આગાહી / ગુજરાતમાં આજે ઠંડીમાં હાશકારો! પણ આ તારીખથી કોલ્ડવેવનો નવો રાઉન્ડ, જુઓ કયા શહેરમાં કેટલું નોંધાયું તાપમાન

• બે દિવસ બાદ ફરીથી ઠંડીનો રાઉન્ડ શરૂ થશે 
• ઉત્તર ગુજરાતમાં ઠંડીનો કહેર યથાવત 
• મધ્ય ગુજરાતમાં ઠંડીની આંશિક રાહત 

આજે રાજ્યમાં ઠંડીથી આંશિક રાહત જોવા મળી છે ખાસ કરીને મધ્ય ગુજરાતમાં ઠંડીની તીવ્રતા ઘણી ઓછી થઈ છે પણ ઉત્તર ગુજરાતમાં પ્રકોપ યથાવત છે. સિઝનની સૌથી વધુ ઠંડી સાથે પારો સિંગલ ડિઝીટમાં આવી રહયો છે. જેને લઈને જન જીવન અસ્તવ્યસ્ત બન્યું છે. મોડી રાત્રે અને વહેલી સવારે માર્ગો સુમસામ ભાસી રહ્યા છે. પરંતુ બે દિવસથી ઠંડીમાં આંશિક રાહત જોવા મળી રહી છે. તેવામાં ઠંડીને લઈને હવામાન વિભાગ દ્વારા વધુ એક આગાહી કરવામાં આવી છે.જેમાં આજથી બે દિવસ બાદ ઠંડીમાં વધારો નોંધાઇ તેવું જણાવાયું છે.

બે દિવસ બાદ 2થી 3 ડિગ્રી ઘટશે તાપમાન
હવામાન વિભાગના ડાયરેકટર ડો. મનોરમાં મોહંતીએ જણાવ્યું કે બે દિવસ બાદ 2 થી 3 ડિગ્રી તાપમાનમાં ઘટાડો થઇ શકે છે જે ને લઈને ઠંડીમાં સામાન્ય વધારો નોંધાઇ તેવું જણાઈ રહ્યું છે. વેસ્ટર્ન ડિસ્ટર્બન્સના કારણે તાપમાનમાં ઘટાડો થશે. જેની સૌરાષ્ટ્રના વિસ્તારો અને કચ્છ પંથકમાં અસર જોવા મળશે.

2 દિવસ બાદ તાપમાન સૂકું રહેશે
હવામાન વિભાગે જણાવ્યું કે બે દિવસ તાપમાનમાં બદલાવ જોવા મળશે. જેને લઈને આગામી 5 દિવસ ઠંડી અને શીત લહેર જોવા મળશે. આગામી 5 દિવસ રાજ્યમાં તાપમાન સૂકું રહેશે. મહત્વનું છે. કે નલિયામાં ગઈકાલે 7 ડિગ્રી તાપમાન નોધાયું હતુ. વેસ્ટર્ન ડિસ્ટર્બન્સના કારણે અમદાવાદમાં 13.4 ડિગ્રી આસપાસ તાપમાન નોંધાયું હતું.

ઠંડીનો નવો રાઉન્ડ શરૂ થવાનું અનુમાન
હવામાન વિભાગના જણાવ્યા અનુસાર, રાજ્યમાં 25 જાન્યુઆરીથી ઠંડીનો નવો રાઉન્ડ પણ શરૂ થવાનું અનુમાન છે. જેથી આ શિયાળાની સિઝન વધુ સમય સુધી ચાલશે. સવાર અને રાત્રિ દરમિયાન તીવ્ર ઠંડી અનુભવાશે, પરંતુ દિવસ દરમિયાન તાપમાન વધુ રહેવાની સંભાવના છે.

ભારતીય હવામાન વિભાગે ઉત્તર ભારતના કેટલાક વિસ્તારોમાં કરી વરસાદની આગાહી
તો બીજી તરફ દિલ્હી-એનસીઆર સહિત ઉત્તર ભારતમાં ઠંડીનું મોજું ઘટવાને કારણે લોકોએ રાહતનો શ્વાસ લીધો છે. અન્ય સક્રિય વેસ્ટર્ન ડિસ્ટર્બન્સ (પશ્ચિમી વિક્ષોભ) ધીમી ગતિએ આગળ વધી રહ્યું છે. તે 23 થી 25 જાન્યુઆરી દરમિયાન હિમાલયના પ્રદેશમાં પહોંચવાની આશા છે. જેના કારણે 23-26 જાન્યુઆરી વચ્ચે જમ્મુ-કાશ્મીર, હિમાચલ પ્રદેશ અને ઉત્તરાખંડમાં ભારે વરસાદ અને હિમવર્ષા થવાની સંભાવના છે. 23 અને 24 જાન્યુઆરીએ પશ્ચિમ હિમાલય વિસ્તારમાં છૂટાછવાયા કરા પડવાની પણ શક્યતા છે.વેસ્ટર્ન ડિસ્ટર્બન્સ (પશ્ચિમી વિક્ષોભ) સક્રિય થવાને કારણે મેદાની વિસ્તારોમાં પણ વરસાદની શક્યતા છે. પંજાબના કેટલાક વિસ્તારોમાં 22 જાન્યુઆરીએ હળવો વરસાદ જ્યારે 23 જાન્યુઆરીએ હળવાથી મધ્યમ વરસાદની આગાહી કરવામાં આવી છે. 24 અને 25 જાન્યુઆરીએ પણ વરસાદની સંભાવના છે. 22 જાન્યુઆરીએ દિલ્હી, ચંદીગઢ અને હરિયાણામાં વરસાદ પડી શકે છે. પશ્ચિમ ઉત્તર પ્રદેશના કેટલાક વિસ્તારોમાં 23 જાન્યુઆરીએ જ્યારે મોટાભાગના વિસ્તારોમાં 24 જાન્યુઆરીએ વરસાદ પડશે. પૂર્વી ઉત્તર પ્રદેશમાં 24 અને 25 જાન્યુઆરીએ વરસાદ પડી શકે છે.

જુઓ કયા શહેરમાં કેટલું નોંધાયું તાપમાન

• અમદાવાદ 11.02  ડિગ્રી સાથે ઠંડુ શહેર 
• ગાંધીનગર 10.07 ડિગ્રી તાપમાન નોંધાયું 
• વડોદરા 12.02 ડિગ્રી તાપમાન નોંધાયું
• બનાસકાંઠા 9.01 ડિગ્રી તાપમાન નોંધાયું
• નલિયા 7.02 ડિગ્રી તાપમાન નોંધાયું
• કેશોદ 9.03 ડિગ્રી તાપમાન નોંધાયું 
• રાજકોટ 10 ડિગ્રી તાપમાન નોંધાયું
• પોરબંદર 12.06 ડિગ્રી તાપમાન નોંધાયું
• પાટણ 9.03 ડિગ્રી તાપમાન નોંધાયું