ખેડૂતોની ગણતરી પ્રમાણે 22 જુનથી રાજ્યમાં દર સાલ ચોમાસું બેસી જાય છે પણ આ વખતે મધ્ય ગુજરાત,ઉત્તર ગુજરાત હજુ પણ વરસાદના અમી છાંટણા ન થતાં તાત ચિંતિત બન્યો છે.
મધ્ય ગુજરાત,ઉત્તર ગુજરાતમાં વરસાદ ખેચાયો
સૌરાષ્ટ્ર અને દક્ષિણ ગુજરાતમાં ભારે વરસાદની આગાહી
અમદાવાદ,ગાંધીનગર,વડોદરાવાસીઓએ વરસાદ માટે રાહ જોવી પડશે
સૌરાષ્ટ્ર અને દક્ષિણ ગુજરાતમાં મેઘ મહેર યથાવત છે પણ મધ્ય ગુજરાત,ઉત્તર ગુજરાત મેઘો જાણે રિસાઈને બેઠો છે. ત્યારે એક તરફ જ્યાં વરસાદ પડયો છે ત્યાંના ખેડૂતોમાં હરખની હેલી છે પણ મધ્ય ગુજરાત,ઉત્તર ગુજરાતમાં ચોમાસુ ખેંચાતા ખેડૂતોની ચિતામાં વધારો થયો છે. વરસાદી વાદળો ન રચાતા ચોમાસું આ વિસ્તારમાં પાછું ઠેલાયુ છે. જો કે 29 જૂન સુધી ચોમાસાનાં આગમનની હવામાન નિષ્ણાંતોની આગાહી કરી રહ્યા છે સાથે 3 જૂલાઈ સુધી સમગ્ર રાજ્યમાં વરસાદ પધરામણી કરશે તેવુ અનુમાન પણ લગાવાઈ રહ્યું છે. આપને એ પણ જણાવી દઈએ કે છેલ્લા 2 દિવસમાં મધ્ય અને ઉત્તર ગુજરાતમાં ગરમીનો પારો ઉચકાયો છે. અમદાવાદમાં ગરમી 2 ડિગ્રી વધીને 42ને પાર થઈ ગઈ છે. શહેરમાં છેલ્લા 2 દિવસમાં ગરમીમાં 4.5 ડિગ્રીનો વધારો થયો છે.
ચોમાસું ખેંચાવાનુ કારણ શું?
મધ્ય,ઉત્તર ગુજરાતમાં ચોમાસું ખેંચાયુ
ભેજવાળા પવન ન ફુંકાતા વાદળો વિખેરાઈ જાય છે
અરબ સાગરના સાઈક્લોનિક સર્ક્યુલેશનની અસર સીમિત
અપર એર સાઈક્લોનિક સર્ક્યુલેશનની અસરનો અભાવ
અપર એર સાઈક્લોનિક સર્ક્યુલેશનની અસર ઉત્તર,મધ્ય ગુજરાત સુધી નથી પહોંચી
વાદળો રચાય છે પરંતુ ભેજવાળા પવનના અભાવે વરસાદી વાદળો વિખરાય છે
હવામાન વિભાગની શું છે આગાહી?
ગુજરાતમાં દક્ષિણ ગુજરાત અને સૌરાષ્ટ્રમાં બરાબર ચોમાસું જામી ગયું છે. ત્યારે હવામાન વિભાગે રાજ્યમાં આગામી 5 દિવસ સુધી ભારે વરસાદની આગાહી કરી છે. હવામાન વિભાગે સૌરાષ્ટ્ર અને દક્ષિણ ગુજરાતમાં ભારે વરસાદની આગાહી કરી છે. દક્ષિણ ગુજરાતમાં સુરત, વલસાડ અને ડાંગ, નવસારી અને તાપીમાં વરસાદની આગાહી કરી છે. સાથે દાદરા નગર હવેલીમાં પણ સાર એવા વરસાદની હવામાન વિભાગે આગાહી કરી છે.બીજી બાજુ સૌરાષ્ટ્રમાં અમરેલી, ભાવનગર, જૂનાગઢ, ગીર સોમનાથ, રાજકોટ, સુરેન્દ્રનગર અને જામનગરમાં પણ સારા વરસાદની આગાહી કરાઇ છે. આથી ભારે વરસાદની આગાહી વચ્ચે માછીમારોને 3 દિવસ સુધી દરિયો ન ખેડવા અંગેની સૂચના અપાઇ છે. જો કે, બીજી બાજુ અમદાવાદ, ગાંધીનગર અને વડોદરાવાસીઓએ હજુ વરસાદ માટે રાહ જોવી પડી શકે છે.
શુક્રવારે નોંધાયેલો વરસાદ
રાજ્યમાં છેલ્લા 24 કલાકમાં રાજ્યના 69 તાલુકામાં વરસાદ થયો છે. જેમાં સૌથી વધુ નવસારીના ચિખલીમાં સવા 4 ઈંચ વરસાદ, જ્યારે ડાંગના સુબિરમાં 3.5 ઈંચ અને ઓલપાડમાં સવા 2 ઈંચ વરસાદ થયો છે. સાથે મેંદરડા અને અંકલેશ્વરમાં પોણા 2 ઈંચ વરસાદ થયો છે. ઉપરાંત ડાંગ અને ઉમરપાડામાં પોણા 2 ઈંચ વરસાદ થયો છે. સાથે જ બગસરા, ધારી અને કેશોદ 1.5 ઈંચ વરસાદ અને પલસાણા, પોરબંદર અને માંગરોળમાં સવા ઈંચ વરસાદ થયો છે. ઉપરાંત કાલાવડ, વઘઈ અને ઉચ્છલમાં 1 ઈંચ વરસાદ થયો છે.