ઉડતા 'ગુજરાત' / ગુજરાતમાં નશાનો વેપાર! ઊંઝામાંથી ઝડપાયો 30 લાખથી વધુ કિંમતનો MD ડ્રગ્સનો જથ્થો, પોલીસે 2 આરોપીને દબોચ્યા

• મહેસાણાના ઊંઝામાં SOGએ ઝડપ્યો MD ડ્રગ્સનો જથ્થો
• ઊંઝામાં MD ડ્રગ્સનો 304.58 ગ્રામ જથ્થો ઝડપાયો
• ડ્રગ્સ ડિલર મહેસાણા અને પાટણ જિલ્લામાં ડ્રગ્સ સપ્લાય કરતા

મહેસાણાના ઉંઝામાં મહેસાણા SOGએ MD ડ્રગ્સનો મસમોટો જથ્થો ઝડપી પાડ્યો છે. મહેસાણાના ઊંઝામાં MD ડ્રગ્સનો 304.58 ગ્રામ જથ્થો ઝડપાયો છે. રૂપિયા 30 લાખની કિંમતનું ડ્રગ્સ ઊંઝામાંથી ઝડપાયું છે. ડ્રગ્સ ડિલર મહેસાણા અને પાટણ જિલ્લામાં ડ્રગ્સ સપ્લાય કરતા હતાં. એક સગીર સહિત બે આરોપીઓ ડ્રગ્સ વેચતા ઝડપાયા છે.

MD ડ્રગ્સના જથ્થાની બજાર કિંમત અંદાજે 30 લાખ કરતા વધુ

વિગતવાર જણાવીએ તો, ઊંઝાના નિલકંઠ મહાદેવ મંદિર પાછળ એક બંધ ફેક્ટરીના ધાબા પર  MD ડ્રગ્સનો કાળો કારોબાર ચાલતો હોવાની મહેસાણા SOG પોલીસને બાતમી મળી હતી. આ બાતમીના આધારે SOG દ્વારા ઘટનાસ્થળે રેડ પાડવામાં આવી હતી. જ્યાં રાજસ્થાનના બે શખ્સોને MD ડ્રગ્સના જથ્થા સાથે ઝડપી લેવાયા છે. કુલ 300 ગ્રામ કરતા વધુનો MD ડ્રગ્સનો જથ્થો ઝડપી લેવાયો છે. જેની બજાર કિંમત અંદાજે 30 લાખ કરતા વધારે થાય છે.

બંને આરોપીઓ ડ્રગ્સના નાના પેકેટ મહેસાણા-પાટણ જિલ્લામાં સપ્લાય કરતા

જે આરોપીઓ ઝડપાયા છે તે આરોપીઓ MD ડ્ર્ગ્સના જથ્થાના નાના પેકેટ તૈયાર કરીને મહેસાણા અને પાટણ જિલ્લામાં સપ્લાય કરતા હોવાનું હાલ પ્રાથમિક તપાસમાં સામે આવ્યું છે. જો કે, એક આરોપી સગીર વયનો છે. હાલમાં આ મામલે બંને આરોપીઓની ધરપકડ કરી લેવામાં આવી છે. બંને આરોપીઓ જે જગ્યાએથી માલ લાવતા હતા તે અન્ય બે શખ્સો હાલ ફરાર થઇ ગયા છે. આથી, પોલીસે હાલમાં કુલ 4 શખ્સો વિરૂદ્ધ ગુનો નોંધી વધુ તપાસ હાથ ધરી છે.

ઉલ્લેખનીય છે કે, તાજેતરમાં જ કચ્છના દરિયાઇ જખૌ વિસ્તારમાંથી બીએસએફ અને પોલીસ પેટ્રોલિંગ દરમિયાન ડ્રગ્સ મળી આવ્યું હતું. અત્યાર સુધી સર્ચ દરમ્યાન 1 KGના 48 પેકેટ મળી આવ્યા હતાં. નોંધનીય છે કે, અમદાવાદમાં 'ડ્રગ્સ ડિટેક્ટ કીટ'નો ઉપયોગ કરી અમદાવાદ SOGએ નવતર પ્રયોગ હાથ ધર્યો છે. જેના દ્વારા હવે 9 મિનિટમાં જ ડ્રગ્સના સેવનની જાણકારી મેળવી શકાશે. ડ્રગ્સ ડિટેક્ટ કીટનો ઉપયોગ કરીને સરળતાથી ડ્રગ્સ લેનારી વ્યક્તિને ઝડપી લેવાશે. મહત્વનું છે કે, એ માટે અમદાવાદના કેટલાંક વિસ્તારોમાં આજે તપાસ હાથ ધરવામાં આવી. અમદાવાદના જમાલપુર, કાલુપુર, દરિયાપુર અને શાહપુરમાં ડ્રગ્સ ડિટેક્ટ કીટ દ્વારા તપાસ હાથ ધરાતા શહેરમાંથી એક વ્યક્તિ પોઝિટિવ મળી આવ્યો હતો.