ક્રિકેટ / મેલબર્ન ટેસ્ટ માટે ટીમ ઈન્ડિયાના પ્લેઈંગ ઈલેવનની થઈ જાહેરાત, જાણો કોને મળ્યો મોકો અને કોણ રહી ગયું

• મેલબર્ન ટેસ્ટ માટે ટીમ ઈન્ડિયાના પ્લેઈંગ ઈલેવનની થઈ જાહેરાત
• આ મેચમાં વિરાટ કોહલીની જગ્યા અજિંક્ય રહાણે કેપ્ટનની જગ્યા લેશે

યુવા બેટ્સમેન શુભમન ગિલને ટેસ્ટમાં ડેબ્યૂ કરવાની તક મળી છે. પૃથ્વી શોની જગ્યાએ શુભમન ગિલને પ્લેઈંગ ઈલેવનમાં સામેલ કરવામાં આવ્યો છે. આશ્ચર્યજનક વાત એ છે કે કેએલ રાહુલની શ્રેષ્ઠ ફોર્મમાં હોવા છતાં મેલબર્ન ટેસ્ટમાં તેની પસંદગી થઈ નથી. વિરાટની ગેરહાજરીમાં કેએલ રાહુલ સૌથી મજબૂત બેટ્સમેન છે.

મેલબર્ન ટેસ્ટ માટે ટીમ ઈન્ડિયાના પ્લેઈંગ ઈલેવનમાં ચાર ફેરફાર કરવામાં આવ્યા છે. શુભમન ગિલ પૃથ્વી શોની જગ્યાએ મયંક અગ્રવાલ સાથે ઓપનિંગ કરશે. વિકેટકીપર બેટ્સમેન તરીકે ઋષભ પંતને પ્લેઈંગ ઈલેવનમાં સામેલ કરવામાં આવ્યો છે. પ્લેઈંગ ઈલેવનમાંથી ઋદ્ધિમાન સાહાને બહાર કરી દેવામાં આવ્યો છે.

ALERT🚨: #TeamIndia for 2nd Test of the Border-Gavaskar Trophy against Australia to be played in MCG from tomorrow announced. #AUSvIND pic.twitter.com/4g1q3DJmm7

— BCCI (@BCCI) December 25, 2020

જાણો કોને મળ્યો મોકો

1. અજિંક્ય રહાણે (કેપ્ટન), 2. મયંક અગ્રવાલ, 3. શુભમન ગિલ (ડેબ્યુ), 4. ચેતેશ્વર પુજારા (ઉપ-કેપ્ટન), 5. હનુમા વિહારી, 6. ઋષભ પંત (વિકેટકીપર) 7. રવિન્દ્ર જેડજા, 8. આર અશ્વિન, 9. ઉમેશ યાદવ, 10. જસપ્રીત બુમરાહ, 11. મોહમ્મદ સિરાજ (ડેબ્યુ)

શમીની જગ્યાએ સિરાજ ટીમમાં રમશે

કાંડામાં ઈજાના કારણે 6 અઠવાડિયાથી ટીમ ઈન્ડિયાની બહાર રહેલાં મોહમ્મદ શમીની જગ્યાએ ફાસ્ટ બોલર મોહમ્મદ સિરાજને ડેબ્યૂ કરવાની તક મળી છે. વિરાટ કોહલીની જગ્યાએ ઓલરાઉન્ડર રવિન્દ્ર જાડેજાને પ્લેઇંગ ઇલેવનમાં સામેલ કરવામાં આવ્યો છે. કેપ્ટન વિરાટ કોહલી હવે ઓસ્ટ્રેલિયા સામે ભારતીય ટેસ્ટ ટીમનો હિસ્સો નથી. કોહલી પોતાના પહેલાં બાળકના જન્મ માટે ભારત પરત આવ્યો છે. વિરાટ કોહલીની ગેરહાજરીમાં અજિંક્ય રહાણે ત્રીજી વખત ટેસ્ટ ટીમમાં કેપ્ટન બનશે.

પ્રેક્ટિસ મેચમાં સિરાજ અને શુભમન ચમક્યા

મેલબર્નમાં ડેબ્યૂ કરવા જઈ રહેલાં યુવા બેટ્સમેન શુભમન ગિલે ટેસ્ટ સીરિઝ પહેલાં રમાયેલી ડે નાઇટ પ્રેક્ટિસ મેચમાં 43 અને 65 રન બનાવ્યા હતા. આ શાનદાર પ્રદર્શનને કારણે શુભમન ગિલને ટેસ્ટ ડેબ્યૂ કરવાની તક મળી. બીજી તરફ 26 વર્ષના ફાસ્ટ બોલર મોહમ્મદ સિરાજે ટેસ્ટ સીરિઝ પહેલાં રમવામાં આવેલી પ્રેક્ટિસ મેચોમાં કુલ 5 વિકેટ લીધી હતી, જેમાં પ્રથમ પ્રેક્ટિસ મેચમાં તેની ઇનિંગમાં ત્રણ વિકેટ સામેલ હતી. સિરાજે 38 પ્રથમ વર્ગ મેચોમાં 23.44 ની સરેરાશથી 152 વિકેટ ઝડપી છે.

ઋદ્ધિમાન સહાની જગ્યાએ પંતને તક મળી

સીનિયર વિકેટકીપર ઋદ્ધિમાન સાહાને ટીમમાંથી બહાર થવું પડ્યું છે. વિકેટકીપર ઋદ્ધિમાન સાહાએ એડિલેડ ટેસ્ટની પહેલી ઈનિંગમાં 9 અને બીજી ઈનિંગમાં 4 રન બનાવ્યા હતા, જેનાથી તેના સિલેક્શન પર પણ સવાલો ઉભા થયા. મેલબોર્નમાં ઋષભ પંતને ઋદ્ધિમાન સાહાની જગ્યાએ વિકેટકીપર બેટ્સમેન તરીકે સામેલ કરવામાં આવ્યો છે.