અરવલ્લી જિલ્લાના મેઘરજ નજીકથી બે દિવસ અગાઉ 21 વર્ષીય યવતીનો મૃતદેહ મળી આવ્યો હતો. આરોપીઓએ યુવતી પર દુષ્કર્મ ગુજાર્યા બાદ યુવતીને મોતને ઘાટ ઉતારી દીધી હોવાની રાવ સાથે પરિવારજનોમાં આક્રોશ ફેલાયો છે. આ મામલે પરિવારે બે આરોપીઓ સામે નામ જોગ ફરીયાદ નોંધાવી હતી. એટલુ જ નહી આરોપીઓને પકડી કડકમાં કડક સજા કરવામાં આવે તેવી માંગ સાથે ગ્રામજનો મોડાસા SP કચેરી ખાતે વિરોધ પ્રદર્શન કરવા જતા હતા. આ અંગે પોલીસ તંત્રને ભીંસ પડી હતી. જેને પગલે લોકરોષને પારખી 1 DySP અને 5 PI સહિતના પોલીસ કાફલાએ રસ્તો બ્લોક કરીને ગ્રામજનનો મોડાસા જતાં અટકાવ્યા હતા. પોલીસે રસ્તો બ્લોક કરી ગ્રામજનોની 10 ગાડીઓ રોકી અને અધવચ્ચે મૃતકના પરિવારજનો સાથે બે કલાક બેઠક કરી હતી. જેમાં 15 દિવસમાં આરોપીઓને પકડી કડક કાર્યવાહીની ખાતરી આપતા લોકોનો આક્રોશ ટાઢો પડયો હતો. પોલીસે મેઘરજ-મોડાસા વચ્ચે બે કલાક સુધી પરિવાજનોને સાથે બેઠક કરી લોકોને સમજાવ્યા હતા અને 15 દિવસમાં આરોપીની ધરપકડ કરવા ખાતરી આપી હતી. આમ ન્યાયની ખાતરી મળતા પરિવારના લોકો યુવતીનો મૃતદેહ લઇને પરત ફર્યો છે. હવે ઘટનાના 3 દિવસ બાદ મૃતક યુવતીની અંતિમવિધિ કરવામાં આવશે.
શુ હતી સમગ્ર ઘટના?
અરવલ્લીના પંડુલી ગામે રહેતા પરિવારની 21 વર્ષીય યુવતી 2 દિવસ પહેલાં ગુમ થઈ ગઈ હતી.જેની પરિવારજનોએ શોધખોળ કરવા છતાં યુવતીનો ક્યાંય પત્તો લાગ્યો ન હતો. આથી પરિવારજનોએ સ્થાનિક પોલીસ મથક ગુમ નોંધ કરી હતી. જે અંગે પોલીસ તપાસમાં હતી. આ દરમીયાન મેઘરજ નજીક બેડઝના ડુંગર પરથી યુવતીની લાશ મળી આવી હતી. ગળેફાંસો ખાધેલી હાલતમાં યુવતીની લાશ મળી આવતા પરિવારજનોમાં રોકકળાટ ફેલાયો છે.
ત્રણ દિવસ બાદ યુવતીની કરાશે અંતિમવિધિ
જેને લઈને પોલીસે ઘટનાસ્થળે દોડી જઈ કાર્યવાહી હાથ ધારી હતી. યુવતીના મૃતદેહ પાસેથી પોલીસને કૉલેજ બેગ પણ મળી આવી હતી. પોલીસે કોલેજ બેગની પણ તપાસ કરી હતી.બીજી તરફ મૃતક યુવતીના પરિવારજનોએ આક્ષેપ કરતાં જણાવ્યુ કે, આરોપીઓએ યુવતીનું અપહરણ કરીને દુષ્કર્મ ગુજાર્યું છે. ત્યારબાદ યુવતીને મોતને ઘાટ ઉતારી દીધી હોવાના આક્ષેપ લગાવાયા છે. આ મામલે પરિવારજનોએ તાત્કાલિક પોલીસ મથકે દોડી જઈ બે આરોપીના નામજોગ ફરિયાદ નોંધાવી છે. એટલું જ નહિ જયા સુધી આરોપીઓ ન પકડાય ત્યાં સુધી પરિવારજનોએ યુવતીનો મૃતદેહ સ્વીકારવાની પણ મનાઈ કરી દીધી છે. ત્યારબાદ પોલીસે આરોપીઓને 15 દિવસમાં પકડી પાડવાની બાંહેધરી આપતા લોકો યુવતીના મૃતદેહને લઇ પરત ફર્યા હતા અને ત્રણ દિવસ બાદ યુવતીની અંતિમવિધિ કરવા માટે તૈયાર થાય હતા.