ચોમાસું / કાળઝાળ ગરમી વચ્ચે હવામાન વિભાગની આગાહી, 3 જૂનથી આ જિલ્લાઓમાં પડશે વરસાદ

• રાજ્યમાં ગરમી વચ્ચે વરસાદની આગાહી
• આગામી 3,4 દિવસમાં રાજ્યમાં વરસાદ પડશે
• ગુજરાત સુધી ચોમાસુ પહોંચવાની સંભાવના​

રાજ્યના વાતાવરણમાં 4 દિવસ સુધી પલટો રહેવાની હવામાન વિભાગે આગાહી કરી છે. આજથી આગામી 4 દિવસ સુધી વાતાવરણમાં પલટો રહશે. ગુજરાતના કેટલાક વિસ્તારમાં વરસાદ થાય તેવી શક્યતા છે. અરબી સમુદ્રમાં લો પ્રેશર સક્રિય થતા હવામાન વિભાગે વરસાદની આગાહી કરી છે.

હવામાન વિભાગે જણાવ્યું હતું કે, રાજ્યમાં આવનાર ૩ દિવસ તાપમાનમાં વધારો થવાની કોઇ જ શક્યતા દેખાતી નથી. આગામી 2 દિવસ ગરમીમાં પણ ઘટાડો થતો જશે. એટલે કે છેલ્લા થોડા દિવસોથી 40થી 42 ડિગ્રી સહન કરી રહેલી અમદાવાદની જનતાને ગરમીમાંથી રાહત મળશે. ત્યારે 4 અને 5 જૂનના રોજ ગુજરાતમાં વરસાદ પણ પડી શકે છે.

કયા શહેરમાં પડી શકે છે વરસાદ ? 

31મેથી 4 જૂન સુધી રાજ્યના સુરત, ભરૂચ, નર્મદા, વડોદરા, ડાંગ, તાપી, છોટાઉદેપુર, પંચમહાલ, દાહોદ, ખેડા, આણંદ, વલસાડ, નવસારી, ભાવનગર, અમરેલી, ગીર સોમનાથ, દિવ સહિતના જિલ્લાઓમાં ભારે વરસાદની આગાહી છે. અમદાવાદમાં પણ વરસાદ પડી શકે છે.

અમરેલીના ખાંભા પંથકના ગ્રામ્ય વિસ્તારમાં વરસાદ

અમરેલીના ખાંભા પંથકના ગ્રામ્ય વિસ્તારમાં વરસાદ પડ્યો છે. જેમાં ખાંભાના નાનુડી, ભાડ સહિતના ગ્રામ્ય વિસ્તારમાં વરસાદ વરસ્યો છે. ઉનાળુ તલ, મગ, બાજરી અને કેરીના પાકને નુકશાનની ભીતિ સેવાઇ રહી છે.

3 જૂન બાદ ગુજરાત સુધી ચોમાસુ પહોંચવાની સંભાવના

દેશના ખેડૂતો માટે સારા સમાચાર છે. આગામી 48 કલાકમાં ચોમાસુ કેરળ પહોંચશે. કેરળના દક્ષિણ સમુદ્રી વિસ્તારો અને લક્ષદ્વીપમાં છેલ્લા બે દિવસથી વરસાદ પડી રહ્યો છે. દક્ષિણ-પશ્ચિમ ચોમાસુ શનિવારથી માલદીવ અને કોમોરિન વિસ્તારમાં સક્રિય છે. તે દક્ષિણ-પૂર્વ અરબ સાગર તરફ આગળ વધી રહ્યું છે. ખાનગી હવામાન સંસ્થાએ જણાવ્યું કે કેરળમાં 1 જૂન પઢી ચોમાસાની અનૂકૂળ સ્થિતિ બનશે. અરબ સાગરમાં હળવા દબાણનું ક્ષેત્ર આગામી 48 કલાકમાં સક્રિય થવાની સંભાવના છે. જેના લીધે 1 જૂને ગોવા, 2 જૂને મુંબઇ અને 3 જૂને ગુજરાત સુધી ચોમાસુ પહોંચવાની સંભાવના છે. ગુજરાતમાં સરેરાશથી વધારે વરસાદ પડશે. જ્યારે ઉત્તર અને પૂર્વના રાજ્યોમાં સરેરાશથી ઓછો વરસાદ પડશે.