કોરોનાના પગલે અનેક જગ્યાઓએ લૉકડાઉનું પાલન કરવામાં આવી રહ્યું છે. ત્યારે મહેસાણામાં હાલમાં સેવાના નામે લોકોના ટોળા ભેગા થતા હોય તેવું જોવા મળી રહ્યું છે. આ માટે કલેક્ટર એચ કે પટેલે આદેશ આપ્યા છે કે જો આ રીતે લોકો ભેગા થશે તો તેમના પાસ રદ કરવામાં આવશે. શહેરમાં 6 પોઈન્ટ નક્કી કરવામાં આવ્યા છે. અહીં જ કિટ્સ પહોંચાડી શકાશે. જો કોઈ કારણ વિના ભેગા થશે તો કડક કાર્યવાહી કરવામાં આવશે.
મહેસાણા જિલ્લા કલેકટરે કર્યો આદેશ
સેવાના નામે ટોળા ભેગા કરતા લોકોના પાસ કરાશે રદ અને થશે કાર્યવાહી
સેવા ભાવિ સંસ્થાના 4 થી 5 લોકોને જ મળશે પાસ
શહેરમાં કોરોનાને લઈને સેવા માટે કરાઈ આ વ્યવસ્થા
સેવા કરતા માંગતા લોકો કે સંસ્થાઓ માટે મહેસાણા શહેરમાં 6 પોઇન્ટ નિયત કરાયા છે. નિયત કરાયેલા પોઇન્ટ ઉપર સેવાભાવી સંસ્થાઓએ ભોજન કે કરીયાણા કિટ્સ પહોંચાડવાની રહેશે. આ માટે કોઈએ ભેગા થવાની જરૂર નથી. સરકારી અધિકારી અને તેમની ટીમ ફૂડનું વિતરણ કરશે.
સેવાના નામે ટોળા ભેગા કરનાર સામે થશે કાર્યવાહી
જિલ્લા કલેકટર દ્વારા મામલતદાર અને પ્રાંત અધિકારીને પાસ રદ કરવાનો આદેશ આપ્યો છે. આ સાથે જ કોઈ લૉકડાઉનના નિયમનું ઉલ્લંઘન કરે છે તો તેની સામે કાર્યવાહી પણ કરી શકાય છે. ઉલ્લેખનીય છે કે હવે સેવા ભાવિ સંસ્થાના 4 થી 5 લોકોને જ પાસ આપવામાં આવશે. પાસ સિવાયના વ્યક્તિઓની વિરુદ્ધમાં કાર્યવાહી કરાશે. તેઓએ આ પાસનો ઉપયોગ સરકારે નક્કી કરેલા ફૂડ કેન્દ્ર સુધી ફૂડ પહોંચાડવા જ કરવાનો રહેશે.
હાલમાં ગુજરાતમાં કોરોનાના છે આટલા કેસ
હાલમાં ગુજરાતમાં કુલ 58 કેસ નોંધાયા છે જેમાંથી 52 પોઝિટિવ કેસ છે અને સાથે જ કુલ 5 લોકોના મોત થયા છે. 1 વ્યક્તિ કોરોનાના કારણે સાજો પણ થયો છે. કોરોનાથી દેશને બચાવવા માટે તકેદારીના ભાગરૂપે આ પગલાં લેવાયા છે.