માવઠું / ભર ઉનાળે ગાઢ ચોમાસા જેવો માહોલ : ધારીના ગીરકાંઠાના અનેક ગામોમાં કરા સાથે ધોધમાર વરસાદ, નાળા છલકાયા

• અમરેલીના ધારીના ગીરકાંઠાના અનેક ગામોમાં કમોસમી વરસાદ 
• કમોસમી વરસાદને લઇને નાળાઓમાં પાણી થયા વહેતા 
• ભર ઉનાળે ચોમાસા જેવું વાતાવરણ

હવામાન વિભાગ દ્વારા 2 દિવસ અગાઉ રાજ્યમાં હિટવેવની સાથે કમોસમી વરસાદની આગાહી કરવામાં આવી હતી. 48 કલાકમાં પોરબંદર, બનાસકાંઠા, સાબરકાંઠામાં હિટવેવ રહેશે. તો સૌરાષ્ટ્રમાં સામાન્ય વરસાદની આગાહી કરાઇ હતી. જેમાં અમરેલી, ગીર સોમનાથ, રાજકોટ, કચ્છમાં વરસાદની આગાહી કરવામાં આવી હતી. ત્યારે હવે હવામાન વિભાગની આગાહી વચ્ચે સૌરાષ્ટ્ર પંથકમાં કમોસમી વરસાદ ખાબક્યો છે.

ધારીના ગીરકાંઠાના સુખપુર, કાંગસા, જીરા, દુધાળા સહિતના વિસ્તારોમાં કમોસમી વરસાદ ખાબક્યો છે. કમોસમી વરસાદને પગલે સ્થાનિક નાળાઓમાં પાણી વહેતા થયા છે. ભર ઉનાળે ગાઢ ચોમાસા જેવો માહોલ સર્જાયો છે. સાયક્લોનિક સરક્યુલેશનને કારણે વાતાવરણ પલટો આવ્યો છે.

તો બીજી તરફ બેવડી ઋતુથી ખેતીને નુકસાન થવાની સંભાવના છે. ખેડૂતોના ઉનાળુ પાક તેમજ કેરીના પાકને નુકશાન થવાની ભીતિ છે. હાલ ખેડૂતોમાં ચિંતાનો માહોલ છવાયો છે.

મહત્વનું છે કે, ગઇકાલે જામનગર જિલ્લામાં પણ વાતાવરણમાં પલટો આવ્યો હતો. અનેક સ્થળોએ કરા સાથે વરસાદ પડ્યો હતો. જામનગર ઉપરાંત લાલપુર, કાલાવડમાં પણ કરા સાથે વરસા પડ્યો હતો. આ પહેલા પણ જામજોપુર પંથકમાં પણ કમોસમી વરસા પડ્યો હતો. જેના કારણે ખેડૂતોની ચિંતામાં પણ વધારો થયો છે.