મહેસાણા: આંગડિયાકર્મીઓ પાસેથી લૂંટ મામલે ખેરાલુ પાસેથી મળી આવી  કાર 

મહેસાણા અમદાવાદ હાઇવે ઉપર વૉટર પાર્ક નજીક એસ ટી બસને હાઇજેક કરીને લૂંટ ચલાવવાની ઘટનામાં પોલીસને મોટી સફળતા મળી છે.

લૂંટ આચરી લૂંટારું જે કારમાં ભાગ્યા હતા તે કાર ખેરાલુ નજીકથી મળી આવી છે. તો કારમાંથી હીરાના કેટલાક પેકેટ અને ચાંદીના દાગીના પણ મળી આવ્યા છે.

તો બીજી તરફ લૂંટ કર્યા બાદ ભાગવા માટે જે કારનો ઉપયોગ કરવામાં આવ્યો હતો તે કાર ત્રણ માલિકના નામે ટ્રાન્સફર થઈ હોવાની વિગત બહાર આવી છે.

હાલમાં પોલીસ દ્વારા 10 ટીમ બનાવી 5 કરતા વધુ શંકાસ્પદની પૂછપરછ પણ હાથ ધરવામાં આવી છે. તો બીજી તરફ આ લૂંટમાં ખેરાલુ નજીકના કોઈ ગામની ટોળકી સંડોવાયેલી હોવાનું પોલીસ માની રહી છે.

તો ત્રણ આંગડિયા પેઢીના કર્મચારી હોવાને કારણે હજુ પણ લૂંટની રકમનો આંક વધી શકે છે. અલબત મહેસાણા પોલીસ માટે પ્રતિષ્ઠાનો પ્રશ્ન બની ગયેલા આ લૂંટ કેસનો ભેદ નજીકના સમયમાં ઉકેલાઈ જવાનો પોલીસે દાવો કર્યો છે.