ફરી ગાજવીજ અને વાવાઝોડા સાથે આગામી 5 દિવસ મેઘો ગુજરાતને ઘમરોળશે, અરબી સમુદ્રમાં ડિપ્રેશન હોવાથી માછીમારોને દરિયો ન ખેડવા સૂચના
હવામાન વિભાગની આગાહી
આગામી 5 દિવસ સામાન્યથી ભારે વરસાદની સંભાવના
લો પ્રેશર સર્જાતા દરિયાકાંઠે ભારે પવનનાં સુસવાટા, કરંટ પણ દેખાયો
ગુજરાતના દરિયામાં લો પ્રેશર સિસ્ટમ સર્જાતા રાજ્યમાં ફરી વરસાદી માહોલ જામ્યો છે. આ પહેલા 12 તારીખથી વરસાદનું જોર ઘટશે તેવી આગાહી કરવામાં આવી હતી. પણ સિસ્ટમ વધુ સક્રિય થતાં હવામાન વિભાગ દ્વારા નવી આગાહી કરવામાં આવી છે. આગામી 5 દિવસ સામાન્યથી ભારે વરસાદની સંભાવના વ્યક્ત કરવામાં આવી છે. 15 -16 ઓગસ્ટના એકાદ વિસ્તારમાં ભારે વરસાદની સંભાવના છે. અરબી સમુદ્રમાં ડિપ્રેશન હોવાથી માછીમારોને દરિયો ન ખેડવા સૂચના આપી દેવામાં આવી છે. ભારે વરસાદ અને પવનને જોતાં દરિયાઈ બંદરો પર સિગ્નલ નંબર 1 લગાવવામાં આવ્યું છે.
શુક્રવારે રાજ્યમાં 206 તાલુકામાં મેઘો મંડાયો
રાજ્યમાં શુક્રવાર સવારથી 206 તાલુકાઓમાં નોંધપાત્ર વરસાદ નોંધાયો છે. રાધનપુરમાં 3.75 ઈંચ, ઈડરમાં 2.5 ઈંચ, વિજયનગરમાં 2.25 ઈંચ, ઉમરપાડામાં 2.25 ઈંચ, જોટાણામાં 2 ઈંચ, મહેસાણામાં 2 ઈંચ, બારડોલીમાં 1.75 ઈંચ, હાલોલમાં 1.75 ઈંચ, લુણાવાડામાં 1.5 ઈંચ, બાલાસિનોરમાં 1.5 ઈંચ, મહુધામાં 1.25 ઈંચ, વીજાપુરમાં 1.25 ઈંચ, ડભોઈમાં 1.25 ઈંચ, પંચમહાલના કાલોલમાં 1.25 ઈંચ, જાંબુઘોડામા 1.25 ઈંચ, સુરતના મહુવામાં 1.25 ઈંચ, ગોધરામા 1.25 ઈંચ, શહેરામાં 1.25 ઈંચ, દેત્રોજમાં 1.25 ઈંચ, કાલોલમાં એક ઈંચ, વિસનગરમાં એક ઈંચ વરસાદ પડયો છે. સવારથી રાજ્યના 185 તાલુકા વિસ્તારોમાં એક ઈંચથી ઓછો વરસાદ થયો છે.
કયા કયા જિલ્લામાં પડી શકે વરસાદ
બંગાળની ખાડીમાં સર્જાયેલી વેલમાર્ક લો-પ્રેશર સિસ્ટમ મધ્યપ્રદેશના પૂર્વ ભાગમાં પહોંચી છે. બીજી તરફ સૌરાષ્ટ્રના ઉત્તર-પૂર્વ અરબી સમુદ્ર ઉપર એક નવી લો-પ્રેશર સિસ્ટમ બની છે. કચ્છ, દાહોદ, પંચમહાલ, મહીસાગરમાં ભારેથી અતિભારે જ્યારે અમદાવાદ, ગાંધીનગર, ખેડા, વડોદરા, અરવલ્લી, રાજકોટ, જામનગર, દ્વારકા, સુરત, તાપી, નવસારી, ડાંગ, સાબરકાંઠા, બનાસકાંઠા, પાટણ, મહેસાણા, વલસાડમાં પણ વરસાદની આગાહી કરાઈ છે, આગામી ૪૮ કલાકમાં લો-પ્રેશર પશ્ચિમ તરફ આગળ વધશે તેવી શક્યતાના પગલે શનિવારે રાજ્યમાં હળવાથી મધ્યમ વરસાદની શક્યતા છે.
