મેઘસંકેત / તૈયારીમાં રહેજો! ગુજરાતના 9 જિલ્લાઓમાં 3 દિવસ પડશે ભારે વરસાદ, હવામાન ખાતાની નવી આગાહી

• ગુજરાતમાં ફરી જામશે વરસાદ
• આજે અને આવતીકાલે થઈ શકે છે ભારે વરસાદ
• મધ્ય અને ઉત્તર ગુજરાતમાં થઈ શકે છે વરસાદ

ગુજરાતમાં ફરી વરસાદી માહોલ જામ્યો છે. ઓગસ્ટ મહિનાની શરૂઆતમાં હવામાન ખાતાએ આગાહી કરી હતી કે આ મહિનામાં ભારે વરસાદની શક્યતા ઓછી છે પણ 5 ઓગસ્ટ બાદ વરસાદી સિસ્ટમ ગુજરાતમાં સક્રિય થઈ છે. જે બાદ હવામાન વિભાગની આગાહી મુજબ અનેક જગ્યાએ વરસાદ બઘડાટી બોલાવી રહ્યો છે.

ત્રણ દિવસ મેઘો ગુજરાતને ઘમરોળશે
હવામાન વિભાગે સમગ્ર રાજ્યમાં આગામી ત્રણ દિવસથી ભારેથી અતિભારે વરસાદની આગાહી કરી છે. 8,9,10 ઓગસ્ટે રાજ્યમાં અનેક જગ્યાએ વરસાદની ધમાકેદાર એન્ટ્રી થશે. આ મહિનાથી અત્યારસુધી ગુજરાતમાં છૂટો છવાયો વરસાદ પડ્યો છે. જેથી ખેડૂતોના પાક કોઈ ખતરો ઊભો થયો નથી પણ હવામાન વિભાગની આગાહી મુજબ ગુજરાતમાં વરસાદનું જોર ફરી વધી શકે છે. 9 જિલ્લામાં ભારે વરસાદ ખાબકી શકે છે. જેમાં ખાસ કરીને દ.ગુજરાત અને સૌરાષ્ટ્રમાં ભારે વરસાદની આગાહી છે. મધ્ય અને ઉત્તર ગુજરાત વરસાદી ઝાપટાં જોવા મળી શકે છે.

સોમવારે આ વિસ્તારમાં વરસાદ થશે

• સુરત, ડાંગ, તાપી, નવસારી, વલસાડ
• પોરબંદર, જૂનાગઢ, અમરેલી, ગીરસોમનાથ
• દીવ,ગાંધીનગર,ખેડા,અમદાવાદ,આણંદ
• ભરૂચ,ભાવનગર,બોટાદ,દમણ

મંગળવારે આ વિસ્તારમાં વરસાદ થશે

• નવસારી, વલસાડ, પંચમહાલ, વડોદરા
• સુરત, ડાંગ,છોટાઉદેપુર,નર્મદા
• તાપી, સુરેન્દ્રનગર, અમરેલી,ભાવનગર
• બોટાદ,અરવલ્લી, ખેડા,અમદાવાદ,આણંદ

10 ઓગસ્ટ સુધી અતિભારે વરસાદની શક્યતા: અંબાલાલ પટેલ
અંબાલાલ પટેલની આગાહી મુજબ રાજ્યના અમુક વિસ્તારમાં 6 ઈંચથી વધુ વરસાદ પડશે જ્યારે તાપી અને નર્મદા નદીના જળસ્તરમાં પણ વધારો થશે. આગામી તારીખ 10 ઓગસ્ટ સુધી દક્ષિણ ગુજરાતમાં પણ અતિભારે વરસાદની શક્યતા રહેલી છે. જ્યારે દક્ષિણ સૌરાષ્ટ્રના ભાગોમાં ભારેથી અતિભારે વરસાદની સંભાવના રહેલી છે.

પાક નુકસાની સહાય ટુંક સમયમાં થશે જાહેર
ગુજરાતમાં અતિવૃષ્ટિથી પાક નુકસાની મામલે કૃષિ વિભાગે 8 જિલ્લામાં સરવેની કામગીરી પૂર્ણ કરી છે. કચ્છ જિલ્લામાં હજુ પણ કામગીરી ચાલી રહી છે. રાજ્યના 4000 ગામમાં ભારે વરસાદને કારણે પાક નુકસાની થઈ હતી. સર્વેનું સપૂર્ણ કામગીરી પૂર્ણ થયે સહાયની જાહેરાત કરવામા આવશે.