રાજ્યમાં વરસાદને લઇ હવામાન વિભાગની આગાહી કરવામાં આવી છે. 2 વરસાદી સિસ્ટમ સક્રિય થતા વરસાદ પડવાની શક્યતા છે. જેમાં 14થી 15 સપ્ટે સૌરાષ્ટ્ર-દ.ગુજરાતમાં વરસાદ રહેશે. લો પ્રેશરના કારણે 16 સપ્ટેમ્બર બાદ વરસાદનું જોર વધી શકે છે. આગાહી વચ્ચે સૌરાષ્ટ્રના કેટલાક વિસ્તારમાં વરસાદ ખાબક્યો હતો.
રાજ્યમાં મેઘમહેર યથાવત રહેવાની આગાહી
14-15 સપ્ટેમ્બર ભારે વરસાદની આગાહી
રવિવારે સૌરાષ્ટ્રના અનેક વિસ્તારોમાં ધોધમાર વરસાદ
હવામાન વિભાગની આગાહી અનુસાર વેરાવળ, ભાવનગર, અમરેલી,પોરબંદર, દ્વારકા, ભરૂચ, નવસારી, સુરત, વલસાડમાં વરસાદ રહેશે. જ્યારે અમદાવાદ, ખેડા, ગાંધીનગર, વડોદરા, મહેસાણા, પાટણ, દ્વારકા અને બનાસકાંઠામાં વરસાદી ઝાપટા પડશે. જાણો આગાહી વચ્ચે કયા કયા વિસ્તારમાં પડ્યો વરસાદ...
આગાહી વચ્ચે રવિવારે અનેક વિસ્તારોમાં વરસાદ પડ્યો
હાલ સૌરાષ્ટ્રમાં 14-15 સપ્ટેમ્બર ભારે વરસાદની આગાહી કરવામાં આવી છે. ખેડૂતો વરસાદની આગાહીને જોખમરૂપે જોઇ રહ્યા છે. ત્યારે રવિવારે અમરેલી, ગીરસોમાથ, ગોંડલ, ભાવનગર, રાજુલા, જાફરાબાદ, ખાંભા, ભાવનગર, બાબરા, સાબરકાંઠા અને જામનગરમાં વરસાદ પડ્યો હતો. જોકે વરસાદના પગલે વાતાવારણમાં ઠંડક પ્રસરાઈ ગઈ હતી. જ્યારે ખેડૂતોની ચિંતામાં વધારો થયો હતો. કારણ કે વરસાદને કારણે પાક નિષ્ફળ જાય તેવી ચિંતા ખેડૂતોમાં જોવા મળી છે. તો બીજી તરફ નદી-નાળા પણ બે કાંઠે થયા હતા.
સાબરકાંઠા જિલ્લામાં સાર્વત્રિક વરસાદ
સાબરકાંઠા જિલ્લામાં સાર્વત્રિક વરસાદ નોંધાયો હતો. મોડી સાંજે જિલ્લામાં વાવાઝોડા ગાજવીજ સાથે વરસાદ પડ્યો હતો. હિંમતનગર તાલુકાના રૂપાલ, રાયગઢ સહિતના ગ્રામ્ય પંથકમાં અતિ ભારે વરસાદ પડ્યો હતો. પ્રાંતિજ, તલોદ, હીંમતનગર અને ઈડર તાલુકામાં ભારે વરસાદ પડ્યો હતો. ગાજવીજ સાથે વરસાદ વરસતા હિંમતનગર શહેરમાં વીજળી ગુલ થતા શહેરીજનો પરેશાન થયા હતા.
દ્વારકાના ખંભાળીયાની વેદમતી નદી બે કાંઠે થઇ હતી. કોઝ-વે પાણીમાં ગરકાવ થયો હતો.