ઝબ્બે / હવે બનાસકાંઠામાં ઝડપાયું મેફેડ્રોન ડ્રગ્સ, 2.44 લાખની કિંમતના ડ્રગ્સ સાથે યુવક ઝડપાયો

• બનાસકાંઠામાં યુવક ડ્રગ્સ સાથે ઝડપાયો
• થરાદ-ખોડા ચેકપોસ્ટ પરથી યુવકની ધરપકડ
• રૂ.2.44 લાખનો મુદ્દામાલ જપ્ત

એક તરફ દરિયાઈ સીમા પરથી ડ્રગ્સની મોટી ખેપનો પર્દાફાશ થઈ રહ્યો છે. તો બીજી તરફ આંતરરાજ્ય ડ્રગ્સ હેરાફેરી પર પણ સંકજો કસાયો છે. બનાસકાંઠા રાજસ્થાન બોર્ડરથી નજીક હોવાથી ડ્રગ્સની મોટા પાયે હેર ફેર થતી હોય તેવી શક્યતાઓ છે. ત્યારે બનાસકાંઠામાં વધુ એક વખત એમડી ડ્રગ્સનો જથ્થા સાથે આરોપી યુવકની ધરપકડ કરવામાં આવી છે.

થરાદ-ખોડા ચેકપોસ્ટ પર રૂપિયા 2.44 લાખનું ડ્રગ્સ ઝડપાયું
બનાસકાંઠામાં મેફેડ્રોન ડ્રગ્સ સાથે યુવકને ઝડપી લેવામાં આવ્યો છે. થરાદ-ખોડા ચેકપોસ્ટ પરથી એક યુવકને 24 ગ્રામ મેફેડ્રોન ડ્રગ્સ સાથે ઝડપી લેવામાં આવ્યો છે.થરાદ પોલીસે યુવકની NDPS ઍક્ટ હેઠળ ગુનો નોંધીને ધરપકડ કરીને વધુ કાર્યવાહી હાથ ધરી છે. ઉલ્લેખનીય છે કે યુવક પાસેથી ઝડપાયેલ ડ્રગ્સની બજાર કિંમત આશરે રૂ.2.44 લાખ જેટલી થાય છે

ગત મહિનામાં ડીસા તાલુકામાંથી મળ્યું હતું ડ્રગ્સ
12 ઓકટોબરના રોજ બનાસકાંઠાના ડીસામાં આંતરરાજ્ય ડ્રગ્સ હેરાફેરીનો પર્દાફાશ થયો હતો. ડીસા તાલુકા પોલીસે મેફેડ્રોન ડ્રગના જથ્થા સાથે 4 લોકોને ઝડપી પાડ્યા હતા. ડીસા તાલુકા પોલીસે કંસારી ત્રણ રસ્તા પાસેથી આરોપીઓને 117 ગ્રામથી વધુ ડ્રગના જથ્થા સાથે ઝડપી પાડ્યા હતા. પોલીસે આરોપીઓ પાસેથી એક લેપટોપ અને ગાડી સહિત કુલ 15 લાખથી વધુનો મુદ્દામાલ જપ્ત કર્યો હતો. પોલીસે ભવરલાલ જાટ, હનુમાનરામ જાટ, રતનલાલ નાઈ અને હનુમાનરામ જાટની ધરપકડ કરીને કાયદેસરની કાર્યવાહી હાથ ધરી હતી.