ખેલાડીઓને એક મેચ રમવાના 400 રૂપિયા આપવામાં આવતા હતા, યુ ટ્યુબ પર લાઈવ પ્રસારણ કરી રશિયાના નાગરિકોને છેતરવામાં આવતા
મહેસાણામાં મોટું ક્રિકેટ સટ્ટાનું રેકેટ ઝડપાયું
IPL જેવી મોટી મેચ કહી રશિયનોના કરોડો પડાવી લીધા
રશિયામાં બેઠેલા સટ્ટોડિયા કોલ મેચ ફિક્સ કરતાં
આંતરરાષ્ટીય સ્તરે અને IPL જેવી ક્રિકેટ મેચમાં તો સટ્ટો રમવાના અનેક બનાવ તમે જોયા અને સાંભળ્યા હશે.પણ મહેસાણાના વડનગર તાલુકાના મોલિપુર ગામમાં પકડાયેલો ક્રિકેટ સટ્ટો ભલભલા સટ્ટોડિયા ને પણ માથું ખંજવાળતા કરી મૂકે તેવો છે. આ ગામમાં ક્રિકેટ સટ્ટો રમાડવા માટે ખેતરમાં મેદાન બનાવાયું..અને તેનું લાઈવ ટેલિકાસ્ટ કરી રશિયામાં બેઠેલા સટ્ટોડિયાની મદદથી મેચ ફિક્સ કરી સટ્ટો રમવામાં આવતો. મહેસાણા SOG પોલીસને ખેતરમાં સટ્ટો રમવા માટે બનાવેલા મેદાનની જાણ થઈ ત્યારે રેડ કરી 4 જેટલા શખ્સને ઝડપી લીધા છે.
કેવી રમાડાતો હતો સટ્ટો?
આ મામલો છે વડનગર તાલુકાના મોલિપુર ગામનો.વડનગર તાલુકાના મોલિપુર ગામમાંથી પકડાયેલો ક્રિકેટ સટ્ટો અન્ય ક્રિકેટ સટ્ટા કરતાં ચોંકાવનારો છે.આપણે ત્યાં IPLઅને અન્ય આંતરરાષ્ટ્રીય ક્રિકેટ મેચમાં અનેક વખત ક્રિકેટ સટ્ટો પકડાયો છે.પણ મોલિપુર ગામમાં પકડાયેલા ક્રિકેટ સટ્ટાએ પોલીસને પણ વિચારતી કરી દીધી છે. આ ગામમાં દાવડા સોએબ અબ્દુલ મજીદ નામના શખ્સે સટ્ટો રમાડવા માટે આખું મેદાન તૈયાર કર્યું હતું.અને આ મેદાનમાં 20 ઓવરની મેચ રમવામાં આવતી. જો કે મેચ રમવા માટે આવતા તમામ ખેલાડીને કેવી રીતે રમવું ક્યારે આઉટ થવું અને ક્યારે કેટલા રન કરવા તેની સૂચના પહેલેથી જ આપવામાં આવતી.
કેવી રીતે થતું હતું મેચની ટેલિકાસ્ટ
આ મેચનું લાઈવ ટેલિકાસ્ટ કરવામાં આવતું. આ માટે CRICHEROES નામની એપ્લિકેશન ઉપર સેન્ચ્યુરી હિટર નામની ટીમ રજીસ્ટર્ડ કરવામાં આવી હતી.આ ટીમ માટે મહમદ સાકીબ નામના શખ્સનું ટેલિગ્રામ એકાઉન્ટ ઓપન રાખી રશિયામાં બેઠેલા આસિફ મહમદ નામના શખ્સ ની સૂચના મુજબ મેચ રમવામાં આવતી.
ખેલાડીઓને એક મેચ રમવાના 400 રૂપિયા અપાતા
ક્રિકેટ સટ્ટો રમવા માટે અલગથી સારું મેદાન પણ બનાવ્યું હતું જેમાં રમવા માટે ખેલાડીઓને 400 રૂપિયા અપાતા હતા. અંપાયારને રશિયાથી અપાતી સુચના મળે તેનું મેચમાં પાલન કરી હાર જીત અને દડે કેટલા રન તે નક્કી કરવામાં આવતા હતા..સૂચના મુજબ વિકેટ આપવામાં ફેકી દેવામાં આવતી હતી. આ પ્લાનિંગ ક્રિકેટ મેચના સટ્ટામાં બધુ જ પહેલેથી જ નક્કી હોતું અને સટ્ટોડિયાઓ લાખો કમાઈ લોકોને છેતરતા હતા.
પોલીસે બાતમીને આધારે પકડ્યું સમગ્ર રેકેટ
મહેસાણા એસ ઓ જી પોલીસે બાતમી આધારે આ આખા રેકેટ ની પકડી લીધું છે.તો હાલમાં પોલીસ દ્વારા 4 શખ્સ ની સ્થળ ઉપર થી 3 લાખ કરતા વધુના મુદ્દામાલ સાથે ધરપકડ કરવામાં આવી છે.તો રશિયામાં બેઠેલા શખ્સને વોન્ટેડ દર્શાવાયો છે.પોલીસ દ્વારા પકડાયેલા શખ્સો દ્વારા કેટલા સમય થી અને કેટલી રકમ નો સટ્ટો રમવામાં આવ્યો તેની હાલમાં તપાસ હાથ ધરવામાં આવી છે.જો કે મહેસાણા જિલ્લામાં પકડાયેલા આ સટ્ટા એ સૌ કોઈને વિચારતા કરી દીધા છે