મહેસાણા જીલ્લાના આરોગ્ય કર્મચારીઓ પોતાની પડતર માંગણીઓને લઈને છેલ્લા છ દિવસથી હડતાલ પર ઉતર્યા છે. ત્યારે પ્રાથમિક આરોગ્ય કેન્દ્રો પણ જાણે સુમસામ ભાસી રહ્યા છે. એકલ દોકલ કર્મીઓને ભરોસે ચાલતા આરોગ્ય કેન્દ્રો પર સ્ટાફના અભાવે સ્થાનિક દર્દીઓને હાલાકીનો સામનો કરવો પડી રહ્યો છે.
પંચાયત સેવાના આરોગ્ય કર્મચારીઓ છેલ્લા છ દિવસથી હડતાલ પર ઉતર્યા છે. જેની સીધી અસર પ્રાથમિક આરોગ્ય કેન્દ્રો પર જોવા મળી રહી છે. હડતાલ પર ઉતરેલા કર્મીઓને કારણે પ્રાથમિક આરોગ્ય કેન્દ્રો જાણે કે રામ ભરોસે ચાલી રહ્યા છે.
આવી પરિસ્થિતિ જોવા મળી હતી મહેસાણાના લીંચ ગામના પ્રાથમિક આરોગ્ય કેન્દ્ર પર કે જ્યાં ઇન્ચાર્જ આયુષ મેડીકલ ઓફિસરના ભરોસે સમગ્ર પ્રાથમિક આરોગ્ય કેન્દ્ર ચાલી રહ્યું હતું. જો કે તેમને આ બાબતે પૂછતાં કોઈ તકલીફ પડતી નહીં હોવાનું જણાવી વહીવટી તંત્રનો લૂલો બચાવ કરવાનો પ્રયાસ કર્યો હતો. જ્યારે ગામના સરપંચે સ્પષ્ટ જણાવ્યું હતું કે સ્થાનિક આરોગ્ય કેન્દ્રમાં સ્ટાફ હડતાલ પર હોવાથી દર્દીઓને ખાનગી હોસ્પિટલ જવું પડે છે. અને આર્થીક નુકશાન વેઠવું પડે છે.
મહેસાણા જીલ્લામાં હાલમાં 650 જેટલા આરોગ્ય વિભાગના કર્મીઓ હડતાલ પર છે. ગુજરાતમાં 35000 જેટલા કર્મીઓ હડતાલ પર ઉતરેલા છે. આરોગ્ય વિભાગના કર્મીઓએ આ અગાઉ એક દિવસ માસ સી એલ પર ઉતરી ધરણા કર્યા હતા. જો કે સરકાર નહીં સંભાળતા છેલ્લા છ દિવસથી હડતાલનો માર્ગ અપનાવ્યો છે.
આમ એક તરફ આરોગ્ય વિભાગના કર્મીઓની હડતાલ તો બીજી તરફ પ્રાથમિક આરોગ્ય કેન્દ્રો પર આરોગ્ય કર્મીઓના અભાવને કારણે દર્દીઓને પડતી હાલાકી. હવે જોવું એ રહ્યું કે સરકાર આ મુદ્દે કોઈ નિવેડો લાવે છે કે પછી આરોગ્ય કર્મીઓની હડતાલને પગલે દર્દીઓને તેની હાલાકી વેઠીને આર્થીક રીતે પણ હેરાન થવું સ્વીકારી લેવું પડશે.