હવામાન વિભાગની આગાહી મુજબ 10 જૂનથી ગુજરાતમાં ચોમાસું વાતાવરણ થશે જયારે અંબાલાલ પટેલની આગાહી પ્રમાણે 15 જૂનની આસપાસ ગુજરાતમાં વરસાદ શરૂ થશે
ગુજરાતમાં ચોમાસુ વહેલું આવશે
જૂનના બીજા સપ્તાહમાં ચોમાસુ દસ્તક આપશે
રાજ્યના હવામાન વિભાગની આગાહી
ગુજરાતમાં હાલ ગરમીનો પ્રકોપ પુરજોશમાં જોવા મળી રહ્યો છે. હજુ પણ 5 દિવસ ખૂબની ગરમીની આગાહી કરવામા આવી છે. હવામાન વિભાગ દ્વારા વરસાદને લઈ મહત્વની જાણકારી આપવામાં આવી છે.
ગુજરાતમાં 10 જૂન બાદ ચોમાસુ દસ્તક દેશે: હવામાન વિભાગ
રાજ્યના હવામાન વિભાગે અનુમાન લગાવ્યું છે કે, ગુજરાતમાં 10 જૂન બાદ ચોમાસુ દસ્તક દેશે. આ વખતે ચોમાસું આંદામાન-નિકોબાર સુધી પહોંચી ગયું છે. જૂન મહિનાના પ્રારંભે પ્રિ-મોન્સૂન એક્ટિવ થશે. કેરળમાં પણ ચોમાસુ વહેલું આવી જશે. કેરળમાં નિયત સમય 1 જૂન કરતા 5 દિવસ વહેલા ચોમાસું આવશે. તારીખ 27મી મેએ ચોમાસું કેરળ પહોંચશે તેવી પ્રબળ શકયતા રહેલી છે. આ વર્ષે સામાન્ય કરતા પાંચ દિવસ વહેલું પહોંચશે.
આંદમાન-નિકોબાર પહોંચ્યું ચોમાસું
ચોમાસાની શરૂઆત સત્તાવાર રીતે કેરળમાં મેઘરાજાના આગમન સાથે થતી હોય છે. ત્યારે આ વર્ષે કેરળમાં ચોમાસું તેના નિયત સમય 31 મે અથવા 1 જૂન કરતા પાંચ દિવસ વહેલું એટલે કે 27 મેના રોજ પહોંચી જવાની શક્યતાઓ છે. હવામાન વિભાગના આંકલન મુજબ રાજ્યમાં ચોમાસું 15 જૂનની આસપાસ પહોંચી શકે છે. જો કે, આ ચોમાસું આંદમાન નિકોબારથી કેરળ લઇને ત્યાંથી આગળ કેટલે સુધી પહોંચે છે તેની પર સમગ્ર મદાર રહેલો છે. વર્ષ 2021માં આંદમાન-નિકોબારમાં 21 મેના રોજ ચોમાસું પહોંચ્યું હતું. આ વર્ષે સત્તાવાર રીતે ચોમાસાનું આગમન 16 મેના રોજ થયું છે.
રાજ્યમાં પ્રિમોન્સૂન એક્ટિવિટી મે મહિનાના અંત સુધીમાં થઇ શકે છે
દક્ષિણ ગુજરાતમાં 20 અને 21 મેના રોજ રહેશે વાદળછાયું વાતાવરણ
24 મેની આસપાસ રાજ્યમાં ગાજવીજ સાથે હળવો વરસાદ પડશે: અંબાલાલ
અંબાલાલે આગાહી કરતા જણાવ્યું કે, 15 જૂનની આસપાસ ગુજરાતમાં વરસાદ શરૂ થશે. જ્યારે 24 મેની આસપાસ રાજ્યમાં ગાજવીજ સાથે હળવો વરસાદ પડશે. રાજ્યમાં 24 મેથી 6 જૂન સુધીમાં પ્રિ-મોન્સુન એક્ટિવિટી શરૂ થશે. જો કે, ચોમાસા પહેલાં રાજ્યમાં હળવો ચક્રવાત આવશે. આ સાથે ઉત્તર- મધ્ય અને દક્ષિણ ગુજરાતમાં 15 જૂન પહેલાં હળવો વરસાદ વરસશે. સૌરાષ્ટ્રના દરિયાકિનારે પણ વરસાદ પહેલાં ચક્રવાત આવશે એવી અંબાલાલ પટેલે આગાહી કરી છે.
જૂનના પ્રારંભે જ પ્રી-મોન્સૂન એક્ટિવિટીનો પ્રારંભ થઇ જશે
ગુજરાતમાં સામાન્ય કરતાં વહેલું ચોમાસું બેસશે. જૂનના પ્રારંભે જ પ્રી-મોન્સૂન એક્ટિવિટીનો પ્રારંભ થઇ જશે. માત્ર કચ્છને જૂનના અંત સુધી ચોમાસાની રાહ જોવી પડશે. ગુજરાતના પૂર્વ ભાગમાં હાલ વરસાદ સારો જણાય છે. પરંતુ સૌરાષ્ટ્ર-કચ્છમાં વરસાદ સામાન્ય કરતાં ઓછો પડી શકે છે. અમદાવાદમાં 43-44ની આસપાસ જ હવે તાપમાન રહેશે. કારણ કે, આગામી 3-4 દિવસમાં દક્ષિણ પશ્ચિમ અને પશ્ચિમ દિશાનો પવન ફુંકાવવાનો શરૂ થઇ જશે. જેના કારણે અરબી સમુદ્રમાંથી જે હવા આવશે તે તાપમાન વધવા નહીં દે.'
ભારતમાં ચોમાસાની ગતિવિધિ સમજો
ભારતમાં કુલ બે પ્રકારનું ચોમાસુ જોવા મળે છે
એક ચોમાસુ નૈઋત્યનું ચોમાસુ અને બીજુ ઈશાન ચોમાસુ
નૈઋત્યના ચોમાસાનો સમયગાળો જૂનથી સપ્ટેમ્બરનો હોય છે
ઈશાન ચોમાસાનો સમયગાળો ઓક્ટોબરથી ડિસેમ્બરનો હોય છે
નૈઋત્યના ચોમાસાને સમર મોન્સૂન પણ કહે છે
ઈશાન ચોમાસાને વિન્ટર મોન્સૂન કહે છે
નૈઋત્યનું ચોમાસુ દક્ષિણ-પશ્ચિમ ચોમાસા તરીકે પણ ઓળખાય છે
ઈશાન ચોમાસુ ઉત્તર-પૂર્વના ચોમાસા તરીકે પણ ઓળખાય છે
ભારતમાં જનજીવનને અસર કરતું ચોમાસુ નૈઋત્યનું ચોમાસુ છે
દેશના 75 ટકા વિસ્તારમાં આ સમયગાળામાં વરસાદ પડે છે
ઈશાન ચોમાસુ દક્ષિણના રાજ્યો ઉપર વધુ પ્રભાવી છે
તમિલનાડુ, તટીય આંધ્રપ્રદેશ અને કર્ણાટકના આંતરિક વિસ્તારમાં ઈશાન ચોમાસુ પ્રભાવી છે
ઈશાન ચોમાસામાં દક્ષિણના રાજ્યમાં 48 ટકાથી વધુ વરસાદ પડે છે
દેશના મોટાભાગના વિસ્તાર માટે સમર મોન્સૂન અગત્યનું છે
તમિલનાડુ, આંધ્રપ્રદેશ, કર્ણાટક માટે વિન્ટર મોન્સૂન વધુ અગત્યનું છે