રાજ્યમાં હાલ ગરમી અને ઠંડીનો સાથે અનુભવ થઇ રહ્યો છે. ત્યારે હવામાન વિભાગે આગાહી કરી છે કે, આગામી 5 દિવસ તાપમાનમાં વધારો-ઘટાડો યથાવત રહેશે.
રાજ્યમાં હવામાનને લઈને હવામાન વિભાગની આગાહી
આગામી 5 દિવસ તાપમાનમાં વધારો ઘટાડો યથાવત રહેશે
વહેલી સવારે ઠંડી અને બપોરે ગરમીનો થશે અનુભવ
ગુજરાતમાં હજુ સવારના સમયગાળામાં ઠંડીનો ચમકારો વર્તાઈ રહ્યો છે. જોકે, દિવસ દરમિયાન ગરમીની અસર વધતી જાય તો રાતે ફરી વાતાવરણમાં ઠંડક પ્રસરે છે. આમ અત્યારે તો ડબલ ઋતુ ચાલી રહી છે. આ દરમિયાન રાજ્યમાં હવામાનને લઈને હવામાન વિભાગે આગાહી કરી છે કે આગામી 5 દિવસ તાપમાનમાં વધારો-ઘટાડો યથાવત રહેશે. ક્યાંક એક બે ડિગ્રી તાપમાનમાં વધારો થશે તો ક્યાંક થોડો ઘટાડો થઇ શકે છે.
અમદાવાદમાં વહેલી સવારે ઠંડીનો અનુભવ
આજે વહેલી સવારે અમદાવાદમાં ઠંડીની તીવ્રતામાં સહેજ વૃદ્ધિ થઈ છે. પવનની ગતિ વધુ હોવાથી વહેલી સવારે ઠંડીનો ચમકારો અનુભવાયો છે. 24 કલાકમાં અમદાવાદમાં તાપમાન 3 ડિગ્રી સુધી ઘટ્યું છે. આજે વહેલી સવારે ઠંડી અને બપોરે ગરમીનો અનુભવ છે.
હવામાન નિષ્ણાતોની આગાહી
રાજ્યમાં આ મહિનાના અંત સુધીમાં ઠંડીના વધતા-ઓછા ચમકારા અનુભવાશે તેવી હવામાન નિષ્ણાતોની આગાહી છે. કેટલાક હવામાન નિષ્ણાતોએ તો ઠંડીના નવા રાઉન્ડ ઉપરાંત કમોસમી વરસાદની પણ શક્યતા દર્શાવી છે. બીજા અર્થમાં આ વખતે શિયાળો લાંબા સમય સુધી રહેવાનો છે. સામાન્ય રીતે મહાશિવરાત્રી પછી ગરમીનો પારો ઊંચકાય છે. આગામી તા.18 ફેબ્રુઆરીએ મહાશિવરાત્રી છે, પરંતુ મહાશિવરાત્રીના પાવન પર્વ બાદ પણ ઠંડીની અસર રહે તેમ હવામાન વિભાગની આગાહી જોતાં લાગે છે.
બુધવારે નોંધાયું હતું આટલું તાપમાન
હવામાન ખાતાના આંકડા મુજબ બુધવારના રોજ અમદાવાદ સહિત રાજ્યના કુલ 11 શહેરોમાં મહત્તમ તાપમાન 33 ડિગ્રીને પાર અને અન્ય શહેરોમાં પણ પારો 32 ડિગ્રીને પાર પહોંચી ગયો છે. મહત્વનની વાત એ છે કે, 24 કલાકમાં મહત્તમ તાપમાનનો પારો ઉચકાયો છે. જ્યારે બીજી તરફ લધુત્તમ તાપમાનનો પારો સામાન્ય ગગડ્યો છે. બુધવારે અમદાવાદમાં લઘુત્તમ તાપમાન 16.2 ડિગ્રી નોંધાયું હતું.