બે દાયકાથી બાર્સિલોના ક્લબનો હિસ્સો રહેલો મહાન ફૂટબોલર લિયોનેલ મેસ્સી હવે ક્લબને અલવિદા કહેવા ઇચ્છે છે. ક્લબે આ અંગેની જાણકારી મીડિયાને આપી છે. ક્લબે જણાવ્યું છે કે મેસ્સીએ કેટલાક દસ્તાવેજ મોકલીને ક્લબ છોડવાની વાત કહી છે. મેસ્સીની ક્લબ છોડવાની આ જાહેરાત બાયર્ન મ્યુનિચ સામે થયેલા કારમા પરાજયના થોડા દિવસ બાદ આવી છે. ચેમ્પિયન્સ લીગની ક્વાર્ટર ફાઇનલમાં બાયર્ન મ્યુનિચ સામે બાર્સિલોના ક્લબ 8-2થી હારી ગઈ હતી. આ ખેલાડી તરીકે મેસ્સીની કરિયર અને ક્લબની સૌથી મોટી હાર છે.
2 દાયકા બાદ મેસીએ કહ્યું અલવિદા
મેસી બાર્સિલોનાનો બેસ્ટ ફૂટબૉલર
હવે મેસીને કરશે ચાહકો યાદ
તાજેતરમાં સ્પેનની ફૂટબોલ ક્લબ એફસી બાર્સિલોનાના અધ્યક્ષ મારિયા બાટરેમેને મેસ્સીની ક્લબ છોડવાની અફવાઓનું ખંડન કર્યું હતું. મારિયાના જણાવ્યા અનુસાર મેસ્સી બાર્સિલોના સાથે રહીને જ પોતાની કરિયરનું સમાપન કરવા ઇચ્છે છે.
મેસ્સી અંગે છેલ્લાં કેટલાંક વર્ષથી નવી સિઝનની શરૂઆત પહેલાં અફવાઓ અને અટકળો લગાવાઈ રહી છે, પરંતુ આ વખતે ખુદ મેસ્સીએ ક્લબ સામે આ વાત રાખી છે. આ સાથે જ માન્ચેસ્ટર સિટી, પીએસજી જેવી નાણાકીય રીતે સધ્ધર ક્લબ મેસ્સીને પોતાની ટીમમાં સામેલ કરવા માટે લાઇન લગાવીને ઊભી છે. ગત સપ્તાહે જ બાર્સિલોનાના નવા કોચ રોનાલ્ડ કોમન સાથે મેસ્સીની વાતચીત બાદ એવું માનવામાં આવી રહ્યું હતું કે આર્જેન્ટિનાનો આ દિગ્ગજ ખેલાડી હાલ બાર્સિલોનામાં જ રહેશે, પરંતુ મેસ્સી અને ક્લબના આ ખુલાસાથી બાર્સિલોના અને મેસ્સીના ચાહકોમાં નિરાશા વ્યાપી ગઈ છે.
બાર્સિલોના તરફથી મેસ્સીએ 634 ગોલ કર્યા
મેસ્સીએ બાર્સિલોના તરફથી 18 વર્ષની ઉંમરે 16 ઓક્ટોબર, 2004ના રોજથી રમવાનું શરૂ કર્યું હતું. ત્યારથી અત્યાર સુધીમાં તેણે બાર્સિલોના તરફથી 731 મેચમાં 634 ગોલ કર્યા છે અને 276 ગોલ આસિસ્ટ કર્યા છે. આ દરમિયાન તેણે ટીમને 10 લા લિગા અને ચાર યુઈએફએ ચેમ્પિયન્સ લીગ સહિત 34 ખિતાબ અપાવ્યા છે.
મેસ્સીને ખરીદવો આસાન નથી
બાર્સિલોના સાથે 2021 સુધી મેસ્સીનો કરાર છે અને તેને ખરીદવો કોઈ પણ ક્લબ માટે આસાન વાત નથી, કારણ કે મેસ્સીની ટ્રાન્સફર ફી અત્યંત ઊંચી હશે. એક અનુમાન પ્રમાણે કોઈ પણ ક્લબ જો મેસ્સીને ખરીદવા ઇચ્છતી હોય તો તેને ટ્રાન્સફર ફી તરીકે બાર્સિલોનાને લગભગ 700 મિલિયન યૂરો એટલે કે 6160 કરોડ રૂપિયા ચૂકવવા પડશે.