Meteorological department forecast: સર્ક્યુલેશન રાજસ્થાન તરફ ફંટાયું હોવાથી ગુજરાતમાં ભારે પવન સાથે સામાન્ય વરસાદની આગાહી હવામાન વિભાગ દ્વારા કરવામાં આવી છે. હવામાન વિભાગે જણાવ્યું કે, આ વખતે કેરળમાં ચોમાસું મોડું શરૂ થશે.
રાજસ્થાનમાં સાઈક્લોનિક એર સર્ક્યુલેશ સર્જાતા ગુજરાતમાં ફરી તોફાની પવન સાથે વરસાદ પડવાની આગાહી સ્થાનિક હવામાન વિભાગ દ્વારા કરાઈ છે. આજે રાજ્યના બનાસકાંઠા, સાબરકાંઠા જિલ્લામાં વરસાદ પડી શકે છે. જ્યારે સૌરાષ્ટ્ર-કચ્છ, દીવ-દમણ અને દાદરા-નગર હવેલીમાં 40થી 50 કિમીની ઝડપે પવન ફૂંકાઈને ગાજવીજ સાથે હળવો વરસાદ પડવાની પણ શક્યતા છે.
24 કલાકમાં લો પ્રેશરમાં સર્ક્યુલેશન સક્રિય થશે
હવામાન વિભાગના ડિરેક્ટર મનોરમા મોહંતીએ જણાવ્યું છે કે, સર્ક્યુલેશન રાજસ્થાન તરફ ફંટાયું હોવાથી રાજ્યના કેટલાક વિસ્તારોમાં ભારે પવન સાથે વરસાદ રહેશે. ગુજરાતમાં હાલ હવાનું હળવું દબાણ સક્રિય થયું છે. આગામી 24 કલાકમાં લો-પ્રેશરમાં સર્ક્યુલેશન સક્રિય થશે.
કેરળમાં ચોમાસું મોડુ શરું થશેઃ હવામાન વિભાગ
તેઓએ જણાવ્યું છે કે, કેરળમાં ચોમાસું મોડુ શરું થવાની શક્યતાઓ છે. હાલ સાનુકૂળ પરિસ્થિતિને લીધે ચોમાસું શક્ય નથી. હાલ ચોમાસા અંગે હવામાન વિભાગ નિરીક્ષણ કરી રહ્યું છે. આગામી દિવસમાં ગુજરાતના ચોમાસા અંગે જાહેરાત કરાશે.
ગુજરાત ઉપર વાવાઝોડાનો ખતરો
આ પહેલા હવામાન વિભાગે જણાવ્યું હતું કે, અરબી સમુદ્રમાં હવાનું દબાણ સર્જાતા ગુજરાત ઉપર વાવાઝોડાનો ખતરો તોળાઈ રહ્યો છે. તા 7 જૂને લક્ષદ્વીપ પાસે હવાનું હળવું દબાણ વાવાઝોડામાં પરિવર્તિત થવાની શક્યતા હોઈ તેના કારણે તા 12 અને 14 જૂન સુધીમાં ગુજરાતમાં વાવાઝોડું ત્રાટકી શકે છે.
સૌરાષ્ટ્રમાં ભારે વરસાદની પણ આગાહી
તા 13 જૂને સૌરાષ્ટ્રમાં ભારે પવન સાથે વરસાદ પડી શકે છે તો દરિયાકાંઠા વિસ્તારમાં ભારે ફૂંકવાની શક્યતાઓ છે. જો વાવાઝોડું છેલ્લે ફંટાઈ જાય તો પાકિસ્તાનના કરાંચી તરફ જઈ શકે છે. વાવાઝોડાની શરૂઆતની દશામાં મુંબઈ અને રત્નાગિરિ તરફ હોવાની શક્યતા છે. કેટલાક હવામાન નિષ્ણાંતોએ પણ ગુજરાતમાં તા 7થી 11 જૂન સુધી વાવાઝોડા સાથે વરસાદની આગાહી કરી છે.