આગાહી / ખેડૂતો માટે રાહતનો વરસાદ: નૈઋત્યનું ચોમાસું ગુજરાત તરફ આગળ વધ્યું, જુઓ આજે ક્યાં ક્યાં થઈ મેઘ મહેર

• સૌરાષ્ટ્ર અને કચ્છમાં વરસાદની આગાહી
• 14 જૂન સુધી માછીમારોને દરિયો ન ખેડવા સૂચના
• દરિયામાં 50 કિ.મી પ્રતિ કલાકે પવન ફૂંકાવવાની શક્યતા

નૈઋત્યનું ચોમાસુ ગુજરાત તરફ આગળ વધ્યું છે. ગુજરાતમાં તારીખ 15થી 20 જૂન સુધીમાં વરસાદની સંભાવના વ્યક્ત કરવામાં આવી છે.  તારીખ 13થી 14 જૂન સુધી સૌરાષ્ટ્ર અને ઉત્તર ગુજરાતમાં વરસાદ વરસી શકે છે. તો તારીખ 16થી 18 જૂન સુધીમાં દક્ષિણ ગુજરાતમાં વરસાદની સંભાવના સેવવામાં આવી છે. તારીખ 15 જૂન બાદ ગુજરાતમાં છુટો-છવાયો વરસાદ ચાલું રહેશે. ચાર દિવસ સુધીમાં નૈઋત્યનું ચોમાસુ ગુજરાત પહોંચવાની સંભાવના છે.

ગુજરાતના કયા કયા જિલ્લામાં વરસાદની પધરામણી?

• દ્વારકા: ખંભાળિયાના ગ્રામ્ય વિસ્તારમાં પવન સાથે વરસાદ શરૂ
• અમદાવાદ: સાણંદ તાલુકાના મટોડા ગામમાં વરસાદ
• રાજકોટ: ગોંડલના દેરડી, રાણસીકી સહિત, પડધરીના જીવાપર, વિભાણીયા, ખાખરા અને હડમતીયા, પીઠડીયા, કાગવડ તેમજ વીરપુર ગામમાં ધોધમાર વરસાદ શરૂ
• દાહોદ શહેરમાં વરસાદ, તેજ પવન પણ ફૂંકાયો
• અરવલ્લી: બાયડ, દખનેશ્વર સહિત અન્ય વિસ્તારમાં વરસાદ
• બોટાદ: ગઢાળી,વનાળી,ચિરોડા,સાજણાવદરમાં વરસાદ 
• અમરેલી:જામકા, સનાળી, શિલાણા, હુલરિયા ગામમાં વરસાદ
• વલસાડ અને આસપાસના વિસ્તારમાં વરસાદ
• નવસારી: ગણદેવી, ખેરગામ સહિત ખારેલ, એંધલ, વિસ્તારમાં વરસાદ
• પંચમહાલ: જાંબુઘોડા અને ઘોઘંબા, હાલોલ-કાલોલમાં વરસાદ
• મહીસાગર: ખાનપુર, કડાણા, સંતરામપુર, લીમડિયામાં વરસાદ 
• સાબરકાંઠા:જિલ્લાના 6 તાલુકાઓમાં ગાજવીજ સાથે વરસાદ, હિંમતનગર, વડાલી, વિજયનગરમાં વરસાદ
• અરવલ્લીઃ બપોર બાદ મોડાસા સહિત જિલ્લાના અનેક વિસ્તારોમાં વરસાદી માહોલ જોવા મળી રહ્યો છે. ગરમી અને બફારા બાદ વરસાદથી વાતાવરણમાં ઠંડક પ્રસરી છે.
• જામનગરમાં કૃષિ મંત્રી રાઘવજી પટેલે પ્રથમ વરસાદનો આનંદ માણ્યો. કાલાવડ, લાલપુર અને જામજોધપુર પંથકમાં વરસાદ શરૂ, અનેક વિસ્તારોમાં વાવણી લાયક વરસાદ 

વડોદરામાં વરસાદ
રાજ્યના કેટલાંક વિસ્તારોમાં વરસાદની એન્ટ્રી થઈ ગઈ છે. વડોદરામાં ભારે પવન અને ગાજવીજ સાથે વરસાદ વરસ્યો હતો. શહેરના ગોત્રી, ભાયલી, અલકાપુરી સહિતના વિસ્તારમાં વરસાદ પડ્યો હતો. વરસાદના કારણે ખેડૂતોમાં આનંદની લાગણી છવાઈ ગઈ છે. સાથે જ શહેરીજનોને ભારે બફારાથી રાહત મળી છે.

અરવલ્લીમાં મેઘ સવારી પહોંચી
અરવલ્લી જિલ્લામાં વાતાવરણમાં પલટો આવ્યો. જિલ્લાના કેટલાંક વિસ્તારમાં મોડી રાત્રે મેઘરાજાની શાહી સવારી પહોંચી હતી.. જિલ્લાના માલપુર, મેઘરજ, ઇસરી, જીતપુર, રેલ્લાવાડા પંથકમાં વરસાદી માહોલ જોવા મળ્યો.મોડાસા મોટીઇસરોલ અને આસપાસના વિસ્તારોમાં પણ વરસાદી ઝાપટા પડ્યાં હતાં.ભિલોડા પંથકમાં વરસાદી માહોલ,  સુનોખ વાશેરા કંપામાં પણ વરસાદ પડ્યો હતો... વરસાદી ઝાપટું પડતા વાતાવરણમાં ઠંડક પ્રસરી જવા પામી છે.

ડાંગમાં 2 ઈંચ વરસાદ
દક્ષિણ ગુજરાતમાં ચોમાસું જામ્યું હોય તેવા માહોલ દેખાઇ રહ્યો છે. ડાંગમાં 24 કલાકમાં 2 ઇંચથી વધુ વરસાદ ખાબક્યો છે.ડાંગના સુબિરમાં 24 કલાકમાં 57 મીમી વરસાદ નોંધાયો. સુબિરમાં વરસાદ થતાં નદીમાં નવા નીરની આવક શરૂ થઇ ગઇ છે.પૂર્ણા નદી બે કાંઠે વહેતી થઇ છે..નાના કોતરોમાં નવા નીર વહેતા જોવા મળી રહ્યા છે. ડાંગના અન્ય તાલુકામાં પણ છુટોછવાયો વરસાદ થયો છે.સુબિરમાં વીજ પડવાથી એક પાડાનું  મોત થયું હતું પાદલખડી ગામે વીજળી પડી હતી.

દેશના હવામાન વિભાગની આગાહી
દક્ષિણ-પશ્ચિમ ચોમાસાએ ગોવા બાદ હવે મુંબઈમાં એન્ટ્રી લીધી છે. ભારતીય હવામાન વિભાગે આ અંગે માહિતી આપી છે. સાથે જ ભારતીય હવામાન વિભાગે આગાહી કરી કે, ઉત્તર, પશ્ચિમ અને મધ્ય ભારતમાં પડી રહેલી લૂમાંથી સામાન્ય રાહત મળવાની સંભાવના છે. સાથે આવતા અઠવાડિયે તાપમાનમાં પણ 2થી 3 ડિગ્રી ઘટાડો થવાની સંભાવના છે. ઉપરાંત મધ્ય અરબ સાગરના ભાગ, ગોવા અને તેની પાસેના અમૂક કોંકણ વિસ્તારમાં આવતા 3-4 દિવસમાં ભારે વરસાદ થવાની આગાહી છે. આ દરમિયાન 40 કિ.મી પ્રતિ કલાકે પવન ફૂંકાવવાની શક્યતા પણ છે.