ભાંડો ફૂટ્યો / અધિકારીઓએ રેડ પાડી તો કડી પોલીસે દારૂ નાંખી દીધો કેનાલમાં, આ ખાસ ટૅકનિકથી શોધી કઢાયો

• દારૂના વેચાણ મામલે કડી પોલીસની પોલ ખુલી
• ગાંધીનગર NDRFની ટીમે કેનાલમાં ફેંકી દેવાયેલો દારૂ શોધી કાઢ્યો
• વિશેષ કેમેરાની મદદથી 100 બોટલ દારૂ શોધી કાઢ્યો 

લૉકડાઉનમાં કડી પોલીસે ઝડપાયેલા દારૂને વેચવાનું કારસ્તાન સામે આવ્યું છે. પોલીસ સ્ટેશનમાં મુદ્દામાલ તરીકે રાખવામાં આવેલા દારૂને વેચવા માટે સગેવગે કરી દેવામાં આવ્યો હતો. આ અંગે ગાંધીનગર સુધી ફરિયાદ થતા IG સહિતના અધિકારીઓએ કડીમાં ધામા નાખ્યા છે. સમગ્ર મામલે મહેસાણા એસપીના બદલે ગાંધીનગર એસપી મયુરસિંહ ચાવડાને તપાસ સોંપવામાં આવી હતી. SPની ટીમે દારૂના ખાલી ખોખા કેનાલ નજીકથી કબ્જે કર્યા છે. તપાસને પગલે કડી PI ઓ.એમ.દેસાઇ અને PSI સહિતના અધિકારીઓ મોબાઇલ સ્વીચ ઓફ કરીને ભૂગર્ભમાં ઉતરી ગયા છે. જોકે આ ઘટના અંગે પોલીસ અધિકારીઓ કંઇ પણ કહેવાનો ઇન્કાર કરી રહ્યા છે. કડી સર્વ વિદ્યાલયની સ્કૂલ બસમાં દારૂ સપ્લાય થતો હતો. 

કેનાલમાં ફેંકી દેવાયેલો કેવી રીતે શોધી કઢાયો?

દારૂના વેચાણ મામલે કડી પોલીસની પોલ ખુલી ગઇ છે. પોલીસને બાતમી મળી હતી કે પોલીસ દ્વારા ગોડાઉનમાંથી વેચવા કાઢેલો વિદેશી દારૂનો જથ્થાના ખાલી બોક્સ અમદાવાદથી કડી જવાના રોડ પર થોળ પાસે નર્મદા કેનાલ પાસે પડ્યા છે. આ માહિતી આધારે પોલીસની ટીમો કેનાલ પાસે પહોંચી હતી. પોલીસે અમદાવાદ ફાયર બ્રિગેડના તરવૈયા અને ગાંધીનગર NDRFએ વિશેષ કેમેરાની મદદથી કેનાલમાં ફેંકી દેવાયેલો 100 બોટલ દારૂ શોધી કાઢ્યો છે. ત્યારે હજુ પણ કેનાલમાં શોધખોળ યથાવત્ છે. જો કે પોલીસ દ્વારા જ આ ગોરખધંધો આચરવામાં આવ્યો હોવાથી પોલીસની આબરુ બચાવવા માટે ઉચ્ચ પોલીસ અધિકારીઓ ભારે મૌન સેવી રહ્યા છે. આ ઘટનાથી પોલીસ બેડામાં ખળભળાટ મચી જવા પામ્યો છે.