

ઠંડીને લઇ હવામાન વિભાગે આગાહી કરી છે કે, વેસ્ટર્ન ડિસ્ટર્બન્સની અસરથી ગરમીમાં વધારો થયો છે. આ બધાની વચ્ચે ફેબ્રુઆરીના મધ્યમાં સિઝનની ઠંડીનો વધુ એક રાઉન્ડ પણ આવશે. જો તાપમાનની વાત કરીએ તો અમદાવાદમાં 13.3 ડિગ્રી અને ગાંધીનગરમાં 11.4 ડિગ્રી તાપમાન નોંધાયું છે જ્યારે નલિયામાં 16.3 ડિગ્રી તાપમાન  નોંધાયું છે. આગાહી મુજબ ફેબ્રુઆરીના મધ્યમાં ઠંડીનો વધુ એક રાઉન્ડ આવશે. દિવસ દરમિયાન મહત્તમ તાપમાન 26.8 ડિગ્રી રહેવાની પણ આગાહી કરવામાં આવી છે.

બેવડી ઋતુ અનુભવાશે
વેસ્ટર્ન ડિસ્ટર્બન્સની અસર અમદાવાદ સહિત અનેક જિલ્લામાં વર્તાશે. રાત્રે ઠંડી અને દિવસે ગરમી અનુભવાશે. રાજ્યમાં આગામી દિવસોમાં ગરમીમાં સાધારણ વૃદ્ધિ થવાની શક્યતા છે. નિષ્ણાતો અનુસાર, તાપમાનમાં થઇ રહેલા ફેરફારને લીધે રાત્રે ઠંડીનો ચમકારો જોવા મળશે, જ્યારે દિવસે ગરમીને લીધે બેવડી ઋતુ અનુભવાશે.

ગરમીમાં સાધારણ વધારો થશે
હવામાન વિભાગના જણાવ્યા મુજબ, આગામી થોડા દિવસ ગુજરાતમાં સરેરાશ લધુત્તમ તાપમાન 3 ડિગ્રી જેટલું વધતાં ઠંડીમાં ઘટાડો થશે. આગામી ત્રણ દિવસથી ગરમીમાં સાધારણ વધારો થવાની સંભાવના છે. ફેબ્રુઆરીના બીજા સપ્તાહમાં કાળઝાળ ગરમી પડવાની આગાહી કરવામાં આવી છે. એટલું જ નહીં, આ વખતે મહત્તમ તાપમાન 37 ડિગ્રી આસપાસ પહોંચશે. ફેબ્રુઆરીના અંતમાં હવામાનમાં પલટો આવશે. માર્ચ મહિનામાં હવામાનમાં ભારે પલટાની શક્યતા જોવાઈ રહી છે. 

આ વર્ષે ઉનાળો આકરો રહેશેઃ અંબાલાલ પટેલ
હવામાન નિષ્ણાત અંબાલાલ પટેલનું અનુમાન છે કે, આ વર્ષે ઉનાળો આકરો રહેશે અને માર્ચ મહિનામાં આકરી ગરમી રહેશે. 4 માર્ચથી ગરમી વધશે. માર્ચ મહિનામાં 40 ડિગ્રી તાપમાન પહોંચી જશે. 25થી 26 માર્ચ દરમિયાન દરિયા કિનારે ભારે પવન ફૂંકાશે.