વલસાડના દરિયામાં કરંટ
વલસાડના દરિયા કિનારે તોફાની માહોલ છે. દરિયાનાં પાણીએ અનેક જગ્યાએ કિનારા વટાવ્યા છે. તોફાની દરિયો અને ઝડપી પવનના કારણે દરિયા કિનારાનાં કેટલાંક ઘરને પણ નુકસાન પહોંચ્યું છે. ગામની શેરીઓ અને લોકોનાં ઘરમાં પણ દરિયાનાં પાણી ઘૂસ્યાં છે. દાંતી ગામમાં વરસાદ કે નદી નહીં, પરંતુ દરિયાનાં પાણીના કારણે પૂર જેવી સ્થિતિ સર્જાઇ છે.
દમણમાં દરિયા કિનારો સૂમસામ
સંઘપ્રદેશ દમણના દરિયામાં પણ લો પ્રેશર સિસ્ટમની અસર જોવા મળી છે. એકમ બીજ અને ત્રીજની ભરતીના કારણે દમણના દરિયામાં ભારે કરંટ જોવા મળ્યો છે. દમણના જાણીતા દેવકા બીચ પર દરિયામાં જોવા મળ્યા તોતિંગ મોજા પણ જોવા મળ્યા. દરિયાના પાણી ચોપાટી સુધી પ્રવેશી ગયા છે. પ્રવાસીઓથી ધમધમ તો દમણનો દરિયો હાલ સુમસામ ભાખી રહ્યો છે.
50 કિલોમીટરની ઝડપે પવન ફૂંકાયો
ગીર- સોમનાથનો દરિયો પણ ગાંડોતુર બનતાં ભારે પવન ફૂંકાવવાની સાથે ઊંચાં મોજાં ઊછળી રહ્યાં છે. દરિયામાં ઊછળતાં મોજાંઓની સાથે પ૦ કિલોમીટરની ઝડપ કરતાં વધુ પવન ફૂંકાઈ રહ્યો છે, જેને લઈને માછીમારોના જીવ તાળવે ચોંટ્યા છે, જ્યારે અનેક જગ્યાએ વૃક્ષો પણ ધરાશાયી થયાં છે. અરબી સમુદ્રમાં ભારે કરંટથી અનેક બોટને નુકસાન પહોંચ્યું છે.
ઓખા બંદરે એક નંબરનું સિગ્નલ લગાવાયું
એવી જ રીતે દ્વારકામાં ગોમતીઘાટ સહિતના કિનારે અંદાજે 12 થી 15 ફૂટ ઉંચા મોજા ઉછળ્યા, હવામાન વિભાગની આગાહી મુજબ દરિયામાં ભારે પવન ફૂંકાયો છે જેથી ઓખા બંદર પર એક નંબરનું સિગ્નલ રાખવામાં આવ્યું છે. હર્ષદ, નાવદ્રા, દ્વારકાના દરિયામાં ભારે કરંટ જોવા મળતા માછીમારો ને દરિયો ન ખેડવાની સૂચના આપી દેવામાં આવી છે.
દરિયો ખેડી રહેલા માછીમારોને પરત બોલાવી લેવાયા
જુનાગઢમાં ભારે પવન સાથે માંગરોળ પંથકમાં વરસાદી માહોલ જામ્યો છે. 10 થી 12 ફૂટ જેટલા મોજા દરિયામાં ઊછળી રહ્યા છે. ભારે કરંટ જોવા મળ્યો, તો આ તરફ પોરબંદરમાં પણ લો પ્રેશરના કારણે દરિયામાં કરંટ જોવા મળ્યો, અહીં 5 થી 7 ફૂટ જેટલા ઊંચા મોજા જોવા મળ્યા, બંદર પર 3 નંબરનું સિગ્નલ લગાવી દેવામાં આવ્યું છે. માછીમારોને દરિયો ન ખેડવા સૂચના અપાઈ છે. માછીમારી કરી રહેલ માછીમારો બંદર પર પરત ફર્યા છે.