હાય રે ગરમી..! / હવામાન વિભાગનો અંદેશો: આજે ગુજરાતમાં રહેશે વાદળછાયું વાતાવરણ, પણ ગરમીથી નહીં મળે છુટકારો, જાણો સમગ્ર આગાહી

• હવામાન વિભાગની આગાહી
• 2 દિવસ પવનની દિશા બદલાવાથી વાતાવરણ બદલાશે
• વાદળછાયા વાતાવરણની વચ્ચે પણ રહેશે ગરમીનો પ્રભાવ

રાજ્યમાં હજુ પણ ગરમીનો પ્રકોપ યથાવત રહેવાનું અનુમાન હવામાન વિભાગ દ્વારા આપવામાં આવ્યુ છે પવનની દિશા બદલાતાં રાજ્યના ગરમીનો પ્રકોપ વધશે પણ  કેટલાક વિસ્તારમાં વાદળછાયુ વાતાવરણ પણ રહેશે. 2 દિવસ પવનની દિશા બદલાશે પણ તાપમાનમાં કોઈ ઘડાટો નહીં થયા તેવી આગાહી હવામાન વિભાગ દ્વારા કરવામાં આવી છે.

કયા શહેરોમાં હિટવેવની આગાહી
આગામી 3 દિવસ ગરમીનું પ્રમાણ યથાવત રહેશે, દક્ષિણ ગુજરાતમાં 20 અને 21 મેના રોજ વાદળછાયું વાતાવરણ થશે. આજે 19 અને 20 મેના રોજ ગાંધીનગર, અમદાવાદ, સુરેન્દ્રનગર, કચ્છમાં હીટવેવની આગાહી કરવામાં આવી છે. હાલ રાજ્યના સૌરાષ્ટ્ર અને કચ્છ સહિત ઉત્તર ગુજરાત અને દક્ષિણ ગુજરાતમાં ગરમીનો પારો 44 ડિગ્રીની આસપાસ છે. 

ગુજરાતમાં 10 જૂન બાદ ચોમાસુ દસ્તક દેશે: હવામાન વિભાગ
રાજ્યના હવામાન વિભાગે અનુમાન લગાવ્યું છે કે, ગુજરાતમાં 10 જૂન બાદ ચોમાસુ દસ્તક દેશે. આ વખતે ચોમાસું આંદામાન-નિકોબાર સુધી પહોંચી ગયું છે. જૂન મહિનાના પ્રારંભે પ્રિ-મોન્સૂન એક્ટિવ થશે. કેરળમાં પણ ચોમાસુ વહેલું આવી જશે. કેરળમાં નિયત સમય 1 જૂન કરતા 5 દિવસ વહેલા ચોમાસું આવશે. તારીખ 27મી મેએ ચોમાસું કેરળ પહોંચશે તેવી પ્રબળ શકયતા રહેલી છે. આ વર્ષે સામાન્ય કરતા પાંચ દિવસ વહેલું પહોંચશે.

આંદમાન-નિકોબાર પહોંચ્યું ચોમાસું
ચોમાસાની શરૂઆત સત્તાવાર રીતે કેરળમાં મેઘરાજાના આગમન સાથે થતી હોય છે.  ત્યારે આ વર્ષે કેરળમાં ચોમાસું તેના નિયત સમય 31 મે અથવા 1 જૂન કરતા પાંચ દિવસ વહેલું એટલે કે 27 મેના રોજ પહોંચી જવાની શક્યતાઓ છે. હવામાન વિભાગના આંકલન મુજબ રાજ્યમાં ચોમાસું 15 જૂનની આસપાસ પહોંચી શકે છે. જો કે, આ ચોમાસું આંદમાન નિકોબારથી કેરળ લઇને ત્યાંથી આગળ કેટલે સુધી પહોંચે છે તેની પર સમગ્ર મદાર રહેલો છે. વર્ષ 2021માં આંદમાન-નિકોબારમાં 21 મેના રોજ ચોમાસું પહોંચ્યું હતું. આ વર્ષે સત્તાવાર રીતે ચોમાસાનું આગમન 16 મેના રોજ થયું છે.

24 મેની આસપાસ રાજ્યમાં ગાજવીજ સાથે હળવો વરસાદ પડશે: અંબાલાલ
અંબાલાલે આગાહી કરતા જણાવ્યું કે, 15 જૂનની આસપાસ ગુજરાતમાં વરસાદ શરૂ થશે. જ્યારે 24 મેની આસપાસ રાજ્યમાં ગાજવીજ સાથે હળવો વરસાદ પડશે. રાજ્યમાં 24 મેથી 6 જૂન સુધીમાં પ્રિ-મોન્સુન એક્ટિવિટી શરૂ થશે. જો કે, ચોમાસા પહેલાં રાજ્યમાં હળવો ચક્રવાત આવશે. આ સાથે ઉત્તર- મધ્ય અને દક્ષિણ ગુજરાતમાં 15 જૂન પહેલાં હળવો વરસાદ વરસશે. સૌરાષ્ટ્રના દરિયાકિનારે પણ વરસાદ પહેલાં ચક્રવાત આવશે એવી અંબાલાલ પટેલે આગાહી કરી છે.