ગુજરાતમાં અત્યારે સવારના સમયગાળામાં ઠંડીનો ચમકારો વર્તાઈ રહ્યો છે. જોકે, દિવસ દરમિયાન ગરમીનો અહેસાસ થઈ રહ્યો છે તો રાતે વળી વાતાવરણમાં ઠંડક પ્રસરે છે. આ દરમિયાન રાજ્યમાં હવામાનને લઈને હવામાન વિભાગે વધુ એક આગાહી કરી છે.
રાજ્યમાં હાલ ગરમી અને ઠંડીનો સાથે અનુભવ થઈ રહ્યો છે. ત્યારે હવામાન વિભાગે ઠંડીને લઈને વધુ એક આગાહી કરી છે કે રાજ્યમાં ફરી ઠંડીનો ચમકારો જોવા મળશે. ગુજરાતમાં ફરી ઠંડી વધવાની હવામાન વિભાગે આગાહી કરી છે.
દરિયાકાંઠા વિસ્તારમાં ભારે પવન ફૂંકાશે!
હવામાન વિભાગના જણાવ્યા અનુસાર આજથી રાજ્યમાં ઠંડી વધી શકે છે. આજથી ફરી લઘુત્તમ તાપમાનમાં ઘટાડો થઈ શકે છે. સાથે જ દરિયાકાંઠા વિસ્તારોમાં ઝડપી પવન ફૂંકાવાની શક્યતાઓ છે. દરિયાકાંઠા વિસ્તારમાં 40 થી 60 કિમીની ઝડપે ભારે પવન ફૂંકાવાની આગાહીને લઈને માછીમારોને સાવચેત કરવામાં આવ્યા છે. તેમને દરિયો ન ખેડવાની સૂચના આપવામાં આવી છે.
પહાડી રાજ્યોમાં હળવાથી મધ્યમ વરસાદની આગાહી
ઉત્તર ભારતના મેદાની વિસ્તારોમાં તાપમાન ઝડપથી વધી રહ્યું છે. શિયાળાની ઋતુ હવે ધીમે ધીમે પૂરી થઈ રહી છે. રાષ્ટ્રીય રાજધાની દિલ્હીમાં ફેબ્રુઆરી મહિનામાં જ મહત્તમ તાપમાન 30 ડિગ્રીની નજીક પહોંચી રહ્યું છે. બીજી તરફ વેટ્સર્ન ડિસ્ટર્બન્સના કારણે હિમાલયના પ્રદેશમાં હિમવર્ષા અને વરસાદ પડી રહ્યો છે. હવામાન વિભાગે આજે પહાડી રાજ્યોમાં હળવાથી મધ્યમ વરસાદની આગાહી કરી છે.
અહીં આગામી 24 કલાક દરમિયાન વરસાદની આશંકા
હવામાન વિભાગના જણાવ્યા અનુસાર, આગામી 24 કલાક દરમિયાન જમ્મુ-કાશ્મીર, ઉત્તરાખંડ, હિમાચલ પ્રદેશ, પંજાબ, લદ્દાખના કેટલાક વિસ્તારોમાં વરસાદની આશંકા છે. બીજી તરફ હિમાચલ પ્રદેશમાં વરસાદ બાદ આગામી ચાર દિવસ સુધી વાતાવરણ શુષ્ક રહેશે.
લઘુત્તમ તાપમાનમાં થઈ શકે છે ઘટાડો
આ સિવાય અરુણાચલ પ્રદેશના કેટલાક સ્થળોએ આગામી બે દિવસ સુધી હળવો વરસાદ પડશે. પંજાબ, બંગાળ, સિક્કિમમાં થોડા કલાકો સુધી ધુમ્મસ છવાયેલો રહી શકે છે. ગુજરાતના દરિયાકાંઠા નજીક 40થી 60 કિમી પ્રતિ કલાકની ઝડપે પવન ફૂંકાવાની શક્યતા છે. આગામી બે દિવસ દરમિયાન ઉત્તર પશ્ચિમ અને મધ્ય ભારતમાં લઘુત્તમ તાપમાનમાં 2 થી 4 ડિગ્રીનો ઘટાડો થઈ શકે છે. ઉત્તરાખંડના કેટલાક ભાગોમાં હળવો વરસાદ અને હિમવર્ષા થઈ શકે છે.
હવામાન નિષ્ણાતોની આગાહી
ગુજરાતમાં આ મહિનાના અંત સુધીમાં ઠંડીના વધતા-ઓછા ચમકારા અનુભવાશે તેવી હવામાન નિષ્ણાતોની આગાહી છે. કેટલાક હવામાન નિષ્ણાતોએ તો ઠંડીના નવા રાઉન્ડ ઉપરાંત કમોસમી વરસાદની પણ શક્યતા દર્શાવી છે. બીજા અર્થમાં આ વખતે શિયાળો લાંબા સમય સુધી રહેવાનો છે. સામાન્ય રીતે મહાશિવરાત્રી પછી ગરમીનો પારો ઊંચકાય છે. આગામી તા.18 ફેબ્રુઆરીએ મહાશિવરાત્રી છે, પરંતુ મહાશિવરાત્રીના પાવન પર્વ બાદ પણ ઠંડીની અસર રહે તેમ હવામાન વિભાગની આગાહી જોતાં લાગે છે.